Read urhobo 2 Ikun rẹ Ivie 4 Bible Online

2 Ikun rẹ Ivie 4 - urhobo bible

2 Ikun rẹ Ivie 4

¹Ọ da so agbada rẹ ẹrovwo, ugrogro rọye kubit uje, ohẹhẹre rọye kubit uje, ke rha ichiyi ihwe kpenu.

²Ọ da wran abadi phihọ; o de ki riariẹ, kubit ihwe nẹ egbẹn re te egbẹn, ọkpan rọye kubit iyori, a da ma ki riariẹ kẹ kubit ọgban.

³E de brona rẹ oghwara phihọ ọbotọ rọye, kerẹ kubit ọgban, riariẹ abadi na phihọ; eghwara na da dia irhiẹ ivẹ, a wranrọ kugbe vwẹ ọke ra vwọ wran.

⁴O de mudia phihọ enu rẹ irhuẹn ihwivẹ, erha nẹ obọhwẹre ọnre, erha nẹ obuko ọnre, erha nẹ obọrhe ọnre, erha rhe nẹ obaro ọnre; e de mu abadi na kpahe enu rayen, ekuakua rọye ri obuko ejobi de kpirhi ruọ evun.

⁵Ọkpan rọye hẹre te ekuọbọ; egbẹn rọye da dia phẹghẹphẹghẹ kerẹ egbẹn rẹ uko, kerẹ ododo rẹ ilili ọ da gba imize ọgban.

⁶Ọ de ru ize ihwe phihọ rere a vwọ hworhẹ abọ, o de phi iyori phihọ obọrhe ọnre, iyori ri chekọ ke rha obọhwẹre ọnre. Idjerhe nana kọye a vwọ sa hworhẹ evun rọ ra vwọ izobo rẹ ẹtorhẹ abadi na kẹ etiyin irherẹn na da họ.

⁷Ọ de ru ogburhukpẹ ihwe rẹ oro kirobo re djere, o de mu ayen phihọ uwevwi na, iyori obọhwẹre iyori ẹbẹre rẹ obọrhe.

⁸Ọ da je kare imẹjẹ ihwe, o de mu ayen phihọ uwevwi na, iyori ẹbẹre rẹ obọrhe iyori ẹbẹre rẹ obọhwẹre, O de ru ize ujori rẹ oro.

⁹O de ru ọguan rẹ irherẹn phihọ, kugbe ọguan rode, a da ghwẹ ẹchẹ phihọ ọguan na, a da wran ẹrovwo rhurhu ẹchẹ na;

¹⁰O de mu abadi na phihọ akakọ vwẹ ẹbẹre rẹ obọrhe rẹ uwevwi na.

¹¹Huram da je ma ẹchẹ rhe, kugbe ovwẹvwẹ, kugbe ize. Etiyin Huram de ru iruo na rẹ Solomọn Ovie ta nẹ o ru vwẹ uwevwi rẹ Ọghẹnẹ na re;

¹²osusu na ivẹ, idjikpo na, kugbe idjodjo ivẹ ri obenu rẹ osusn na;

¹³Kugbe pomegranate ujori ẹne vwẹ enu rẹ oga ri ghroghro ivẹ na, urhiẹ rẹ pomegranate ivẹ vwẹ enu rẹ oga ri ghroghro ivẹ na, re vwo rhurhu idjokpo ivẹ rẹ idjodjo na ri enu rẹ osusu na.

¹⁴O de ji ru awọ ro vwo mudia rhe, kugbe ize rẹ abọ ẹhworhẹ vwẹ enu rẹ awọ na,

¹⁵Kugbe abadi ọvo, kugbe irhuẹn ihwivẹ rẹ otọ rọye.

¹⁶Ẹchẹ na, ovwẹvwẹ na, kugbe isosogho kugbe ekuakua rẹ enana ejobi eyẹ Huramabi vwẹ ẹrovwo vwo ru kẹ Ovie Solomọn fiki rẹ uwevwi rẹ Ọrovwohwo na.

¹⁷Vwẹ uphẹphẹ ri Jọdan etiyin ovie na de ku ayen, vwẹ asan ophie rọ uvwre ri Sukkọt vi Zeredah.

¹⁸Solomọn de ru ekuakua nana buebu gbidiki, fiki rẹ ọtiọye na a gbe sa riẹn obo re họhọ te-e.

¹⁹Ọtiọye kọye Solomọn ru ekuakua ejobi ri uwevwi rẹ Ọghẹnẹ na; agbada rẹ oro na, imẹjẹ rẹ ikara rẹ opharo,

²⁰Igburhukpẹ na kugbe irhukpẹ rayen ra vwẹ omamọ rẹ oro duvwu rere e la vwẹ obo ẹtan rẹ ẹshẹ na, kirobo re djere kẹ;

²¹idodo na, irhukpẹ na, kugbe ahwa na, ra vwẹ omamọ rẹ oro ru;

²²akpẹn rẹ itaba, ize, igebule rẹ insẹns, evwẹrẹ rẹ usi, ra vwẹ omamọ rẹ oro ru; kugbe iphrophro rẹ uwevwi na, ra ghwẹ ẹchẹ rẹ obo ẹtan ra wan kpo obo asan rọ ma fon na kugbe ẹchẹ rẹ anurhoro rẹ utuwevwi rẹ uwevwi na phihọ, oro e vwo ru ayen ejobi.