Read urhobo 2 Ikun rẹ Ivie 29 Bible Online

2 Ikun rẹ Ivie 29 - urhobo bible

2 Ikun rẹ Ivie 29

¹Hẹzikaya de muphihọ ẹriọ ọke rọ vwọ ikpe uje gbe iyori, ọ da re ikpe uje gbe irhiri vwi Jerusalẹm. Odẹ rẹ oni rọye kẹ Abija ọmọtẹ ri Zẹkaraya,

²O de ru obo ri yoma vwẹ obaro rẹ Ọrovwohwo, kirobo ri Devid ọsẹ rọye ruru.

³Vwẹ ukpe rẹ ẹsosuọ rẹ ẹriọ rọye, vwẹ emeranvwe rẹ ẹsosuọ, o de rhie ẹchẹ rẹ uwevwi rẹ Ọrovwohwo na, ọ da rhuẹrẹ ayen.

⁴Ọ de se irherẹn vẹ ihwo ri Livae na rhe, ọ da ghwẹ ayen koko vwẹ ọsuere vwẹ obaro ọnre,

⁵Ọ da ta kẹ ayen, Nyo vwe, Ihwo ri Livae! Asakiephana we phorho oma rẹ ovwan, re we phorho uwevwi rẹ Ọrovwohwo na, Ọghẹnẹ rẹ esẹ rẹ ovwan, re wa ghwa inuhu nẹ asan ọfuanfon na.

⁶Kidiẹ esẹ rẹ avwanre segbuyota-a ayen de ru emu ọbrabra vwẹ obaro rẹ Ọrovwohwo Ọghẹnẹ rẹ avwanre; ayen senrọ, ayen de si opharo rayen nu kẹ ẹdia rẹ Ọrovwohwo, ayen de chuko rayen kuo.

⁷Ayen de huhu ẹchẹ rẹ ọguan na ayen de furhie irhukpẹ na, ayen gbe torhẹ ughoduma-a eyẹ ze izobo rẹ ẹtorhẹ vwẹ asan ọfuanfọn na kẹ Ọghẹnẹ rẹ Izrẹl na-a.

⁸Fiki rẹ ọtiọye na ophu rẹ Ọrovwohwo de bru Juda vi Jerusalẹm rhe, ọ da vwẹ ọbe rẹ oshọ re ayen, kugbe unueghe, kugbe unuẹfiọn, kirobo wa vwẹ ẹro rẹ ovwan mrẹ na.

⁹Gbe no, esẹ rẹ avwanre ghwu ughwu rẹ oda emeshare rẹ avwanre kugbe emetẹ rẹ avwanre kugbe eya rẹ avwanre ighuvwu fiki rẹ ọnana.

¹⁰Asakiephana me jẹ iroro phihọ evun rere me vẹ Ọrovwohwo vwọ re ọphọ, Ọghẹnẹ rẹ Izrẹl na, rere ophu ọtuatua rọye na vwo bi nẹ avwanre oma.

¹¹Emọ mẹ, we siunu-u, kidie Ọrovwohwo jẹ wẹ reyọ nẹ wọ mudia vwẹ obaro rọye, re wo gbe odibo kẹ, re wọ dia orherẹn rọye re wọ torhẹ insẹns kẹ.

¹²Etiyin ihwo ri Livae na de vrẹn, Mahaf rẹ ọmọ rẹ Amasai, kugbe Joẹl ọmọ rẹ Azaraya, vwẹ usun rẹ emọ ri Kohar; vwẹ usun rẹ emọ ri Merari, Kish ọmọ rẹ Ahdi, kugbe Azaraya ọmọ ri Jehallelel; kugbe usun rẹ ihwo ri Gẹrshọn, Joah ọmọ ri Zimmah, kugbe Edẹn ọmọ ri Joah;

¹³vwẹ usun rẹ emọ rẹ Elizafan Shimri kugbe Jeuẹl; kugbe emeshare ivẹ rẹ Asaf, Zẹkaraya kugbe Marranaya;

¹⁴Kugbe usun rẹ emọ ri Heman, Jẹhuẹl vi Shimei; kugbe usun rẹ emọ ri Jẹdutọn, Shemaiya kugbe Uziel.

¹⁵Ayen da ghwẹ imoni rayen koko, ayen de phorho oma rẹ ayen, ayen da ro uwevwi kirobo rẹ ovie ji iji kẹ ayen, vwẹ oma rẹ ota rẹ Ọrovwohwo na, rere ọ hworhẹ uwevwi rẹ Ọrovwohwo na.

¹⁶Irherẹn na da yanran kpo obo evun rẹ ẹtan rẹ uwevwi rẹ Ọrovwohwo na re hwerhe, ayen da ghwẹ erọvwo igbegbe rẹ ayen mrẹre vwẹ evun rẹ uwevwi rẹ Ọrovwohwo na rhe rhi phihọ evun rẹ ọguan rẹ uwevwi rẹ Ọrovwohwo na; ihwo ri Livae na da reyọ ayen de muo kpo obo ẹtẹrhe ri Kidrọn.

¹⁷Ayen de mu ephorho phihọ vwẹ ẹdẹ rẹ ẹsosuọ rẹ emeranvwe rẹ ẹsosuọ na, vwẹ ẹdẹ rẹrenre rẹ emeranvwe na, ayen de rhi re ọguan rẹ Ọrovwohwo na; ẹdẹ ẹrenre soso ọye ayen phorho ọguan rẹ Ọrovwohwo na, vwẹ ẹdẹ ihwe gbẹ esan rẹ emeranvwe rẹsosuọ na ayen de phorho re.

¹⁸Etiyin ayen de bru Hẹzikaya rẹ ovie na ayen da ta, Avwanre phorho uwevwi rẹ Ọrovwohwo ejobi rere, agbada ri izobo rẹ ẹtorhẹ na vẹ ekuakua rọye ejobi, kugbe imẹjẹ rẹ ikara ra vwọ nẹ vẹ ekuakua rọye ejobi.

¹⁹Ekuakua ejobi rẹ Ovie Ehaz gbobọnyẹ vwẹ ọke rẹ isuesun rọye rẹ esegbuyota rọye vwo she nu, avwanre rhuẹrẹ ayen ejobi phihọ e ki rhe ji phorho ayen; gbe nighe, ayen ejobi hẹ obaro rẹ agbada rẹ Ọrovwohwo na.

²⁰Etiyin Hẹzikaya de vrẹn vwẹ irhiọke ride ọ da ghwẹ inotu rẹ orere na koko, ayen de kpo uwevwi rẹ Ọrovwohwo na.

²¹Ayen de mu irhuẹn eshare ighwrẹ rhe, egbo ighwrẹ, igegede ighwrẹ kugbe ẹkpro ighwrẹ ra vwọ torhẹ izobo rẹ umwemwu fiki rẹ uvie na ji kugbe ẹshẹ na ji kugbe Juda. Ọ de ji iji kẹ irherẹn na emọ rẹ Erọn na nẹ a vwẹ ayen ze izobo vwẹ enu rẹ agbada na kẹ Ọrovwohwo na.

²²Etiyin ayen de hwe irhuẹn eshare na, irherẹn na da reyọ ọbara rọye a da kparọ ku họ agbada na; ayen de hwe igbo na a da kpare ọbara rayen ku ku agbada na; ayen de hwe igegede na e de ku ọbara rayen ku agbada na.

²³Etiyin ẹkpro na re vwo ze izobo rẹ umwemwu na e de mu ayen rhe ovie vẹ ukoko na ejobi, ayen da ghwẹ abọ kpahe ayen,

²⁴Irherẹn na de hwe ayen a da vwẹ ebara rayen ze izobo rẹ umwemwu vwẹ enu rẹ agbada, rere a vwọ rhuẹrẹ arhuẹrẹ kẹ Izrẹl, kidie ovie ji iji nẹ izobo rẹ ẹtorhẹ kugbe izobo rẹ umwemwu ọye e ze fiki rẹ Izrẹl ejobi.

²⁵Ọ da ghwẹ ihwo ri Livae na phihọ uwevwi rẹ Ọrovwohwo vẹ ekuakua, akpata, kugbe isorogun, kirobo rẹ urhi ri Devid vi Gad ọmraro rẹ ovie kugbe Natan ọmrare na epha; kidie urhi na ọ rẹ Ọrovwohwo rọ wan unu rẹ emraro rọye rhe.

²⁶Ihwo ri Livae na de mudia vẹ ekuakua ri Devid na, kugbe irherẹn na vẹ ewanre na.

²⁷Etiyin Hẹzikaya de ji iji nẹ e ze izobo rẹ ẹtorhẹ vwẹ enu rẹ agbada. Ọke re vwo mu izobo rẹ ẹtorhẹ na phihọ, ayen de mu une ra sua kẹ Ọrovwohwo na phihọ rhe, ekuakua ri Devid ovie rẹ Izrẹl na de nene.

²⁸Ukoko na ejobi da ga, otu re sua une da so, ewanre na de hworo; ayen de hworo ihwehworo nana ejobi bẹsiẹ ra vwọ izobo rẹ ẹtorhẹ na ejobi na.

²⁹Ọke re vwo ze izobo na ejobi nu, ovie na vẹ ihwo re vẹ ayen gbe herọ ejobi de gbe uyovwi otọ ayen da ga.

³⁰Hẹzikaya rẹ ovie na kugbe isun na de ji iji kẹ ihwo ri Livae na nẹ e gba so ejiro kẹ Ọrovwohwo vẹ ine ri Devid rori kugbe Asaf rẹ ọmraro na. Ayen da so ejiro vẹ aghọghọ, ayen de gbe uyovwi kpotọ ayen da ga.

³¹Etiyin Hẹzikaya da ta, Asakiephana we ru oma rẹ ovwan fuanfon kẹ Ọrovwohwo nure, we gbe bi te obonẹ, wa vwẹ izobo vẹ ẹkpẹvwẹ vwọ rhe uwevwi rẹ Ọrovwohwo na. Ukoko na da vwẹ izobo vẹ ẹkpẹvwẹ rhe; ihwo ejobi ri vwo udu esiri da vwẹ izobo rẹ ẹtorhẹ rhe.

³²Unu rẹ izobo rẹ ukoko na ghwa rhe da dia irhuẹn eshare ujorha gbẹ ihwe, egbo ujori, igegede ujori ivẹ; enana ejobi na ke ra vwọ torhẹ izobo kẹ Ọrovwohwo na.

³³Ekuakua re ru fon ejobi na da dia irhuẹn eshare ujori esan kugbe igegede uriori erha.

³⁴Ẹkẹvuọvo irherẹn na hanvwe nọ ayen gba sa bọrọ izobo rẹ ẹtorhẹ na-a, bẹsiẹ rẹ irherẹn efa rhi vwo ru oma rayen fon imoni rayen ihwo ri Livae na keye re cha ayen uko, bẹsiẹ rẹ iruo na ki rhi re — kidie ihwo ri Livae fon evun nọ irherẹn vwẹ oma rayen rẹ ayen ru fon.

³⁵Rha vwọ ba izobo rẹ ẹtorhẹ na ivwri rẹ izobo rẹ ufuoma na je herọ, kugbe udi ra cha banọ kuotọ rẹ izobo rẹ ẹtorhẹ na. Kẹnẹ a rhuẹrẹ ẹga rẹ uwevwi rẹ Ọrovwohwo na phihọ.

³⁶Hẹzikaya kugbe ihwo na ejobi da ghọghọ fiki rẹ obo rẹ Ọghẹnẹ ru kẹ ihwo na ejobi; kidie kpregede ọye emu na phiare.