Read urhobo 2 Ikun rẹ Ivie 7 Bible Online

2 Ikun rẹ Ivie 7 - urhobo bible

2 Ikun rẹ Ivie 7

¹Ọke ri Solomọn vwọ nẹ ẹrhovwo nu, erhanre de she nẹ odjuvwu rhe rhe torhẹ izobo rẹ ẹtorhẹ na kugbe izobo na ejobi, urinrin rẹ Ọrovwohwo da rhe vọn uwevwi na.

²Irherẹn na gbe sa ro uwevwi rẹ Ọrovwohwo na-a, fikiridie urinrin rẹ Ọrovwohwo na vọn uwevwi rẹ Ọrovwohwo na.

³Ọke rẹ emọ rẹ Izrẹl ejobi vwọ mrẹ erhanre ro shotọ kugbe urinrin rẹ Ọrovwohwo vwẹ enu rẹ uwevwi na, ayen de gbe opharo phihọ otọ vwẹ enu rẹ umukpe na, ayen da ga ayen da vwẹ ẹkpẹvwẹ kẹ Ọrovwohwo na, tanẹ, Kidie o yoma, kidie ẹguọnọ rọye ro jẹrhẹriẹ dia bẹdẹ.

⁴Etiyin ovie na kugbe ihwo na ejobi de ze izobo kẹ Ọrovwohwo na.

⁵Ovie Solomọn da vwẹ irhuẹn uriori uje gbẹ ivẹ kugbe igodẹ uriori ujosan vwo ze izobo. Etiyin ovie na kugbe ihwo na ejobi de ru uwevwi rẹ Ọghẹnẹ na fon.

⁶Irherẹn na de mudia phihọ adia rayen; etiọye ji te ihwo ri Livae na rhe; vẹ ekuakua rẹ ihwehworo ri Devid ruru kẹ Ọrovwohwo rere a vwẹ ayen kpẹvwẹ Ọrovwohwo na — kidie ẹguọnọ rọye ro jẹrhẹriẹ dia bẹdẹ — kọke kọke ri Devid da vwẹ ayen jiro; yẹ irherẹn ri mudia hirhe aro ku ayen na re hworo ewanre; Izrẹl ejobi mi vrẹn mudia.

⁷Solomọn de ru uherevie rẹ ọguan na rọ hẹ obaro rẹ uwevwi rẹ Ọrovwohwo na fuanfon; kidie etiyin o de ze izobo rẹ ẹtorhẹ na kugbe ivwri rẹ izobo rẹ ufuoma na, fikiridie agbada rẹ ẹrovwo ri Solomọn ruru na sa gba izobo rẹ ẹtorhẹ na kugbe izobo rẹ ọka na kugbe ivwri na-a.

⁸Vwẹ ọke yena Solomọn da rẹ orẹ na urhughwrẹ soso, re Izrẹl ejobi, ukoko rode rhuarho gangan, nẹ ughere ri Hamat re te ẹrẹrhe rẹ Ijipt.

⁹Vwẹ ẹdẹ rẹrenre na kẹ ẹdẹ rẹ ọghwẹgbe ofuefun; fikiridie ayen re orẹ rẹ orufuọn rẹ agbada na urhughwrẹ okpuyovwi rẹ orẹ na kẹ rha urhughwrẹ.

¹⁰Vwẹ ẹdẹ uje gbe erha rẹ emeranvwe righwrẹ na o de siobọ nẹ ihwo na kpo vẹ omavwerhe vẹ aghọghọ vwẹ udu rayen fiki rẹ emuesiri rẹ Ọrovwohwo ru kẹ Devid kugbe Solomọn vẹ Izrẹl rẹ ihwo rọye.

¹¹Enẹ kọye Solomọn bọn uwevwi rẹ Ọrovwohwo na re kugbe uwevwi rẹ ovie na; kugbe emu ejobi ri Solomọn rori nẹ ọye ru vwẹ uwevwi rẹ Ọrovwohwo na kugbe uwevwi rẹ obọ rọye o de ru ayen ejobi re tototo.

¹²Etiyin Ọrovwohwo da vwẹ oma phia kẹ Solomọn vwẹ ason ọ da ta kẹ. Mi nyo ẹrhovwo wẹn, me jẹ etinẹ na reyọ kẹ oma mẹ nure nọ dia uwevwi rẹ izobo mẹ.

¹³Ọke mi de huhu odjuvwu na gbe rẹ osio gbe rhọ-ọ, eyẹ mi de ji ebaka rhe nẹ e rhe ghworọ otọ na, eyẹ mi de ji ọtiekọ rhe ohri rẹ ihwo mẹ,

¹⁴Ọ da dianẹ ihwo mẹ ra vwẹ odẹ me se da vwẹ oma kpotọ, rẹ ayen da nẹ ẹrhovwo rẹ ayen da guọnọ opharo mẹ, rẹ ayen de kurheriẹ nẹ idjerhe ọbrabra rayen, eriyin ki mi nyo nẹ obo odjuvwu rhe, ke me vwẹ imwemwu rayen ghovwo ayen ki mi sivwi otọ rayen.

¹⁵Asakiephana ẹro mẹ ko rhie, erhọn mẹ ko rhie phihọ kẹ ẹrhovwo ra nẹ vwẹ etinẹ na.

¹⁶Kidie asakiephana me jẹ uwevwi nana reyọ mi de ruo fon rere odẹ mẹ vwọ dia etiyin bẹdẹ; ẹro mẹ kugbe udu mẹ kọ dia etiyin vwẹ ọke ejobi.

¹⁷Vwọ kẹ wẹ, wọ da vwọ kpahe ovwẹ, kirobo ri Devid ọsẹ wẹn yanre, wo de ru emu ejobi ri mi ji urhi rọye kẹ wẹ wọ da yọnrọn iji mẹ kugbe irhi mẹ,

¹⁸etiyin ke me tọn owọ rẹ uvie wẹn na viotọ kokoroko, kerẹ ọphọ mi vi Devid ọsẹ wẹn rere tanẹ, Ohwo cha kanre owẹ rọ cha re vwẹ enu rẹ Izrẹl na-a.

¹⁹Ẹkẹvuọvo wọ da rhẹriẹ oma re wọ da sen iji kugbe irhi mẹ ri mi ji kẹ wẹ, wọ da yanran ra gọ ẹdjọ efa,

²⁰etiyin ke me cha kọrọ owẹ nẹ otọ na re me vwọ kẹ wẹ na; uwevwi nana, ri mi ru fon vwọ kẹ odẹ mẹ na, ke me kparọ kufia nẹ obaro mẹ, ke che vwo brisẹ, ke vwo bru ohare vwẹ ohri rẹ ihwo na.

²¹Vwẹ uwevwi nana, ra kpare kpenu na, kohwo kohwo rọ wanvrẹn ko che gbe unu, kọ ta, kidie nẹrhẹ Ọrovwohwo ru ọtiọna kẹ uwevwi nana vẹ otọ nana?

²²Etiyin ke ayen cha ta, Fikiridie ayen sen Ọrovwohwo Ọghẹnẹ rẹ esẹ rayen rọ reyọ ayen nẹ otọ rẹ Ijipt rhe, ayen da djẹ gbane ẹdjọ efa, ayen da gọ ayen; fiki rẹ ọtiọye na ọye ọ vwọ ghwẹ ukpokpogho nana brn ayen rhe.