Read urhobo 2 Ikun rẹ Ivie 32 Bible Online

2 Ikun rẹ Ivie 32 - urhobo bible

2 Ikun rẹ Ivie 32

¹Rẹ imu nana ejobi vwo ru nu kugbe iruo rẹ esegbuyota rọye ejobi Senakarib ovie rẹ Asiria rhere o de rhi phi Juda ọ da rhe hwaphihọ hẹrhẹ irere ra gba ogba phihọ ejobi, ko rhẹro nẹ ọye phi ayen kua kẹ oma rọye.

²Ọke ri Hẹzikaya vwọ mrẹ nẹ Senakarib rhere rọ cha họnre Jerusalẹm,

³Ọ da jẹ iroro ọ vẹ inotu kugbe egba rọye nẹ e bru ọkẹre rẹ uto rọ djẹ nẹ orere kpo otafe na dje; ayen de ghine chuko.

⁴Ihwo buebu da ghwẹ koko gbidi, ayen de ghine bru ito vẹ ugbo re djẹ nẹ orere na kpo otafe rẹ otọ na dje, tanẹ, Kidie nẹrhẹ ovie rẹ Asiria rhe rhe mrẹ ame buebu da?

⁵O de mu iruo phihọ o de rhi fi igbẹhẹ ri kporo she ejobi gbe, ọ da bọn ehẹrhẹ phihọ enu rọye, ọ da rhoma bọn igbẹhẹ ọfa yariẹ ọ rẹsosuọ na, ọ de ru Millo rọ hẹ evun rẹ orere ri Devid na ga kokoroko. Ọ de duvwu ihwunu vẹ ekpọfia vẹ ekuakua rẹ ofovwi buebu.

⁶Ọ phi inotu re kprọ ẹda vwo mu phihọ enu rẹ ihwo na, o de se ayen ejobi koko vwẹ evun rẹ ọsuere na vwẹ asan ughere rẹ orere na ọ da ta udu phihọ ayen awọ, tanẹ,

⁷Wa goma re we yivwaro. Wa djẹ oshọ-ọ we jẹn ofu dje ovwan fiki rẹ ovie rẹ Asiria na-a vẹ urogho ri nenire rhe-e; kidie e ohwo ọvo ro rhonọ vẹ avwanre herọ.

⁸Ugbobọ rẹ ohwo rẹ akpọ vẹ ọye gba herọ; ẹkẹvuọvo Ọrovwohwo Ọghẹnẹ vẹ avwanre gba herọ, re cha avwanre uko ọye ri ji phi ofovwi na kẹ avwanre. Udu rẹ ihwo na da gan fiki re eta ri Hẹzikaya ovie ri Juda.

⁹Rẹ Ọnana vwọ wan nu Senakarib ovie rẹ Asiria, ro phiẹ Lakish vẹ unuofovwi rọye vwẹ ọke yena, de ji idibo rọye kpọ Jerusalẹm bru Hẹzikaya ovie ri Juda kugbe ihwo ri Juda ejobi re hẹ Jerusalẹm, tanẹ,

¹⁰E nẹ Senakarib ovie rẹ Asiria tare, Ono ovwan vwẹ ẹro so, rẹ ovwan vwọ hẹrhẹ ofovwi ri Jerusalẹm?

¹¹Ọ dianẹ Hẹzikaya phiẹ ovwa-an, rere ọ rhe vwẹ owẹvwe vẹ urhuru rẹ ame hwe ovwan, vwẹ ọke rọ vwọ ta kẹ ovwan nẹ, Ọrovwohwo na Ọghẹnẹ rẹ avwanre na se sivwi avwanre nẹ obọ rẹ ovie rẹ Asiria?

¹²Ọ dia Hẹzikaya ọvuọvo re kpare asan ri kpenu rọye kugbe egbada rọye o de ji iji kẹ Juda vi Jerusalẹm, Obaro rẹ agbada ọvo ọye ovwan da ga, vwẹ enu rọye wa da torhẹ izobo?

¹³Wọ riẹn obo re me vẹ ọsẹ mẹ ru kẹ ihwo rẹ etọ efa? Kẹ ẹdjọ rẹ ẹgborho rẹ etọ yena se sivwi etọ yena nẹ abọ mẹ?

¹⁴Kono vwẹ ohri rẹ ẹdjọ rẹ ẹgborho yena rẹ ọsẹ mẹ guọghọre tototo na ri se sivwi ihwo rọye nẹ obọ mẹ, rẹ Ọghẹnẹ wẹn vwo se sivwi uwe nẹ obọ mẹ?

¹⁵Asakiephana wo gbi jẹn Hẹzikaya phiẹn wẹ-ẹ eyẹ o sun we vwẹ idjerhe nana-a, we segbuyota-a, kidie o se vwo ọghẹnẹ rẹ ẹgborho ọvuọvo eyẹrẹ uvie ro se sivwi ihwo rọye nẹ obọ mẹ eyẹ obọ rẹ esẹ mẹ-ẹ? Komavọ ọ dia rẹ Ọghẹnẹ wẹn vwo se sivwi uwe nẹ obọ mẹ?

¹⁶Idibo rọye da ta eta nana kugbe efa buebu kpahe Ọrovwohwo Ọghẹnẹ kugbe odibọ rọye Hẹzikaya.

¹⁷O de si ẹbe ra vwọ vwẹ Ọrovwohwo na Ọghẹnẹ rẹ Izrẹl na jehwẹ ọ ke rha ta eta buebu kpahọ, tanẹ, Kerẹ obo rẹ ẹdjọ rẹ ẹgborho rẹ etọ efa na se sivwi ihwo rayen nẹ obọ mẹ-ẹ na, ọtiọye rhe Ọghẹnẹ ri Hẹzikaya che se sivwi ihwo rọye nẹ obọ mẹ-ẹ.

¹⁸Ayen da van kperi vwẹ ephẹrẹ ri Juda kẹ ihwo ri Jerusalẹm re hẹ enu rẹ igbẹhẹ na, rere ọ djẹ oshọ vọ uguegue mu ayen, rere ayen vwọ mrẹ asan da reyọ orere na.

¹⁹Ayen da ta ota kpahe Ọghẹnẹ ri Jerusalẹm kirobo rẹ ayen ta kpahe ẹdjọ rẹ ihwo efa vwẹ akpọ na, ra vwẹ abọ ma.

²⁰Etiyin Hẹzikaya rẹ ovie na kugbe Aizaya rẹ ọmraro na, ọmọ rẹ Amọz, da nẹ ẹrhovwo fiki rẹ ọnana ayen de kperi se odjuvwu

²¹Ọrovwohwo de ji amakashe ọvo, ọ da nyavwe egba rẹ ofovwi na kugbe isun na vẹ inotu na re hẹ erhọn rẹ ovie rẹ Asiria hwe. Etiyin o de rhivwi vẹ omavovwẹ kpo otọ rẹ obọ rọye. Ọke ro rhi vwo te uwevwi rẹ ẹdjọ rọye re, emọ rọye ẹvo da dia etiyin nyavwọ hwe.

²²Ọtiọye kọye Ọrovwohwo sivwi Hẹzikaya vẹ ihwo re dia Jerusalẹm nẹ obọ ri Senakarib ovie rẹ Asiria ji kugbe obo rẹ ivwighrẹ rọye ejobi; ọ da vwẹ ufuoma kẹ ayen vwi kabọ kabọ.

²³Ihwo buebu da rhe kpẹvwẹ ẹse kẹ Ọrovwohwo vwi Jerusalẹm ayen ke rha phare ọko ghaghare kẹ Hẹzikaya ovie ri Juda, ọtiọye ka kpaẹro kpenu vwẹ ẹro rẹ ẹgborho efa nẹ ọke yena yanran.

²⁴Vwẹ ọke yena Hẹzikaya da rhe mwo ọga ko muegbe rẹ ughwu, ọ da nẹ ẹrhovwo kẹ Ọrovwohwo; o de nyo kẹ ọ da vwẹ oka kẹ.

²⁵Ẹkẹvuọvo Hẹzikaya rha kpẹvwẹ ẹse re ru kẹ na-a, kidie eheri da rhe vọn udu rọye. Fiki rẹ ọtiọye na ophu da rhe dia uyovwi rọye kugbe Juda vi Jerusalẹm.

²⁶Ẹkẹvuọvo Hẹzikaya da rhe vwẹ oma rọye kpotọ fiki rẹ eheri rọ udu rọye, re ọye vẹ ihwo re dia Jerusalẹm, vwẹ ọtiọye na ophu rẹ Ọrovwohwo na gbi bru ayen rhe vwẹ ẹdẹ rẹ akpọ ri Hẹzikaya-a.

²⁷Hẹzikaya feri gangan ọ ke je mrẹ ọghọ; o de koko efe rẹ idọnọ, oro, kugbe eragha eghaghare, egẹn, ekpọfia, kugbe ekuakua efa re ghaghare;

²⁸iwevwi re de wuye eka, udi, vẹ evwri; kugbe erhu re churẹ irhuẹn, vẹ igegede phihọ.

²⁹Ọ da je bọn irere kẹ oma rọye, kugbe igegede vẹ uchuru buebu; kidie Ọghẹnẹ kẹrẹ eyenre buebu.

³⁰Ji Hẹzikaya ọvuọvo nana ri gbe ugbon ri Gihọn rọ va kpo obenu na ọ da kpọ ọkẹre rọye kpo obuko ọnre vwẹ orere ri Devid na. Iruo ri Hẹzekaya ruru ejobi de yovwi kẹ.

³¹Vwọ kpahe ota rẹ ihwo rẹ ovie ri Babilọn ji rhe, ne rhe guọnọ otọ rẹ oka rọ cha phia vwẹ otọ na, Ọghẹnẹ da yan jovwo kẹ oma rọye; rere ọ vwọ davwọ ni rọ vwọ riẹn obo re hẹ udu rọye.

³²Asakiephana uruemu vẹ eyenre ri Hẹzikaya ro chekọ, vẹ uruemu esiri rọye, nighe, e si ayen phihọ ọbe rẹ emramrẹ rẹ Aizaya ọmraro na ọmọ rẹ Amọz, vwẹ Ọbe rẹ Ivie ri Juda vẹ Izrẹl.

³³Hẹzikaya da vwerhẹ kugbe esẹ rọye, ayen de sho phihọ asan ubiugbenu rẹ ishi rẹ emọ ri Devid; Juda ejobi kugbe ihwo re dia Jerusalẹm de bru ọghọ phihọ oma vwẹ ughwu rọye na. Manasse rẹ ọmọ rọye da re vwẹ ẹdia rọye.