Read urhobo 2 Ikun rẹ Ivie 36 Bible Online

2 Ikun rẹ Ivie 36 - urhobo bible

2 Ikun rẹ Ivie 36

¹Ihwo rẹ otọ na da reyọ Jehoahaz ọmọ ri Josaya ayen da vwọ ma ovie phihọ ẹdia rẹ ọsẹ rọye vwi Jerusalẹm.

²Jehoahaz da dia ikpe uje gbe erha ọ ghwanre te ọke ro vwo mu ẹriọ phihọ, ọ da re emeranvwe erha vwi Jerusalẹm.

³Etiyin ovie rẹ Ijipt de sionẹ ovie vwi Jerusalẹm o de bru osa taiẹnt rẹ idọnọ ujori kẹ otọ na nẹ ọ hwa kugbe talẹnt rẹ oro.

⁴Ovie rẹ Ijipt da vwẹ Eliakim oniọvo rọye ma ovie phihọ enu ri Juda kugbe Jerusalẹm, o de wene odẹ rọye kpo Jehoyakim; ẹkẹvuọvo Niko da reyọ Jehoahaz oniọvo rọye o de muo kpo Ijipt.

⁵Jehoyakim da dia ikpe uje gbe iyori ọ ghwanre te ọke ro vwo mu phihọ ẹriọ, ọ da re ikpe uhwọvo vwi Jerusalẹm. O de ru obo re brare vwẹ obaro rẹ Ọrovwohwo Ọghẹnẹ rọye.

⁶Nẹbukadreza ovie ri Babilọn de rhi phio, ọ da vwẹ ufi gba o de muo kpo Babilọn

⁷Nẹbukadreza de ji mu abọvo rẹ ekuakua rẹ uwevwi rẹ Ọrovwohwo kpo Babilọn o da kua ayen phihọ ighẹn rọye vwi Babilọn.

⁸Asakiephana eyenre ri Jehoyakim ri chekọ, kugbe ẹgua ro ruru, kugbe obo ra mrẹ keri ba obọ, nighe e si ayen phihọ Ọbe rẹ Ivie rẹ Izrẹl vi Juda; Jehoyachin ọmọ rọye da re vwẹ ẹdia rọye.

⁹Jehoyachin da dia ikpe ẹrẹnre ọ ghwanre te ọke ro vwo mu ẹriọ phihọ, ọ da re emeranvwe erha kugbe ẹdẹ ihwe vwi Jerusalẹm. Ọ de ru obo re brare vwẹ obaro rẹ Ọrovwohwo.

¹⁰Vwẹ ọke evwru vwẹ ukpe yena Ovie Nẹbukadreza de ji ikọn re muo kpo Babilọn, vẹ ekuakua eghaghare re uwevwi rẹ Ọrovwohwo na, o da vwi Zedikaya mu ovie vwẹ enu ri Juda Jerusalẹm.

¹¹Zẹdikaya da dia ikpe uje gbe ọvo ọ ghwanre te vwẹ ọke rọ vwọ re, ọ da re ikpe uhwọvo vwi Jerusalẹm.

¹²O de ru obo re brare vwẹ obaro rẹ Ọrovwohwo Ọghẹnẹ rọye. Ọ vwẹ oma kpotọ kẹ Jẹrimaya ọmraro na-a, rọ ta ota nẹ unu rẹ Ọrovwohwo cha vwọ kẹ.

¹³Ọ se mukpahe Ovie Nẹbukadreza, rọ nẹrhẹ vwẹ odẹ rẹ Ọghẹnẹ duvwu iyori; o de ohọre rọye ghaghagha o de ru udu kpohro kẹ Ọrovwohwo, Ọghẹnẹ rẹ Izrẹl.

¹⁴Irherẹn ride na ejobi kugbe ihwo na rhe vwo esegbuyota-a, ayen de nene ẹgua rẹ ẹgborho na, ayen de gbe uwevwi rẹ Ọrovwohwo ro ru fon vwi Jerusalẹm ẹgua.

¹⁵Ọrovwohwo na, Ọghẹnẹ rẹ esẹ rayen, de ji ikọn ejobi bru ayen, fikiridie ọ re ehrọre rẹ ihwo rọye kugbe asan rọ dia.

¹⁶ẹkẹvuọvo kẹ ayen vwẹ ikọn rẹ Ọghẹnẹ na vwo jehwẹ, ayen mi ni ota rọye saka, ayen mi mienu phihọ emmro rọye, bẹsiẹ rẹ ophu rẹ Ọrovwohwo rhe vwọ tua kpahe ihwo rọye, bẹsiẹ ra gbe mrẹ obo re sa hẹrhẹ ophu rọye-e.

¹⁷Fiki rẹ ọtiọye na ọ da reyọ ovie ri Kaldia rhe vwọ so ayen, rọ vwẹ oda nyavwe imighene rayen hwe vwẹ evun rẹ ẹshẹ rayen, o rhe nẹ arodọvwẹ kẹ imighene na-a emeshare eyẹ emetobẹ, ekpako eyẹ emare; o de phi ayen ejobi phihọ obọ rọye.

¹⁸Ekuakna rẹ uwevwi rẹ Ọghẹnẹ ejobi, te otete te ọrode, efe eghaghare rẹ uwevwi rẹ Ọrovwohwo na, kugbe efe rẹ uwevwi rẹ ovie kugbe isun na ejobi, enana ejobi eyẹ ọ kua kpo Babilọn.

¹⁹Ayen da torhẹ uwevwi rẹ Ọghẹnẹ, ayen de kporo igbẹhẹ ri Jerusalẹm te otọ, ayen da vwẹ erhanre torhẹ ighẹn rọye ejobi, ọ da guọghọ ekuakua esiri rọye ejobi.

²⁰Ihwo re vabọ rẹ oda ejobi o de mu ayen kpo Babilọn, ayen da rhe dia eviẹn kẹ vẹ emọ rọye bẹsiẹ uvie ri Pẹsha rhe vwo ghwotọ,

²¹rere ota rẹ Ọrovwohwo wan unu ri Jẹrimaya ta vwọ sẹ, bẹsiẹ rẹ otọ na cha vwọ ghọghọ vwẹ edidjana rọye. Uche ẹdẹ ejobi ra kua no krite ọye ayen yọnrọn edidjana na te, bẹsiẹ rẹ ikpe ujorha gbẹ ihwe vwọ gba.

²²Asakiephana vwẹ ukpe rẹsosuo ri Sairọs ovie ri Pẹsha, ota rẹ Ọrovwohwo ro wan unu ri Jẹrimaya ta vwọ sẹ, Ọrovwohwo da kpare erhi ri Sairọs ovie ri Pẹsha vwo ghwoghwo aghwoghwo wan uvie rọye ejobi duvwu o de ji sio phihọ otọ;

²³E nẹ Saerọs ovie ri Pẹsha tare, Ọrovwohwo na, Ọghẹnẹ rẹ odjuvwu, vwe uvie rẹ akpọ na ejobi kẹ vwẹ, ọ da vuẹ nẹ me bọn uwevwi kẹ vwi Jerusalẹm, rọi Juda. Kohwo kohwo vwe ohri re ihwo rọye, Ọrovwohwo Ọghẹnẹ rọye nene dia. E jo kpo.