Read urhobo 2 Ikun rẹ Ivie 31 Bible Online

2 Ikun rẹ Ivie 31 - urhobo bible

2 Ikun rẹ Ivie 31

¹Asakiephana rẹ ọnana ejobi vwo re nu, ihwo rẹ Izrẹl re hẹ etiyin da yanran kpo irere ri Juda ra guọghọ isunsun na ayen da nyavwe ighriki na ejobi kuotọ ayen de kporo asan ro kpenu na ejobi te otọ kugbe egbada re otọ ri Juda vi Bẹnjamin, kugbe Ifrem vi Manasse, bẹsiẹ rẹ ayen vwọ guọghọ ayen ejobi re. Etiyin ihwo rẹ Izrẹl de rhivwi kpo irere rayen, dohwo dughwẹ rọye.

²Hẹzikaya da ghare irherẹn na phihọ ẹdẹdẹ rẹ ayen kugbe ihwo ri Livae na, oghogharọ, dohwo dako rẹ ẹga rọye, irherẹn na kugbe ihwo ri Livae na, rere ayen vwo ze izobo rẹ ẹtorhẹ kugbe izobo rẹ ufuoma, rere ayen rhe gbe odibo vwẹ anurhoro rẹ erhọn rẹ Ọrovwohwo na kugbe rere ayen kpẹvwẹ re ayen jiro.

³Ovie na ọvo kọye re jẹ arhọghọ ra vwọ ze izobo rẹ ẹtorhẹ na; izobo rẹ ẹtorhẹ re irhiọke te ovwọnvwọn, kugbe izobo rẹ ẹtorhẹ rẹ ẹdidjala, ọtuphro rẹ emeranvwe, kugbe ẹdẹ rẹ orẹ re bruru, kirobo re siro phihọ ọbe rẹ urhi rẹ Ọrovwohwo ua.

⁴O de ji urhi kẹ ihwo re dia Jerusalẹm nẹ ayen toro ẹkẹn ro te ayen kẹ irherẹn na vẹ ihwo ri Livae na, rere ayen siobọ nẹ oma re ayen kẹ urhi rẹ Ọrovwohwo na.

⁵Re ghwe vwo ghwoghwo urhi nana ro asan ejobi nu, ihwo rẹ Izrẹl de toro emu buebu eka rẹ orhọ, udi, evwri, ọnyọn, kugbe ekakọn rẹ udju buebu ayen da je hwa ẹkẹhwe ri kemn kemu buebu.

⁶Ihwo rẹ Izrẹl vi Juda re dia irere ri Juda da je hwa ẹkẹhwe rẹ irhuẹn vẹ igegede, kugbe erọvwo efuanfon re ru fon kẹ Ọrovwohwo Ọghẹnẹ rayen, a da rhe ghwe ayen koko ẹkuẹko.

⁷Vwẹ emeranvwe rerha ayen de rhi do ẹko na koko gbidi a da ghwẹ ayen ejobi koko vwẹ emeranvwe righwrẹ.

⁸Ọke rẹ Hẹzikaya vẹ isun na rhe vwọ mrẹ ẹko na, ayen de bruba kẹ Ọrovwohwo kugbe ihwo rọye Izrẹl.

⁹Hẹzikaya da nọ irherẹn na vẹ ihwo ri Livae na kpahe ẹko na.

¹⁰Azaraya rẹ orherẹn na, ohwo rẹ uwevwi ri Zadọk, da kpahe kẹ, Rhavwọke rẹ ihwo na vwo toro arhọghọ na cha uwevwi rẹ Ọrovwohwo na, avwanre da re evun vọn avwanre da je mrẹ re chekọ; kidie Ọrovwohwo bruphihọ kẹ ihwo rọye, kọye emu nana buebu vwo chekọ na.

¹¹Etiyin Hẹzikaya de ji iji kẹ ayen nẹ ayen so erheri buebu phihọ uwevwi rẹ Ọrovwohwo na; e de ru ayen.

¹²Ayen da vwẹ evun esiri ghwa ekuakua re rori na ejobi rhe, ẹkẹhwe na kugbe erọvwọ re ru fon na ejobi. Onotu rọ vwẹ ẹro te ekuakua na ejobi na ki Konanaya ohwo ri Livae, vi Shimei oniọvo rọye kọye vwọ kpahọ;

¹³Je Jehiel, Azazaya, Nahat, Asahei, Jerimot, Jozabad, Eliẹi, Ismakaya, Mahat, kugbe Benauta kẹ ihwo re vwẹ ẹro te emu keye rha cha Kọnanaya vi Shemei rẹ oniọvo rọye uko. Hẹzikaya ovie kugbe Azaraya rẹ onotu rẹ uwevwi rẹ Ọghẹnẹ keye vwẹ ayen mu.

¹⁴Kọre ọmọ ri Imna ohwo ri Livae, ọrhẹrẹ anurhoro rẹ obaro ọnre, kọye ohwo ro mie ẹkpẹvwẹ re evun esiri rẹ Ọghẹnẹ, kọye ji bru arhọghọ ra sẹro rọye nu kẹ Ọrovwohwo kugbe ekuakua rẹ ma fon re vwo ze izobo.

¹⁵Edẹn, Miniamin, Jẹshua, Shemaiya, kugbe Shẹkenaya ke vwẹ evun esiri vwọ chuko vwẹ irere rẹ irherẹn na, kọye re ghare emuọre na kẹ imoni rayen, te ekpako te imitete rhe, utetemute,

¹⁶jokpa rẹ ayen otu re siphihọ ọbe rẹ uvwiẹ, eshare kẹ ẹgbukpe erha kpenu, kugbe ayen ejobi re rua uwevwi rẹ Ọrovwohwo kirobo rẹ iruo rẹ ẹdẹ ọvuọvo guọnọre, kẹ ẹga rayen otu ọvuọvo, kirobo rẹ ogharọ rayen epha.

¹⁷E si irherẹn na phihọ ọbe nene unuwevwi rẹ esẹ rayen ọvuọvo; ọ rẹ ihwo ri Livae kẹ ikpe uje kpenu kirobo rẹ ako rẹ iruo rayen epha, vwẹ oghogharọ rayen.

¹⁸E si irherẹn na phihọ ọbe vẹ imitete rayen, eya rayen, emeshare rayen, kugbe emetẹ rayen, urogho na ejobi; kidie ayen vwẹ esegbuyota yọnre oma rẹ ayen fuanfon.

¹⁹Vwọ kẹ emọ rẹ Erọn, rẹ orherẹn na, rẹ hẹ obo ogo rẹ ihwo ejobi rẹ irere rayen na, ihwo buebu herọ vwẹ evun rẹ irere na re mu odẹ kẹ nẹ e ghare emuọre kẹ ọshare ọvuọvo vwẹ ohri rẹ irherẹn na kugbe ohwo ọvuọvo vwẹ ohri ri Livae na re siphihọ ọbe.

²⁰Kẹnẹ Hẹzikaya ruru vwi Juda ejobi; o de ru obo re gbare vẹ obo ri yovwiri kugbe esegbuyota vwẹ obọ rẹ Ọrovwohwo Ọghẹnẹ rọye.

²¹Kugbe kiruo kiruo ro ruru vwẹ evun rẹ ẹga rẹ uwevwi rẹ Ọghẹnẹ kirobo rẹ urhi kugbe iji rọye wanre, ọ guọnọ Ọghẹnẹ rọye, ọ vwẹ udu rọye ejobi guọnọ, o de yovwi kẹ.