Read urhobo 2 Ikun rẹ Ivie 6 Bible Online

2 Ikun rẹ Ivie 6 - urhobo bible

2 Ikun rẹ Ivie 6

¹Etiyin Solomọn da ta, Ọrovwohwo na tare nẹ egho hwi ọye ọye dia.

²Me bọn uwevwi rode kẹ wẹ, asan re wọ dia bẹdẹ.

³Etiyin ovie de kuoma rhẹriẹ, ọ da nẹ ẹrhovwo kẹ ọghwẹgbe rẹ Izrẹl, yẹ ọghwẹgbe rẹ Izrẹl na mudia.

⁴Ọ da ta, Ebruba kẹ Ọrovwohwo na, Ọghẹnẹ rẹ Izrẹl, rọ vwẹ obọ rọye ru gba obo rọ vwẹ unu rọye ve kẹ Devid ọsẹ mẹ, tanẹ,

⁵Rhawabae re me vwọ reyọ ihwo mẹ nẹ otọ rẹ Ijipt rhe, me je jẹ orere ọvuọvo vwẹ orua rẹ Izrẹl na ra bọn uwevwi phihọ-ọ, rere odẹ mẹ vwọ dia etiyi-in, Me je jẹ ohwo ọvuọvo nọ dia oviẹ vwe enu rẹ ihwo mẹ Izrẹl na-a;

⁶ẹkẹvuọvo me jẹ Jerusalẹm reyọ rere odẹ mẹ vwọ dia etiyin me da rha jẹ Devid reyọ nọ dia enu rẹ ihwo mẹ Izrẹl.

⁷Asakiephana ọye iroro rọ hẹ evun ri Devid ọsẹ mẹ rọ vwọ bọn uwevwi kẹ odẹ rẹ Ọrovwohwo na, Ọghẹnẹ rẹ Izrẹl.

⁸Ẹkẹvuọvo Ọrovwohwo da ta kẹ Devid ọsẹ mẹ, Wọ ghine jẹ iroro vwẹ udu wẹn nẹ wọ cha bọn uwevwi kẹ odẹ mẹ, wọ riẹn ru re wọ vwọ jẹ iroro ọtiọye vwẹ udu wẹn;

⁹yẹ ẹkẹvuọvo wọ cha bọn uwevwi na-a, ẹkẹvuọvo ọmọ wẹn re che vwiẹ kẹ wẹ re cha bọn uwevwi kẹ odẹ mẹ.

¹⁰Asakiephana Ọrovwohwo ru ive rọye ro veri gba; kidie mẹvwẹ ohwo ro muru vwẹ adia ri Devid ọsẹ mẹ, mi de tidia phihọ enu re ekete rẹ Izrẹl, kirobo rẹ Ọrovwohwo veri, me ghine bọn uwevwi na kẹ odẹ rẹ Ọrovwohwo na, Ọghẹnẹ rẹ Izrẹl na.

¹¹Etiyin kọye mi mu ekpeti na phihọ, re phi ọphọ rẹ Ọrovwohwo na rọ vẹ ihwo rẹ Izrẹl rere na phihọ.

¹²Etiyin Solomọn de mudia vwẹ obaro rẹ agbada rẹ Ọrovwohwo na vwẹ irharo rẹ ọghwẹgbe rẹ ihwo rẹ Izrẹl ejobi, ọ da bẹre abọ rọye.

¹³Solomọn duvwu ohwarha rẹ ẹrovwo ugrogro rọye kubit iyori, ohẹhẹre rọye kubit iyori, o de rhe kpenu kubit erha, o de muo phihọ ọguan na; o de mudia phihọ enu rọye. Etiyin o de diguẹ te otọ vwẹ irharo rẹ ọghwẹgbe rẹ ihwo rẹ Izrẹl, ọ da bẹre abọ sa odjuvwu;

¹⁴ọ da ta, E Ọrovwohwo Ọghẹnẹ rẹ Izrẹl, o vwo Ọghẹnẹ rọ họhọ owẹ-ẹ, vwẹ odjuvwu vẹ akpọ-ọ, rọ yọnrọn ọphọ ọ mi rhe dje ẹguọnọ rọye ro jẹrhẹriẹ kẹ idibo wẹn re yan nene vẹ udu rayen ejobi;

¹⁵Wẹ re yọnrọn ive ru wọ ve kẹ odibo wẹn Devid ọsẹ mẹ, uyota, wọ ghene vwẹ udu wẹn ta, wọ da vwẹ abọ wẹn vwo ruo gba nonẹ na.

¹⁶Asakiephana, E Ọrovwohwo Ọghẹnẹ rẹ Izrẹl, gba yọnrọn obo ru wo ve kẹ Devid ọsẹ mẹ, tanẹ, ohwo gbe cha kare owẹ ro che tidia ekete rẹ Izrẹl na vwẹ obaro mẹ-ẹ, ọ da dianẹ emọ wẹn ruru dẹndẹn vwẹ idjerhe rayen, re da yọnrọn urhi mẹ kirobo rẹ ekpuyovwi wẹn rnru.

¹⁷Asakiephana, E Ọrovwohwo, Ọghẹnẹ rẹ Izrẹl, gbẹ jẹ ota wẹn sẹ, ọ re wọ ta kẹ odibo wẹn Devid.

¹⁸Ẹkẹvuọvo vwẹ ọ rẹ uyota na kẹ Ọghẹnẹ vẹ ihwo dia otọ rẹ akpọ na? Nighere, odjuvwu kugbe odjuvwu ro me kpenu na sa gba wẹ-ẹ; komavọ umuwevwi nana re me bọnre na?

¹⁹Ẹkẹvuọvo davwerhọn rẹ ẹrhovwo rẹ odibo wẹn kugbe oyare rọye, E Ọrovwohwo Ọghẹnẹ mẹ, re wo nyo oviẹ kugbe ẹrhovwo rẹ odibo wẹn nẹ kẹ wẹ na;

²⁰rere ẹro wẹn rhie te ason te uvo kpahe uwevwi nana, asan ru wo veri ne odẹ wẹn dia, rere wọ mrasan nyo ẹrhovwo rẹ odibo wẹn nẹ vwẹ etinẹ.

²¹Gba kerhọn rẹ oyare rẹ odibo wẹn kugbe ihwo wẹn Izrẹl, rẹ ayen da nẹ ẹrhovwo vwẹ etinẹ; E, nyo vwẹ obo odjuvwu asan ro wọ dia; wo de nyo nu, biko vwo ghovwo.

²²Ọ da dianẹ ohwo ru umwemwu kpahe ọrivẹ rọye ra da ta nẹ o duvwu iyori, rọ da rhe rhi duvwu iyori na vwẹ obaro rẹ agbada vwẹ uwevwi nana,

²³gbe nyo vwẹ obo odjuvwu, ru wo ru, ru wo brorhiẹ re idibo wẹn, bruhwe ọ rọ reabe re wọ kru uruemu rọye nyẹ uyovwi rọye, re wo rhe brorhiẹ kẹ ọvwata rere ase rọye phia kirobo rẹ ọvwata rọye teri.

²⁴Ọ da dianẹ ivwighrẹ phi ihwo rẹ Izrẹl kua fikiridie ayen ru umwemwu kpahe owẹ, ayen de rhivwi bru we rhe rhe fa oma kẹ wẹ, rẹ ayen da nẹ ẹrhovwo rẹ ayen de rhi yovwo unu kẹwẹ vwẹ uwevwi nana;

²⁵gbe nyo vwẹ obo odjuvwu, re wọ vwẹ umwemwu rẹ ihwo rẹ Izrẹl vwo ghovwo ayen, rere wọ rhoma reyọ ayen rhi vwo te otọ ru wọ vwọ kẹ ayen kugbe esẹ rayen.

²⁶Ọke re de huhu ẹchẹ rẹ enu na rẹ osio gbe rhọ-ọ fikiridie ayen ru umwemwu kpahe owẹ, ọ da dianẹ ayen hirhe opharo ku etinẹ da nẹ ẹrhovwo, rẹ ayen da rhọvwe odẹ wẹn, rẹ ayen de siobọ nẹ umwemwu rayen, ru wọ da vwe oja re ayen,

²⁷Gbe nyo vwẹ odjuvwu, ru wọ vwẹ umwemwu ghovwo idibo wẹn ihwo wẹn Izrẹl, vwẹ ọke wo de yono ayen idjerhe esiri rẹ ayen yan nene; re wọ rhọ osio phihọ otọ wẹn, re wọ vwọ kẹ ihwo wẹn ne vwọ reuku.

²⁸Ọ da dianẹ owẹvwe fiẹ vwẹ otọ na, ọ da dianẹ ọtiekọ eyẹ ophan eyẹ igbidigbi eyẹ ebaka eyẹ ihori; ọ da dianẹ ivwighrẹ rayen kpo imu vwẹ ọvo vwẹ usun rẹ orere rayen; kemiavwe, kemiavwe, koga koga ro herọ;

²⁹Kẹrhovwo kẹrhovwo, korẹ korẹ rẹ ohwo ọvo rere eyẹ ihwo wẹn Izrẹl ejobi, rẹ ohwo ọvuọvo da riẹn obo ri kpokpo, kugbe ọdavwẹ rọye rọ da riẹn abọ rọye hirhe ku uwevwi nana;

³⁰Gbe nyo vwẹ obo odjuvwu vwẹ asan re wọ dia na, re wo vwo ghovwo, re wo ru kẹ ohwo ọvuọvo re wọ riẹn udu rọye, kirobo rẹ idjerhe rọye epha (kidie wẹ, wẹ ọvo kpoi, re riẹn udu rẹ emọ rẹ ihwo);

³¹Rere ayen vwọ djẹ oshọ wẹn rẹ ayen yan phihọ idjerhe wẹn vwẹ ẹdẹ ejobi rẹ ayen cha dia otọ na re wọ vwọ kẹ esẹ rẹ avwanre.

³²Ọtiọye rhe ọ da dianẹ ọrhorha, rọ dia usun rẹ ihwo wẹn Izrẹl na-a, de nẹ ogboko rhe fiki rẹ usi rẹ odẹ wẹn rode na, kugbe ẹgba rẹ obọ wẹn, kugbe eghwabọ wẹn ru wọ riẹn phia ọ da rhe rhe nẹ ẹrhovwo vwẹ evun rẹ uwevwi nana,

³³Nyo vwẹ obo odjuvwu vwẹ asan ru wọ dia na, rere wo ru emu ejobi rẹ ọrhorha nọ mie we, rere ihwo rẹ akpọ na ejobi vwọ riẹn odẹ wẹn re ayen je djẹ oshọ wẹn, kirobo rẹ ihwo wẹn Izrẹl ruẹ, rere ayen vwọ sa riẹn nẹ uwevwi nana re me bọnre na odẹ wẹn e vwo se.

³⁴Ayen da kpare ofovwi bru ivwighrẹ rayen, kidjerhe kidjerhe ru wo ji ayen wan, ayen de hirhe opharo ku orere nana ru wọ jẹreyọ na nẹ ẹrhovwo kugbe uwevwi nana re Me bọnre kẹ odẹ wẹn na,

³⁵gbe nyo vwẹ obo odjuvwu ẹrhovwo rayen kugbe orẹ rayen, re wọ kpọ ayen obọ.

³⁶Ọ da dianẹ ayen ru umwemwu kpahe owẹ — kidie o vwo ohwo ro jẹ umwemwu eruo-o — rẹ ophu de mu we kpahe ayen, ru wo de siobọ nẹ ayen kẹ ọvweghrẹ rayen ọtiọye e mi mu ayen ighuvwu kpo otọ ro sheri eyẹ ọ rọ kẹre;

³⁷rẹ ayen de rhi roro mrẹ vwẹ evun rẹ udu rayen vwẹ evun rẹ otọ re mu ayen ra na, rẹ ayen de kurhẹriẹ, rẹ ayen da rẹ wẹ vwẹ evun rẹ otọ re mu ayen ighuvwu ra na, tanẹ, Avwanre ru umwemwu, avwanre ru chọ avwanre ru emu ọbrabra;

³⁸Ọ da dianẹ ayen kurhẹriẹ vwẹ iroro rayen ejobi vẹ udu rayen ejobi vwẹ evun rẹ otọ rẹ ayen da hẹ ighuvwu na, re mu ayen ra ighuvwu na, rẹ ayen de hirhe opharo ku otọ rayen na da nẹ ẹrhovwo, otọ ru wọ kẹ esẹ rayen na, orere ru wọ jẹreyọ na, kugbe uwevwi re me bọn kẹ odẹ wẹn na,

³⁹Gbe nyo vwẹ obo odjuvwu vwẹ asan re wọ dia na ẹrhovwo rayen kugbe orẹ rayen, re wo bru kẹ ayen rere wo vwo ghovwo ihwo wẹn ri ru umwemwu kpahe owẹ.

⁴⁰Asakiephana E Ọghẹnẹ mẹ, gbe jẹn ẹro wẹn rhie rere wo rhe rhie erhọn wẹn phihọ kẹ ẹrhovwo re etinẹ na.

⁴¹Asakiephana gbe vrẹn, E Ọrovwohwo Ọghẹnẹ rere wo kpo asan rẹ omaerovwo wẹn, re owọwẹ te ekpeti rẹ ẹgba wẹn. Jẹn irherẹn wẹn, E Ọrovwohwo Ọghẹnẹ, vwẹ esivwo rhuo oma, gbe jẹn ihwo efuanfon wẹn ghọghọ vwẹ erhuvwu wẹn.

⁴²E Ọrovwohwo Ọghẹnẹ, wo chuko kuẹ opharo rẹ ohwo ru wọ vwẹ evwri ghworo nure-e! karophihọ ẹguọnọ wẹn ro jẹrhẹriẹ na kẹ Devid odibo wẹn.