Read urhobo 2 Ikun rẹ Ivie 34 Bible Online

2 Ikun rẹ Ivie 34 - urhobo bible

2 Ikun rẹ Ivie 34

¹Josaya ikpe ẹrenre ọke ro vwo mu phihọ ẹriọ, ọ da re ikpe ọgban gbe ọvo vwi Jerusalẹm.

²O de ru obo ri yoma vwẹ obaro rẹ Ọrovwohwo, ọ da yan nene idjerhe ri Devid ọsẹ rọye; ọ rhẹriẹ oma kpo obọrhe eyẹ obohwẹre-e.

³Kidie vwẹ ikpe ẹrenre rẹ ẹriọ rọye, yọ je hẹ omotete na, ọ da guọnọ Ọghẹnẹ ri Devid ọsẹ rọye; vwẹ ikpe ihwivẹ rẹ ẹriọ rọye ọ da guọghọ asan ri kpenu ejobi, ighriki na, re hẹ Juda vi Jerusalẹm, kugbe ema re bru ena phihọ kugbe i re kuru.

⁴Ayen de kporo egbada ri Baal na she vwẹ irharo rọye; o de she egbada re insẹns re hẹ obenu rẹ ayen shẹ; ọ da nyavwe ighriki rẹ ayen ibribro, ọ da guọghọ ema re bru ena phihọ na kugbe i re kuru na riẹriẹriẹ, ọ nọ ayen vworovworo nu ọ da hrahra iwurhie rayen phihọ enu re ishi rẹ ihwo ri ze izobo ke ayen.

⁵Ọ da je torhẹ ibeku rẹ irherẹn na vwẹ enu rẹ egbada rayen, o de hwerhe Juda vi Jerusalẹm.

⁶Vwẹ evun rẹ irere ri Manasse, Ifrem, kugbe Simiọn, kugbe rhiri re te Naftali, vwẹ evun rẹ erhurhu re yariẹ ayen phihọ,

⁷o de kporo egbada na, ọ da nọ ighriki vẹ ema na vworovworo, o de she egbada rẹ insẹns teye otọ vwẹ otọ rẹ Izrẹl ejobi. Etiyin o de rhivwi kpo Jerusalẹm.

⁸Asakiephana vwẹ ikpe rihwe gbẹ ẹrenre rẹ ẹriọ rọye, ọke ro vwo hwerhe otọ na vẹ uwevwi na nu, o de ji Shafan ọmọ rẹ Azalaya, kugbe Maaseiya osun rẹ orere na, kugbe Joah ọmọ ri Joahaz, rẹ okeri na, nọ rhuẹrẹ uwevwi rẹ Ọrovwohwo Ọghẹnẹ rọye na.

⁹Ayen de bru Hiikaya rẹ olori rẹ izobo ro kpenu rhe ayen da ghwẹ igho ra ghwẹ rhe uwevwi rẹ Ọghẹnẹ na, rẹ ihwo ri Livae, ihwo re hẹrhẹ anurhoro na, re ayen toro mie Manasse vẹ Ifrem kugbe umukn rẹ ihwo rẹ Izrẹl ri chekọ ji nẹ Juda ejobi vi Bẹnjamin ji kugbe ihwo re dia Jerusalẹm.

¹⁰Ayen da ghwẹ ayen kẹ otu ri ruẹ iruo re vwẹ ẹro te uwevwi rẹ Ọrovwohwo na; kugbe iruiruo ri ruẹ iruo vwẹ evun rẹ uwevwi rẹ Ọrovwohwo na a da vwọ kẹ ayen ra vwọ rhuẹrẹ uwevwi na phihọ obo rọ epha jovwo.

¹¹A da vwẹ ayen kẹ ewena vẹ ebọn ebabọn re ayen vwo dẹ eragha re sheri, kugbe irhe re vwo ru igo kugbe egbẹn rẹ uwevwi rẹ ovie ri Juda fọkẹ nẹ ọ guọghọ kufia.

¹²Ihwo na da fon evun ru iruo na. A da vwi Jahat vẹ Obadaya ri Livae na mu phihọ enu rẹ ayen, vwẹ usun rẹ emọ ri Mẹrari, vi Zẹkaraya vi Meshullam, vwẹ usun rẹ emọ ri Kohat, re ayen sun iruo na. Ihwo ri Livae na, ayen ejobi re riẹn ona rẹ ihwehworo,

¹³da hẹ enu rẹ ihwo re ghwa oghwa ayen da vwẹ ẹro te okoka rẹ iruo re ruẹ vwẹ etiyin; evo rẹ ihwo ri Livae na kẹ isiẹbe, iruiruo, kugbe ihwo re hẹrhẹ unurhoro.

¹⁴Ọke rẹ ayen vwọ ghwẹ igho ra ghwa rhe uwevwi rẹ Ọrovwohwo na cha, Hilkaya rẹ orherẹn na da mrẹ ọbe rẹ urhi rọ Ọrovwohwo na ri Mosis siri,

¹⁵Etiyin Jilkaya da ra kẹ Shafan osiọbe na, Me mrẹ ọbe rẹ urhi na vwẹ uwevwi rẹ Ọrovwohwo na; Hilkaya da vwẹ ọbe na kẹ Shafan.

¹⁶Shafan da vwẹ ọbe na kẹ ovie na, ọ da nẹ iyẹnrẹn kẹ ovie na, Emu ejobi re phi phihọ idibo wẹn obọ rẹ ayen ruẹ.

¹⁷Ayen ku igho na ejobi ra mrẹre vwẹ uwevwi rẹ Ọrovwohwo na phihọ otọ a da ghwẹ ayen phihọ obọ rẹ ihwo ri suẹn iruiruo na.

¹⁸Etiyin Shafan osiọbe na da ta kẹ ovie, Hilkaya rẹ orherẹn na vwẹ ọbe kẹ vwẹ. Shafan de se ọbe na kẹ ovie na.

¹⁹Ọke rẹ ovie na vwo nyo eta rẹ urhi na ọ da bẹrc emwa rọye.

²⁰Ovie na de ji iji ki Hilkaya, Ahikam, ọmọ ri Shafan, Abdọn ọmọ ri Mika, Shafan osiọbe na, kugbe Asaiya odibo rẹ ovie, tanẹ,

²¹Yanran, re duotọ rẹ emu nana vwẹ obọ rẹ Ọrovwohwo kẹ vwẹ ji kugbe ayen ihwo ri chekọ vwẹ Izrẹl vi Juda, kpahe eta rẹ ọbe nana ra mrẹre na; kidie ophu rẹ Ọrovwohwo na pha tuatua kpahe avwanre, fikiridie esẹ rẹ avwanre yọnre eta rẹ Ọrovwohwo na-a, ayen ruru kirobo re si phihọ ọbe nana-a.

²²Etiyin Kilkaya kugbe ihwo rẹ ovie ji ba de bru Hulda ọmraro rẹ aye, aye ri Shallum ọmọ ri Tokhar, ọmọ ri Hasra, ohwo rọ sẹro rẹ iwun (Asakiephana ki Jerusalẹm ọ dia vwẹ Urhuvwu Rivẹ) ọ da nẹ iyẹnrẹn na kẹ.

²³Ọ da ta kẹ ayen, Enẹ Ọrovwohwo tare, Ọghẹnẹ rẹ Izrẹl; Ta kẹ ohwo ro ji we bru vwe na.

²⁴Enẹ Ọrovwohwo tare, Nighe, Me cha vwẹ okpetu rhe etinẹ kugbe ihwo re dia evun rọye, iyori ejobi re duvwu phihọ ọbe re se kẹ ovie ri Juda.

²⁵Fikiridie ayen sen vwẹ ayen torhẹ insẹns kẹ ẹdjọ rere ayen vwọ kpare ovwẹ ophu fiki rẹ iruo rẹ obọ rayen, fiki rẹ ọtiọye na ki mi che ku ophu mẹ phihọ etinẹ na yẹ a gbe mrẹ ohwo ro fue-e

²⁶Ẹkẹvuọvo vwọ kẹ ovie ri Juda, ro ji we rhi duotọ rẹ Ọnana vwẹ obọ rẹ Ọrovwohwo na, e nẹ kọye wọ ta kẹ, E nẹ Ọrovwohwo tare, Ọghẹnẹ rẹ Izrẹl na; Vwọ kpahe eta ru wo nyori na,

²⁷fiki rẹ obo rẹ udu wẹn vwo kurhẹriẹ wọ da vwẹ oma kpotọ kẹ Ọghẹnẹ wo vwo nyo eta ra ta kpahe etinẹ na vẹ ihwo re dia na, wọ da vwẹ oma kpotọ kẹ vwẹ, wọ da bẹrẹ emwa wẹn wọ da viẹ kẹ vwẹ mrẹ na, ki mi nyo we rhe, eriyin Ọrovwohwo tare.

²⁸Nighe, me cha ghwẹ wẹ hẹnrẹhẹnrẹ vwo bru esẹ wẹn, ke mu we kpo ushi wẹn, vwẹ ufuoma, ẹro wẹn rha cha mrẹ okpetn re me cha vwọ rhe etinẹ na kugbe ihwo re dia na-a. Ayen da vwẹ iyẹnrẹn rhe ovie na.

²⁹Etiyin Ovie de ji ikọn re se ekpako ri Juda vi Jerusalẹm koko.

³⁰Ovie na de kpo uwevwi rẹ Ọrovwohwo na, ọ vẹ ihwo ri Juda kugbe ihwo re dia Jerusalẹm kugbe irherẹn na vẹ ihwo ri Livae, ihwo na ejobi te ekpako te imitete; o de se eta rẹ ọbe rẹ ọphọ na ra mrẹre vwẹ uwevwi rẹ Ọrovwohwo na.

³¹Ovie na de mudia asan rọye ọ da re ọphọ vwẹ obaro rẹ Ọrovwohwo, rọ yan nene Ọrovwohwo rere ọ yọnre irhi rọye na vẹ iseri rọye vẹ iji rọye, vẹ udu rọye ejobi vẹ erhi rọye, rere o ru obo re hẹ evun re ọphọ na re si phihọ evun rẹ ọbe na.

³²Etiyin ọ da vwẹ ihwo ri Jerusalẹm vi Juda mudia. Ihwo re dia Jerusalẹm de ru kirobo rẹ ọphọ rẹ Ọghẹnẹ na tare, Ọghẹnẹ rẹ ọsẹ rayen.

³³Josaya de si ekuakua rẹ ẹgua re hẹ ubrotọ na ejobi rẹ ihwo rẹ Izrẹl vwori, o de ru ayen ihwo re dia Izrẹl ejobi nẹ e ga Ọrovwohwo. Vwẹ ọke rọye ejobi na ayen chuko ku Ọrovwohwo Ọghẹnẹ rẹ esẹ raye-en.