Read urhobo 2 Ikun rẹ Ivie 26 Bible Online

2 Ikun rẹ Ivie 26 - urhobo bible

2 Ikun rẹ Ivie 26

¹Ihwo ri Juda ejobi da reyọ Uzaya, ikpe ihwe gbẹ esan vwẹ ọke yena, a da vwọ ma ovie vwẹ ẹdia rẹ ọsẹ rọye Amazaya.

²Ọ da bọn Elọt ọ da rhoma reyọ vwọ kẹ Juda, vwẹ ọke rẹ ovie vwẹ vwerhẹ kugbe esẹ rọye nu.

³Uzaya da dia ikpe ihwe gbe esan vwẹ ọke ro vwo mu ẹriọ phihọ, ọ da re ikpe ujuvẹ gbe ihwivẹ vwi Jerusalẹm. Odẹ rẹ oni rọye kẹ Jekolia ri Jerusalẹm.

⁴O de ru obo ri shephihọ vwẹ obọ rẹ Ọrovwohwo, vwẹ emu ejobi rẹ ọsẹ rọye Amazaya ruru.

⁵Ọ da vwẹ oma rọye ejobi vwọ guọnọ Ọghẹnẹ vwẹ ọke ri Zekaraya, ro yoniro phihọ oshọẹdjẹ rẹ Ọghẹnẹ uche ọke rọ guọnọ Ọrovwohwo te, Ọghẹnẹ da nẹrhẹ oyovwi kẹ.

⁶Ọ da yanran ra họnre ihwo ri Filistia, o de kporọ igbẹhẹ ri Gat she kugbe igbẹhẹ ri Jabneh kugbe igbẹhẹ rẹ Ashdọd; ọ da bọn irere phihọ ubrakpọ rẹ Ashdọd kugbe asan efa vwẹ otọ ri Filistia na.

⁷Ọghẹnẹ da cha uko vwo phi Filistia, kugbe ihwo rẹ Arebia re dia Gurbaal, kugbe ihwo ri Meu.

⁸Ihwo rẹ Ammọn da ghwẹ ẹga rhe, usi rọye de kperi re te ughwru rẹ Ijipt, kidie ọ rhe gan oma gangan.

⁹Ọ rọ marho Uzaya da bọn ehẹrhẹ phihọ Jerusalẹm vwẹ asan Anurhoro rẹ Akako kugbe Anurhoro rẹ Iyara kugbe asan Ubienyẹ, ọ da gba ogba phihọ ayen.

¹⁰Ọ da bọn ehẹrhẹ phihọ obo aghwa ọ da tọn ikpotọ buebu, kidie o vwo ekru rẹ uchuru ride, vwẹ obo Shẹfela ji kugbe obo uphẹphẹ, o de vwo eghwẹrẹ kugbe ihwo rẹ rhuẹrẹ vain vwẹ obo igbenu na kugbe etọ ri yovwẹ emu na, kidie udju evoro vwerhọ.

¹¹Ọ rọ marho Uzaya de vwo ihwo ri phiẹ ofovwi buebu, rẹ goma rẹ ofovwi, ra ghare phihọ ẹkuẹko re se vwo si ayen koko kirobo ri Jeiel rẹ osiọbe kugbe Maaseya rẹ onotu na, vwẹ otọ rẹ isuesun ri Hananiah, ọvo vwẹ usun rẹ inotu rẹ ovie na.

¹²Ihwo na ejobi re dia igbuyovwi vwẹ uwuwevwi rẹ esẹ na re dia egba ri yivwaro da dia uriori ivẹ gbe ujori esan.

¹³Vwẹ otọ re isuesun rayen da dia unuofovwi uriori ujori erha gbẹ ighwrẹ kugbe ujori iyori, re vẹ egba se phi ofovwi, rere e cha ovie uko vwo phi ivwighrẹ rọye.

¹⁴Uzaya de duvwu ekpọfia kẹ unuofovwi na ejobi, ishuẹ, erhu, iwun rẹ itehru, imirhabọ, kugbe ibieragha re do.

¹⁵Vwi Jerusalẹm o de duvwu ijini, ewena ri duvwu ayen, e de phi ayen phihọ enu rẹ ehẹrhẹ na kugbe akako na, rere e sa edada kugbe eragha ride. Usi rọye de kperi sheri, kidie a charọ ukọ gangan, bẹsiẹ rọ rhe vwọ gan oma.

¹⁶Ẹkẹvuọvo ọke rọ rhe gan re ko rhi phuoma, kọye rhe ghwọrọ. Kidie ọ gbe rha dia omamọ re ohwo kẹ Ọrovwohwo Ọghẹnẹ rọye-e, ọ da ro evun rẹ uwevwi rẹ Ọrovwohwo ra torhẹ insẹns vwe agbada re ugboduma na.

¹⁷Ẹkẹvuọvo Azaraya rẹ orherẹn na da yan bro ra, ọ vẹ irherẹn rẹ Ọrovwohwo ujọne ihwo ri yivwaro,

¹⁸ayen de re gbe ota phihọ Uzaya unu, ayen da ta kẹ, Ọ dia iruo wẹ-ẹn, Uzaya, re wọ vwọ torhẹ insẹns kẹ Ọrovwohwo-o, ẹkẹvuọvo irherẹn na kugbe ọmọ rẹ Erọn, re vwo mu nẹ e torhẹ insẹns. Wan nẹ evun rẹ ẹshẹ na; kidie wo ru chọ, o vwo ọghọ ro che nẹ obọ rọ Ọrovwohwo Ọghẹnẹ bru we-e.

¹⁹Etiyin ivun de miovwo Uzaya. Vwẹ ọke yena yẹ ubrochẹ rhere vwẹ obọ rọ vwọ torhẹ ugboduma, ọke rẹ ivun vwo miovwo kpahe irherẹn na oti da ghwa varhe vwẹ arhare rọye, vwẹ irharo rẹ irherẹn na vwẹ evun rẹ uwevwi rẹ Ọrovwohwo na, vwẹ asan agbada rẹ insẹns na.

²⁰Azaraya olori rẹ irherẹn na, kugbe irherẹn na ejobi, ki di no, nighere, arhare rọye ko lo vẹ oti, ayen da djẹ ro otafe kpata kpata, ekpuyovwi rọye de broma ro otafe, kidie Ọrovwohwo ghwiẹrẹ.

²¹Ovie Uzaya kẹ ọhọnvwoti re te ẹdẹ rẹ ughwu rọye, rọ vwọ dia ọhọnvwoti na uwevwi rẹ obọ rọye sa kọye ọ diare, kidie a djẹrẹ nẹ uwevwi rẹ Ọrovwohwo na. Joram ọmọ rọye kọye e phihọ evwruwevwi rọye, ro sun ihwo rẹ otọ na ejobi.

²²Asakiephana uruemu rẹ Uzaya ro chekọ ejobi, nẹ ẹsosuọ re te oba, Aizaya rẹ ọmraro ọmọ rẹ Amọz de sio.

²³Uzaya da vwerhẹ kugbe esẹ rọye, e de sho kugbe esẹ rọye vwẹ ogbẹ rẹ ivie, kidie ayen tare nẹ, ọhọnvwoti o ruẹ. Joram ọmọ rẹ ọye da re vwẹ ẹdia rọye.