Read urhobo 2 Ikun rẹ Ivie 5 Bible Online

2 Ikun rẹ Ivie 5 - urhobo bible

2 Ikun rẹ Ivie 5

¹E nẹ kọye iruo ejobi ri Solomọn ru phihọ uwevwi rẹ Ọrovwohwo vwo re. Solomọn da ghwa ekuakua ri Devid ọsẹ rọye ru fon nu vwọ rhe, ọ da ghwẹ idọnọ, otọ, vẹ ekuakua na ejobi phihọ uwevwi rẹ efe rẹ Ọghẹnẹ.

²Etiyin Solomọn da ghwẹ ekpako rẹ Izrẹl na ejobi koko kugbe igbuyovwi rẹ orua na, isun rẹ uwevwi rẹ esẹ rẹ ihwo rẹ Izrẹl, vwi Jerusalẹm, rere ayen vwo mu ekpeti rẹ ọphọ rẹ Ọrovwohwo na nẹ evun rẹ orere ri Devid rhe, kọye Zayọn.

³Ihwo rẹ Izrẹl ejobi da rhe ghwẹ koko vwẹ obaro rẹ ovie vwẹ asan orẹ na ra ria vwẹ emeranvwe righwrẹ.

⁴Ekpako rẹ Izrẹl na ejobi da rhe, ihwo ri Livae de mu ekpeti na.

⁵Ayen de mu ekpeti na rhe utughẹ ra da vwa oma kugbe ekuakua efuanfon na ejobi re hẹ evun rẹ utughẹ na; te irherẹn te ihwo ri Livae na de muo rhe.

⁶Etiyin Ovie Solomọn kugbe ukoko rẹ Izrẹl na ejobi, re ghwẹ koko vwẹ obaro rọye, da hẹ obaro rẹ ekpeti na, ri ze izobo rẹ igegede buebu kugbe irhuẹn buebu re se keri-i.

⁷Etiyin irherẹn na de mu ekpeti rẹ ọphọ rẹ Ọrovwohwo na rhe adia rọye, vwẹ obo ẹtan rẹ ẹshẹ vwẹ uwevwi na, vwẹ asan rọ ma fon vwẹ obotọ rẹ ibekpe ri chẹrobim na.

⁸Kidie chẹrọbim na bẹre ibekpe rayen sa asan ekpeti na, kọye chẹrobim na kẹ urhurho kẹ ekpeti na vẹ ọkpọ rọye.

⁹Ọkpọ na grori gangan ka kparo mrẹ oba rọye vwẹ asan rọ ma fon ejobi rọ hẹ obaro rẹ ọshẹ; ẹkẹvuọvo yẹ a sa wan obo otafe mrẹ aye-en; ayen je hẹ etiyin rhi te nonẹ na.

¹⁰Emuọvo hẹ evun rẹ ekpeti na-a jokpa rẹ ephapha ivẹ ri Mosis phihọ vwi Horẹb, vwẹ asan rẹ Ọrovwohwo vẹ ihwo rẹ Izrẹl da re ọphọ, rẹ ayen vwo nẹ otọ rẹ Ijipt cha.

¹¹Asakiephana ọke rẹ irherẹn na vwo nẹ asan ọfuanfon na rhe (kidie irherẹn na ejobi re hẹ etiyin na nabọ phorho oma rẹ rayen fon, ayen rhe nene urhi rẹ ẹko ra ghare ayen phihọ-ọ;

¹²kugbe ayen ihwo ri Livae ejobi re sua ine, Asaf, Heman, kugbe Jedu-tun, emọ rayen vẹ imoni rayen, da nabọ vwẹ omamọ rẹ esada wene, vẹ igogo, ekpata, isorogun, ayen de mudia vwẹ obaro ọnre rẹ agbada na vẹ irherẹn ujosan ri hworo ewanre;

¹³ke je vwẹ iruo rẹ ihwo ri hworo ewanre na vẹ otu re sua ine na re ayen ku urhuru gbe ọvo vwọ so ejiro vẹ ẹkpẹvwẹ kẹ Ọrovwohwo na) Ọke rẹ ayen de mu une na re, vẹ ewanre vẹ igogo kugbe ekuakua rẹ ihwehworo efa, vwọ so ejiro kẹ Ọghẹnẹ, fikiridie o yovwiri; ẹguọnọ rọye ro jẹrhẹriẹ dia bẹdẹ bẹdẹ, uwevwi na, uwevwi rẹ Ọrovwohwo na, da rhe vọn vẹ ivwirhi,

¹⁴Ọtiọye na irherẹn na gbi se mudia de gbe odibo fiki re ivwirhi na-a; kidie urinrin rẹ Ọrovwohwo na vọn uwevwi rẹ Ọghẹnẹ na.