Read urhobo 2 Ikun rẹ Ivie 28 Bible Online

2 Ikun rẹ Ivie 28 - urhobo bible

2 Ikun rẹ Ivie 28

¹Ehaz da dia ikpe uje ọ ghwo te vwẹ ọke rọ vwo muphihọ ẹriọ, ọ da re ikpe ihwe gbẹ esan vwi Jerusalẹm. Ọ rhe ru obo ri yoma vwẹ obaro rẹ Ọrovwohwo o, kerẹ ọsẹ rọye, Devidi-i,

²Ẹkẹvuọvo ọ da vwẹ ẹro kere ivie rẹ Izrẹl. Ọ tọbo duvwu ukẹdjọ ra wraure kẹ Baal;

³ọ da torhẹ insẹns vwẹ iyara rẹ emọ ri Hinnọm, ayen da torhẹ emọ rayen vwo ze izobo, kerẹ uruemu ro tuoma rẹ ẹgborho rẹ Ọrovwohwo djẹ nẹ obaro rẹ Izrẹl na epha.

⁴O de ze izobo ọ da torhẹ insẹns vwẹ asan ri kpenu, vwẹ enu rẹ ibiugbenu; kugbe otọ rẹ urhe kurhe vẹ ẹbe wọnwọnwọn.

⁵Fiki rẹ ọtiọye na Ọrovwohwo Ọghẹnẹ rọye de phio phihọ obọ rẹ ovie ri Siria, o de phio kparobọ o de mu ihwo rọye buebu ighuvwu o de mu ayen kpo Damaskọs. E de ji phio phihọ obọ rẹ ovie rẹ Izrẹl, o de phio kparobọ o de hwe ihwo rọye buebu.

⁶Kidie Peka ọmọ ri Remaiaya de hwe ihwo uriori uje vwi Juda vwẹ ẹdẹ ọvo, ihwo na ejobi na eshare ri yivwaro, fikiridie ayen sen Ọrovwohwo na, Ọghẹnẹ rẹ esẹ rayen.

⁷Zikri, ọgba ohwo rẹ Ifrem, o de hwe Maaseiya ọmọ rẹ ovie na kugbe Azrikam onotu rẹ ighẹn kugbe Elkanah rọ vwọ kpahe ovie na.

⁸Ihwo rẹ Izrẹl de mu ihwo uriori ujori ivẹ rẹ ihwo rẹ obọ rayen ighuvwu, eya, emeshare, kugbe emetẹ; ayen de ji gborho ekuakua buebu mie ayen ayen da je ghwa ekuakua na kpo Sameria.

⁹Ẹkẹvuọvo ọmraro rẹ Ọrovwohwo ọvo hẹ etiyin, re se odẹ rọye Ọbẹd; ọ da ra vwa unuofowi na rọ ro Sameria, ọ da ta kẹ ayen, Nighe, fiki rẹ obo rẹ Ọrovwohwo, Ọghẹnẹ rẹ esẹ rẹ ovwan, vwo mu ophu kpahe Juda, ọye o vwo phi ayen phihọ obọ rẹ ovwan, ẹkẹvuọvo wa da vwẹ ophu hwe ayen rẹ oviẹ rayen de re te odjuvwu.

¹⁰Asakiephana wa rha jẹ iroro ru wa cha vwọ vwẹ ihwo ri Juda vi Jerusalẹm vwo ru eviẹn, te eshare te eya. Ovwan rha je rhoma ru umwemwu kpahe Ọrovwohwo Ọghẹnẹ wẹn?

¹¹Asakiephana we gbe nyo vwe, we siobọ nẹ ighuvwu rẹ imoni rẹ ovwan na kpo, kidie ophu ọtuatua rẹ Ọrovwohwo ọ hẹ uyovwi rẹ ovwan.

¹²Ehọnvwọre rẹ ihwo rẹ Ifrem evo, Azaraya ọmọ ri Johanan, Bẹrẹkaya ọmọ ri Meshillemọt, Jehizkaya ọmọ ri Shallum, kugbe Amaza ọmọ ri Hadlai, de mudia ta ota kpahe usun rẹ ofovwi na rọ cha na,

¹³Ọ da ta kẹ ayen, Wa vwẹ ighuvwu na vwẹriẹ etinẹ-ẹ, kidie wa cha nẹrhẹ avwanre re abe rẹ Ọrovwohwo rha vwọ ba abe rẹ umwemwu rẹ avwanre ruru jovwo. Kidie umwemwu rẹ avwanre tobọ rho nọ jovwe re, yẹ ophu rẹ Izrẹl muo tuatua.

¹⁴Etiyin ihwo rẹ ofovwi na de siobọ nẹ ighuvwu na vẹ ekuakua rẹ ayen gborhori vwẹ irharo rẹ isun na kugbe ukoko na ejobi.

¹⁵Ihwo re se odẹ rẹ ayen na vrẹnri ayen da reyọ ighuvwu na, vẹ ekuakua na ayen de rhuo ihwo ra ban phihọ vwẹ ohri rẹ ayen; ayen de rhuo ayen, a da vwẹ isabato kẹ ayen, a da vwẹ emuọre vẹ udi kẹ ayen, a da nabọ vwẹ ori ghworo ayen; re vwo mu e re pha guọguọ vwẹ usun rẹ ayen phihọ enu rẹ ekẹtẹkẹtẹ nu, a da gua ayen vwo rhe ihwo rẹ ayen vwi Jeriko, orere rẹ ugbo rẹ iriẹ na. Etiyin ayen de rhivwi kpo Sameria.

¹⁶Vwẹ ọke yena Ovie Ehaz de ji ohwo bru ovie rẹ Asiria nẹ ọ rhe cha ọye uko.

¹⁷Kidie ihwo rẹ Idọm kpare ohọnre vwọ so Juda ayen de phio kua, ayen de mu ighuvwu buebu kpo.

¹⁸Ihwo ri Filistia je ghwa kpare imu kpo irere re nẹ obi Shefeia kugbe Nẹgẹb ri Juda, ayen da reyọ Bẹtshemesh, Aijalọn, Gederọt, Soko vẹ ẹko rayen, Timnah vẹ ẹko rọye, kugbe Gimzo vẹ ẹko rọye; kẹ etiyin kọye ayen kua ro.

¹⁹Kidie Ọrovwohwo da vwẹ Juda kpo otọ fiki rẹ Ehaz ovie rẹ Izrẹl, fikiridie o ru emu ogbegbo vwi Juda o ji se Ọrovwohwo na gguyota-a.

²⁰Etiyin Tilgatpilneza ovie rẹ Asiria da rhe họnrọ, o de gbe osọnọ kẹ re ọ rha vwẹ ogangan kẹ-ẹ.

²¹Kidie Ehaz da ghwẹ ekuakua rẹ uwevwi rẹ Ọrovwohwo kugbe uwevwi rẹ ovie vẹ emọ rẹ ivie na, ọ da vwẹ ayen hwa osa rẹ ẹgbukpe kẹ ovie rẹ Asiria; ẹkẹvuọvo ọyena sa cha ayen uko-o.

²²Vwẹ ọke rẹ ukpokpogho rọye re o rhe vwo esegbuyota kpahe Ọrovwohwo na-a — Ehaz Ovie nana ọvuọvo na.

²³Kidie o ze izobo kẹ ẹdjọ ri Damaskọs ri phiro kparobọ na, ọ da ta, Fikiridie ẹdjọ rẹ ovie ri Siria re cha ayen uko, mi ze izobo kẹ ayen sẹ ayen sa cha vwẹ uko. Ẹkẹvuọvo kẹ eye re so ughwu rọye, kugbe Izrẹl ejobi.

²⁴Ehaz da ghwẹ ekuakua rẹ uwevwi rẹ Ọghẹnẹ ejobi koko ọ da nyavwe ekuakua rẹ uwevwi re Ọghẹnẹ ejobi ibribro, ọ da kare ẹchẹ rẹ uwevwi rẹ Ọrovwohwo na; ọ da so egbada kẹ oma rọye vwẹ kakakọ kakakọ ri Jerusalẹm ejobi.

²⁵Vwo korere korere ri Juda ejobi ọ da ma asan ro kpenu phihọ rọ da torhẹ insẹns kẹ ẹdjọ efa, ọ da rhe kpare ophu rẹ Ọrovwohwo na, Ọghẹnẹ rẹ esẹ rọye na.

²⁶Asakiephana uruemu rọye ejobi kugbe idjerhe rọye ejobi, nẹ ẹsosuọ re te oba, Nighe, e si ayen phihọ Ọbe rẹ Ivie ri Juda vẹ Izrẹl,

²⁷Ehaz da vwerhẹ kugbe esẹ rọye, ayen de sho phihọ orere na, vwi Jerusalẹm, kidie e muro kpo ogbẹ rẹ ivie rẹ Izrẹl, Hẹzikaya ọmọ rọye da re vwẹ ẹdia rọye.