Read urhobo 2 Ikun rẹ Ivie 33 Bible Online

2 Ikun rẹ Ivie 33 - urhobo bible

2 Ikun rẹ Ivie 33

¹Manasse ikpe ihwivẹ o teri vwẹ ọke ro vwo muphihọ ẹriọ, ọ da re ikpe ujuvẹ gbe ihwiori vwi Jerusalẹm.

²O de ru obo re brare vwẹ obaro rẹ Ọrovwohwo na, kerẹ uruemu rẹ ẹgua rẹ ẹgborho na ruru rẹ Ọrovwohwo djẹ nẹ obaro rẹ ihwo rẹ Izrẹl na.

³Kidie ọ rhoma bọn asan ri kpenu rẹ ọsẹ rọye Hẹzekaya kporo she jovwo, ọ da so egbada kẹ Baal, o de kuere oghriki, ọ da gọ ekuakua rẹ obo odjuvwu ejobi, ọ da ga ayen.

⁴Ọ da so egbada phihọ evun rẹ uwevwi rẹ Ọrovwohwo na, rẹ Ọrovwohwo ta kpahe nẹ, Jerusalẹm ọye odẹ mẹ dia bẹdẹ.

⁵Ọ da so egbada kẹ ekuakua rẹ obo odjuvwu na vwẹ evun rẹ eguan ivẹ rẹ uwevwi rẹ Ọrovwohwo na.

⁶Ọ da torhẹ emọ rọye vwo ze izobo vwẹ evun rẹ iyara rẹ emọ ri Hinnọm, ayen ke mraro, ghwere isẹ bọ epha, ki nene irivwi vẹ erieda ta ota. O ru emu imiomiovwi buebu vwẹ obaro rẹ Ọrovwohwo, re kpaerọ ophu.

⁷Oma rẹ kare na o de muo phihọ uwevwi rẹ Ọghẹnẹ na, rẹ Ọghẹnẹ ta kẹ Devid kugbe Solomọn rẹ ọmọ rọye, Vwẹ uwevwi nana, kugbe evun ri Jerusalẹm, re me jẹreyọ vwẹ orua rẹ Izrẹl ejobi na, ọye mi phi odẹ mẹ phihọ bẹdẹ;

⁸mi gbi rhe ghwie owọ rẹ Izrẹl nẹ otọ na ra vwọ ghare esẹ rayen ughwẹ na-a, ọ da dianẹ ayen vwẹ oma kpotọ, ru emu ejobi ri mi ji iji rọye kẹ ayen na, urhi na ejobi, iji na, kugbe uruemu na ejobi re me wan oma ri Mosis vwọ kẹ ayen na.

⁹Manasse da riẹriẹ Juda vẹ ihwo re dia Jerusalẹm, ọ da nẹrhẹ ayen ru umwemwu nọ ẹgborho rẹ Ọrovwohwo guọghọ nu kẹ ihwo rẹ Izrẹl dia.

¹⁰Ọrovwohwo da ta ota kẹ Manasse kugbe ihwo rọye, ẹkẹvuọvo ayen davwerhọ-ọn.

¹¹Fiki rẹ ọtiọye na Ọrovwohwo da reyọ inotu rẹ unuofovwi rẹ Asiria ri vwo phi ayen, o mu Manasse a da vwẹ oghọre sa a da ghwẹ igoni rẹ ẹrovwo phihọ abọ e de muo kpo Babilọn.

¹²Ọke rẹ oma vwọ djarhọ re kọ guọnọ aroesiri rẹ Ọrovwohwo Ọghẹnẹ rọye ọ da vwẹ oma rọye kpotọ gangan kẹ Ọghẹnẹ rẹ esẹ rọye.

¹³Ọ da nẹ ẹrhovwo kẹ, Ọghẹnẹ de nyo orẹ rọye kugbe oyare rọye ọ da rhoma reyọ vwo rhe uvie rọye vwi Jerusalẹm. Etiyin Manasse ke riẹn nẹ Ọrovwohwo ọye Ọghẹnẹ.

¹⁴Ukuko rọye ọ da rhoma bọn igbẹhẹ ọfa riariẹ Phihọ obo otafe rẹ igbẹhẹ rẹ orere ri Devid vwẹ obuko ọnre ri Gihọn, vwẹ evun rẹ iyara na, re duvwu ughere vwẹ asan Anurhoro rẹ Eri, a da vwọ riariẹ Ofẹi, a da ma kpenu gogorogo; o de ji phi inotu rẹ ofovwi phihọ irere ri Juda ra gba ogba riariẹ na.

¹⁵Ọ da kpare ẹdjọ erhorha na kugbe oma kufia nẹ evun rẹ uwevwi rẹ Ọrovwohwo na, kugbe egbada rọ so phihọ ugbenu rẹ uwevwi rẹ Ọrovwohwo na vwi Jerusalẹm, ọ da kpare ayen kufia nẹ evun rẹ orere na.

¹⁶Ọ da rhuẹrẹ agbada rẹ Ọrovwohwo na o de ze izobo rẹ ufuoma vẹ ẹkpẹvwẹ vwẹ etiyin; o de ji iji kẹ Juda nẹ ọ ga Ọrovwohwo Ọghẹnẹ rẹ Izrẹl.

¹⁷Dede na yẹ ihwo na ji ji ze izobo vwẹ asan ro kpenu na, ẹkẹvuọvo kẹ Ọrovwohwo ọvo Ọghẹnẹ rayen.

¹⁸Asakiephana eyenre ri Manasse ro chekọ, kugbe ẹrhovwo rọ nẹ kẹ Ọghẹnẹ rọye, kugbe eta rẹ emraro ra ta kẹ vwẹ odẹ rẹ Ọrovwohwo Ọghẹnẹ rẹ Izrẹl, nighe, e si ayen phihọ Ọbe rẹ Ikun rẹ Ivie rẹ Izrẹl.

¹⁹Te ẹrhovwo rọye, kugbe obo re Ọghẹnẹ reyọ orẹ rọye, re imwemwu rọye re ijesegbuyota rọye, kugbe asan rọ bọn asan ri kpenu na phihọ vẹ asan ra vwẹ ighriki na vi phihọ kugbe ema na tavwe rọ ke rhe vwẹ oma kpotọ, nighe, e si ayen phihọ Ọbe rẹ Ikun rẹ Emraro na.

²⁰Ọtiọye Manasse da vwerhẹ kugbe esẹ rọye, ayen de sho phihọ uwevwi rọye Amọn rẹ ọmọ rọye da re vwẹ ẹdia rọye.

²¹Amọn da dia ikpe uje gbe ivẹ ọ ghwanre te vwẹ ọke ro mu ẹriọ phihọ, o da re ikpe ive vwi Jerusalẹm.

²²O de ru obo re brare vwẹ obaro rẹ Ọrovwohwo, kirobo ri Manasse ọsẹ rọye ruru. Amọn de ze izobo kẹ ẹdjọ ejobi rẹ ọsẹ rọye kare, ọ da ga ayen.

²³Ọ rha vwẹ oma rọye kpotọ kẹ Ọrovwohwo-o, kirobo ri Manasse ọsẹ rọye vwẹ oma kpotọ, ẹkẹvuọvo Amọn nana da re abe rhurhu abe.

²⁴Idibo rọye da ta phihọ ayen de hwe vwẹ uwevwi rọye.

²⁵Ẹkẹvuọvo ihwo rẹ otọ na da teye ihwo re ta Ovie Amọn phihọ na hwẹ; ihwo re otọ na da vwẹ Josaya ọmọ rọye ma ovie vwẹ ẹdia rọye.