Read urhobo 2 Ikun rẹ Ivie 30 Bible Online

2 Ikun rẹ Ivie 30 - urhobo bible

2 Ikun rẹ Ivie 30

¹Hẹzikaya de re se Izrẹl kugbe Juda ejobi, o de si ọbe rhe Ifrem vi Manasse, nẹ ayen rhe uwevwi rẹ Ọrovwohwo vwẹ Jerusalẹm, re ayen rhe re orẹ rẹ ẹwanvrẹn na kẹ Ọrovwohwo Ọghẹnẹ rẹ Izrẹl.

²Kidie ovie na kugbe isun rọye kugbe ukoko re gba vwi Jerusalẹm ejobi da jẹ iroro kugbe nẹ a re orẹ rẹ ẹwanvrẹn na vwẹ emeranvwe rivẹ —

³kidie ayen sa riọ vwẹ ọke rọye-e fikiridie irherẹn na ji phorho oma gba-a, yẹ ihwo na ejobi ji koko vwi Jerusalẹmu-u

⁴iroro nana da dia obo ri; shephihọ kẹ ovie vẹ ukoko na.

⁵Etiyin ayen de ji iji nẹ e gbe ghwoghwo ona wan Izrẹl ejobi, nẹ Bẹẹrsheba re te Dan, nẹ ihwo na rhe rhe re orẹ rẹ ẹwanvrẹn na kẹ Ọrovwohwo Ọghẹnẹ rẹ Izrẹl, vwi Jerusalẹm; kidie ihwo buebu gbidi je riọ kirobo ra riọ jovwo-o,

⁶Etiyin aghwoghwo da ro Izrẹl kugbe Judea ejobi vẹ ẹbe rẹ ovie vẹ isun na siri, kirobo rẹ ovie na ji iji, tanẹ, E ihwo rẹ Izrẹl, wẹ rhivwi bru Ọrovwohwo, Ọghẹnẹ rẹ Ebraham, Aizik, kugbe Izrẹl, rere o rhivwi bru umuku rẹ ovwan re djẹ va ovie rẹ Asiria obọ.

⁷Ovwan rha họhọ esẹ rẹ ovwan vẹ imoni rẹ ovwan, ri vwo esegbuyota kpahe Ọrovwohwo Ọghẹnẹ rẹ esẹ raye-en, rọ vwọ nẹrhẹ a kua ayen fiotọ, kirobo rẹ ovwan mrẹ na.

⁸We rhe jẹn udu rẹ ovwan dia gangan kerẹ esẹ rẹ ovwa-an, ẹkẹvuọvo wa vwẹ oma kpotọ kẹ Ọrovwohwo, re we bro rhe ẹshẹ rọye, ro ru fon bẹdẹ, re wa rhe ga Ọrovwohwo Ọghẹnẹ wẹn, rere ophu rẹ ovwan ro muo vwo fue.

⁹Kidie we de rhivwi bru Ọrovwohwo na, imoni wẹn kugbe emọ wẹn ke mrẹ ehrọre vwẹ obọ rẹ ihwo ri mu ayen na, ki che rhivwi rhe otọ nana. Kidie Ọrovwohwo Ọghẹnẹ wẹn ọ vọnre vẹ ehrọre vẹ arodọvwẹ, o rhe chuko ku we-e, ọ da dianẹ wo rhivwi bro.

¹⁰Etiyin ighwoghwo na de nẹ orere kpo orere vwẹ Ifrem vi Manasse, rhiri re te Zẹbulọn; ẹkẹvuọvo a da hwẹ ayen viẹ, a da vwẹ ayen jehwẹ.

¹¹Imihwo rẹ Asha vẹ ẹ ri Manasse, kugbe Zẹbulọn re vwẹ oma kpotọ ayen da rhe Jerusalẹm.

¹²Ọbọ rẹ Ọrovwohwo vi Juda da herọ ọ da vwẹ iroro ọvo vwọ kẹ ayen vwo ru obo rẹ ovie vẹ isun vwẹ ota rẹ Ọrovwohwo ru.

¹³Ihwo buebu de rhi koko vwi Jerusalẹm rhe re orẹ re lkara ro jephuo na vwẹ emeranvwe rivẹ, ukoko rode gangan.

¹⁴Ayen de she owian ayen da kpare egbada ri Jerusalẹm ejobi no, kugbe egbada ra vwọ torhẹ ugboduma ejobi a da ra kpare ayen phihọ iyara ri Kidrọn.

¹⁵Ayen de hwe ogegede rẹ orẹ rẹ ẹwanvrẹn na vwẹ ẹdẹ ihwẹne rẹ emeranvwe rivẹ na. Oma da rhe vo irherẹn na vẹ ihwo ri Livae na, ayen de re phorho oma rẹ ayen, ayen da vwẹ izobo rẹ ẹtorhẹ na rhe uwevwi rẹ Ọrovwohwo na.

¹⁶Ayen de re tidia asan ra rhuẹrẹ phihọ kẹ ayen jovwo kirobo rẹ urhi ri Mosis ohwo rẹ Ọghẹnẹ epha; irherẹn na da kpare ọbara rẹ ayen mu mie ihwo ri Livae na ku.

¹⁷Kidie ihwo buebu herọ vwẹ evun rẹ ukoko na ri ji phorho oma rẹ aye-en; fiki rẹ ọtiọye na ihwo ri Livae na keye ri hwe igegede na kẹ ihwo ri jẹfuọn, rere ọ vwọ fon kẹ Ọrovwohwo

¹⁸Kidie ihwo buebu na, buebu nẹ Ifrem rhe, Manasse, Issaka, kugbe Zẹbulọn, ji phorho oma rẹ aye-en, re ayen ke re ẹwanvrẹn na kirobo re djere-e. Kidie Hẹzikaya nẹ ẹrhovwo kẹ ayen, tanẹ, Ọrovwohwo re esiri na

¹⁹vwo ghovwo kohwo kohwo rọ vwẹ udu rọye ejobi vwọ guọnọ Ọghẹnẹ, Ọrovwohwo na Ọghẹnẹ rẹ esẹ rọye, owenẹ ọ yọnrọn urhi rẹ ẹfuọn rẹ ẹshẹ eyẹ o jovwo.

²⁰Ọrovwohwo de nyo ẹrhovwo ri Hẹzikaya, o de sivwi ihwo na.

²¹Ihwo rẹ Izrẹl re rhe Jerusalẹm rhe re orẹ rẹ ikara ro jephuo na da re orẹ na ẹdẹ ighwrẹ vẹ omavwerhe; re ihwo ri Livae re, irherẹn de jiri Ọrovwohwo nẹ ẹdẹ ra ro ẹdẹ, vwẹ ẹgba rayen so ine kẹ Ọrovwohwo na.

²²Hẹzikaya da ta ota rẹ udu ẹsasọ kẹ ihwo ri Livae re riẹn ẹga rẹ Ọrovwohwo na. Ọtiọye ihwo na da re emu rẹ orẹ na ẹdẹ ighwrẹ soso, ri ze izobo rẹ ufuoma kugbe ẹkpẹvwẹ kẹ Ọrovwohwo Ọghẹnẹ rẹ esẹ rayen.

²³Etiyin ukoko na ejobi da rhọvwe kugbe nẹ ayen rhoma re orẹ na ẹdẹ ighwrẹ efa; ayen da rhoma riọ ẹdẹ ighwrẹ efa vẹ aghọghọ.

²⁴Kidie Hẹzikaya ovie ri Juda vwẹ irhuẹn eshare uriori kugbe igegede uriori ighwrẹ kẹ ukoko na nẹ e vwo ze izobo, isun na da vwẹ irhuẹn eshare uriori kugbe igegede uriori ihwe vwọ kẹ ukoko na. Irherẹn na buebu de phorho oma rẹ ayen.

²⁵Ukoko ri Juda ejobi, kugbe irherẹn na vẹ ihwo ri Livae na, kugbe ukoko na ejobi ri nẹ Izrẹl rhe na, kugbe erhorha ri nẹ otọ rẹ Izrẹl rhe, kugbe erhorha re dia otọ ri Juda, da ghọghọ.

²⁶Etiyin aghọghọ rode da dia vwi Jerusalẹm, kidie nẹ ọke ri Solomọn ọmọ ri Devid ovie rẹ Izrẹl rhe a je mrẹ emu rọ họhọ ọtiọna vwi Jerusalẹmu-u.

²⁷Etiyin irherẹn na vẹ ihwo ri Livae na de vrẹn ayen da nẹ ẹrhovwo kẹ ihwo na, dẹ nyo urhuru rayen, ẹrhovwo rayen de rhi te ẹdia ọfuanfọn rọye vwẹ obo odjuvwu.