Read urhobo 2 Ikun rẹ Ivie 3 Bible Online

2 Ikun rẹ Ivie 3 - urhobo bible

2 Ikun rẹ Ivie 3

¹Etiyin Solomọn de mu uwevwi rẹ Ọrovwohwo phihọ ẹbọn vwi Jerusalẹm vwẹ Ugbenu ri Moria, asan rẹ Ọrovwohwo da vwẹ oma phia kẹ Devid rẹ ọsẹ rọye, vwẹ asan ri Devid djeri, vwẹ utuwevwi rẹ ewuye rẹ Ọnan ohwo ri Jebu.

²Ọ de mu ebabọn na phihọ vwẹ emeranvwe rivẹ rẹ ukpe rẹne rẹ ẹriọ rẹ uvie rọye.

³Enana ẹvwanvwọn ra vwọ bọn uwevwi rẹ Ọghẹnẹ na; ugrogro rọye, ra vwanvwere vwẹ ovwanvwọn rẹ avwanre da dia kubit ujorha, ohẹhẹre kubit uje.

⁴Ọmọguan rọ hẹ obaro rẹ uwevwi na kubit uje o gro te, ọ vẹ ohẹhẹre rẹ uwevwi na abavo; ugrogro rọye kpenu da dia kubit ujosan. Ọ da vwẹ omamọ rẹ oro phare evun rọye.

⁵A da vwẹ owangha hwa utuwevwi rọye, ọ da vwẹ omamọ rẹ oro vwọ pharọ, a da kare iriẹ vẹ ejọnrọn phihọ enu rọye.

⁶Ọ da vwẹ omamọ rẹ urhiẹ rẹ eragha vwọ panọ uwevwi na. Oro na ke rha oro ri Parvaim.

⁷Etiyin ọ da vwẹ urhiẹ rẹ oro vwọ tan uwevwi na — egbẹn rọye, ugana rọye, igbẹhẹ rọye, ẹchẹ rọye, kugbe chẹrobim ra kare phihọ igbẹhẹ rọye.

⁸Ọ da bọn asan rọ ma fon ejobi; ugrogro rọye, vẹ ọhẹhẹre rẹ uwevwi na abavo, ọ da dia kubit uje; ọ da vwi talẹnt rẹ omamọ rẹ oro ujori esan vwọ pharọ.

⁹Ehọhọ rẹ ibibẹ na da dia ọvo rẹ te ujuvẹ gbe ihwe ri shekẹl rẹ oro. Ọ da vwẹ omamọ rẹ oro vwọ pharọ obenu rọye.

¹⁰Vwẹ ọbo asan rọ ma fon na ọ da kare chẹrobim rẹ urhe ivẹ phihọ ra vwẹ ọro phare.

¹¹Ibekpe ri chẹrobim na da hẹre kubit uje; ibekpe ọvo rẹ ovọ, ro te kubit iyori, de te igbẹhẹ rẹ uwevwi na, ibekpe rọye ro chekọ, vwi kubit iyori, te ibekpe ri ehẹrub ro chekọ;

¹²vwi chẹrub nana, ibekpe ọvo, ri kubit iyori, de te igbẹhẹ rẹ uwevwi na, ibekpe ro chekọ, je vwẹ kubit iyori rhe, a da rhuọn kugbe ibekpe ri chẹrub rẹ ẹsosuọ na.

¹³Ibekpe ri chẹrobim nana da hẹre te kubit uje; chẹrobim na da vwẹ awọ mudia, ri nẹ uphẹphẹ rẹ utuwevwi na

¹⁴O de ko amwa rẹ opharo rẹ ọgiọgio vẹ orhnrhu vẹ isene kugbe omamọ rẹ esada, e de rhuo chẹrobim phihọ enu rọye.

¹⁵Vwẹ obaro rẹ uwevwi na ọ da ma osusu ivẹ phihọ ri kpenu te kubit ọgban, vẹ ubierhu vwẹ obenu rẹ ọvuọvo ro te kubit iyori.

¹⁶O de duvwu ejọnrọn kerẹ aghighọn ọ da vwẹ ayen ya enu rẹ osusu na; o de rhe duvwu ejọjọ ujori, ọ da rha vwẹ ayen ya ejọnrọn na.

¹⁷Ọ da vwẹ osusu na vi vwẹ obaro rẹ uwevwi na, ọvo obọrhe ọnre, o ro chekọ obọhwere ọnre; ọ rọ obọrhe ọnre na e de se Jakin, ọ rọ obọhwere ọnre; e se Boaz.