Read urhobo 2 Ikun rẹ Ivie 35 Bible Online

2 Ikun rẹ Ivie 35 - urhobo bible

2 Ikun rẹ Ivie 35

¹Josaya da re orẹ rẹ ẹwanvrẹn kẹ Ọrovwohwo vwi Jerusalẹm; ayen de hwe omogegede rẹ ẹwanvrẹn vwẹ ẹdẹ ihwẹne rẹ emeranvwe rẹsosuọ na.

²Ọ da ghare irherẹn na phihọ ẹkuẹko rẹ iruo rayen o de bru ayen uche nẹ ayen vwẹ ẹro te ẹga rẹ uwevwi rẹ Ọrovwohwo na.

³Ọ da ta kẹ ihwo ri Livae ri yono ihwo rẹ Izrẹl ejobi re je fon kẹ Ọrovwohwo na, phi ekpeti ọfuanfon na phihọ uwevwi ri Solomọn ọmọ ri Devid, ovie rẹ Izrẹl, bọnre; wo gbi rhe mu oghwa rọye kpahe igabọ wẹn ọfa-a. Asakiephana gba ga Ọrovwohwo Ọghẹnẹ wẹn kugbe ihwo rọye Izrẹl.

⁴Rhuẹrẹ oma wẹn kirobo rẹ ogharọ rẹ uwevwi rẹ esẹ rẹ ovwan epha, nene obo ri Devid ovie rẹ Izrẹl djeri kugbe idjedje ri Solomọn ọmọ rọye.

⁵Rere we mudia phihọ asan ọfuanfọn na kirobo rẹ ẹkuẹko rẹ uwevwi rẹ esẹ na epha vẹ imoni wẹn re ihwo diodi na, rere kẹ abọvo rẹ uwevwi rẹ esẹ ọvuọvo a me vwẹ ihwo ri Livae ọvo mu kẹ.

⁶Re we hwe ẹwanvrẹn na, we phorho oma rẹ ovwan, rere wa jẹ choma hẹrhẹ imoni rẹ ovwan, rere we ru kirobo rẹ Ọrovwohwo wan unu ri Mosis ta.

⁷Etiyin Josaya da gba arhọghọ kẹ ihwo diodi na, ekuakua re vwo ze izobo rẹ ẹwanvrẹn na kẹ ihwo rẹ etiyin, imigegede ẹmẹvwe nẹ ohri rẹ uchuru na rhe ro bu te uriori ọgban soso, kugbe irhuẹn eshare uriori erha;. ekuakua rẹ ovie na enana nurhe.

⁸Isun na de rhie evun toro kẹ ihwo na, irherẹn na, kugbe ihwo ri Livae na. Hiikaya, Zẹkaraya, kugbe Jẹhiel, inotu rẹ uwevwi rẹ Ọghẹnẹ, da ghwẹ kẹ irherẹn re vwo ze izobo rẹ ẹwanvrẹn na igegede kugbe ẹmẹvwe uriori ivẹ kugbe ujori esan kugbe irhuẹn eshare ujori erha.

⁹Konaya rhe, kugbe Shemaiya kugbe Netanẹl rẹ iniọvo rọye, kugbe Hashabia vi Jeiẹl vi, Jozabad, ehọnvwọre ri Livae na, da kẹ ihwo ri Livae nẹ ayen vwọ re orẹ rẹ ẹwanvrẹn na igegede vẹ ẹvwe uriori iyori kugbe irhuẹn eshare ujori iyori.

¹⁰Ọke rẹ ayen vwọ choma hẹrhẹ ẹga na ejobi nu, irherẹn na de mudia phihọ ẹdia rayen, ihwo ri Livae na de mudia phihọ ẹkuẹko ra ghare ayen phihọ kirobo rẹ ovie ji iji kẹ ayen.

¹¹Ayen de hwe omogodẹ rẹ ẹwanvrẹn na, irherẹn na da fẹnrẹn ọbara ro hwẹ no rhe ku, yẹ ihwo ri Livae na bọrọn ophiẹ rẹ eranvwe na.

¹²Ayen de phi izobo rẹ ẹtorhẹ na phihọ akakọ rere a mrẹ asan ghare ayen nene uwuwevwi rẹ esẹ rẹ ihwo diodi na, re ayen ze kẹ Ọrovwohwo, kirobo re siro phihọ ọbe ri Mosis. Ọtiọye ayen ji ru kẹ irhuẹn eshare na.

¹³Ayen da vwẹ omogodẹ rẹ ẹwanvrẹn na tọn erhanre kirobo re iji rọye wanre; ayen de chere izobo efuanfon na vwẹ itaso, ibrochẹ, kugbe evwẹrẹ rẹ usin, e de mu ayen kpata kpata rhe ihwo diodi na.

¹⁴Kẹsiẹye ayen ki rhi chere kẹ oma rẹ ayen kugbe irherẹn na, fikiridie irherẹn na emọ rẹ Erọn na ra wian owian ze izobo rẹ ẹtorhẹ na kugbe ekuakua rẹ ivwri rọye rhiri re te ason; ọtiọye na ihwo ri Livae na chere emu kẹ oma rẹ ayen ji kugbe irherẹn na emọ rẹ Erọn na.

¹⁵Ibuine na, emọ rẹ Asaf, e nabọ hẹ asan rayen kirobo re iji ri Devid epha, kugbe Asaf, vi Hẹman, vi Jedutun rẹ ọmraro rẹ ovie; ihwo re hẹrhẹ anurhoro na dohwo danurhoro rọye epha; o rhe fo rere ayen vrẹn jẹ ako rẹ iruo rayen vwo-o, kidie imoni rayen ihwo ri Livae na choma kẹ ayen.

¹⁶Etiyin ayen da choma hẹrhẹ ẹga rẹ Ọrovwohwo vwẹ ẹdẹ yena, re ayen vwọ re orẹ rẹ ẹwanvrẹn na re ayen ze izobo ẹtorhẹ vwẹ agbada rẹ Ọrovwohwo na, kerẹ iji rẹ Ovie Josaya ji kẹ ayen.

¹⁷Ihwo rẹ Izrẹl re hẹ etiyin da re orẹ rẹ ẹwanvrẹn na vwẹ ọke yena, kugbe orẹ rẹ ikara ro jephuo ẹdẹ ighwrẹ.

¹⁸A je re orẹ rẹ ẹwanvrẹn kerẹ ọtiọye vwẹ Izrẹl na nẹ ọke ri Samuẹl ọmraro rhi te nonẹ-ẹ; o vwo ovie rẹ Izrẹl rọ re orẹ rẹ ẹwanvrẹn tie ọ ri Josaya ruru-u, te irherẹn te ihwo ri Livae, kugbe Juda ejobi vẹ Izrẹl rẹ etiyin, kugbe ihwo re dia Jerusalẹm.

¹⁹A re orẹ nana vwẹ ikpe rihwe gbẹ ẹrenre rẹ ẹriọ ri Josaya.

²⁰Rẹ enana ejobi vwọ wan nu, ri Josaya vwọ rhuẹrẹ uwevwi na nu, Niko ovie rẹ Ijipt da yanran ra họnre Kikamish vwẹ obo urhie ri Yufretis Josaya da ra vwa.

²¹Ẹkẹvuọvo o de ji ikọn bro tanẹ, Die avwanre mrẹ oma ru kugbe, wẹ ovie ri Juda? Ọ dia owẹ mi brẹ cha nonẹ na rẹ, ẹkẹvuọvo uwevwi ro so vwẹ ọye me vẹ ọye gbe phiẹ ofovwi; Ọghẹnẹ kọye ri ji iji kẹ vwẹ nẹ mi jọ phẹre Wọ rhe muẹ kpahe Ọghẹnẹ-ẹ, rọ vẹ ovwẹ herọ na, me da rha guọghọ owẹ.

²²Dede na Josaya rha kerhọn ro de rhivwi-i, ẹkẹvuọvo o de wene oma rere ọ vwọ mrẹ asan họnrọ. Ọ rha kerhọn rẹ eta ri Niko-o ri nẹ unu rẹ Ọghẹnẹ rhe, ẹkẹvuọvo ọ vẹ ọye de re mu ofovwi na chivwi vwẹ uphẹphẹ ri Megiddo.

²³Itu re sa umurhabọ ri ikpoi na da sa Ovie Josaya; ovie da ta kẹ idibo rọye, mu vwe yanran, kidie a wan vwẹ oma gangan.

²⁴Etiyin idibo rọye de muo nẹ ekpẹrẹ rẹ ofovwi rọye ayen de muo phihọ ọrivẹ ayen da gua kpo Jerusalẹm. O de ghwu, e de sho phihọ ishi rẹ esẹ rọye. Juda ejobi kugbe Jerusalẹm de vwere Josaya.

²⁵Jerimaya da je viẹ kẹ Josaya; re eshare re sua ine te eya re sua ine de roro ine vwo so Josaya rhi te nonẹ na. Ayen de ji iji nana vwẹ Izrẹl; nighe, e si ayen phihọ ọbe rẹ ovie.

²⁶Asakiephana eyenrẹn vẹ uruemu ri Josaya, vẹ uruemu esiri rọye kirobo re siro phihọ urhi rẹ Ọrovwohwo na,

²⁷uruemu rọye, nẹ ẹsosuọ rhi te oba, nighe, e si ayen phihọ Ọbe rẹ Ivie rẹ Izrẹl vi Juda.