Read urhobo 2 Ikun rẹ Ivie 8 Bible Online

2 Ikun rẹ Ivie 8 - urhobo bible

2 Ikun rẹ Ivie 8

¹Vwẹ oba rẹ ikpe uje, ri Solomọn vwọ bọn uwevwi rẹ Ọrovwohwo na kugbe uwevwi rẹ obọ rọye na,

²Solomọn da rhoma bọn irere ri Huram vwọ kẹ, ihwo rẹ Izrẹl da kua ro ayen.

³Solomọn da yanran kpo Hamatzobat, ọ da reyọ.

⁴Ọ da bọn Tadmọr phihọ evun rẹ aghwa kugbe irere ejobi ra da sẹro rẹ ekuakua rọ bọn phihọ Hamat.

⁵Ọ da je bọn Bethọrọn rẹ ugbenu kugbe Bẹthọrọn rẹ Ọbotọ irere ra gba ogba phihọ vẹ igbehẹ, unurhoro, vẹ ogba,

⁶Kugbe Baalat, vẹ irere ra ghwa ekuakua phihọ ri Solomọn bọnre, kugbe irere ejobi ro suẹn vwọ ba.

⁷Ihwo ejobi ri chekọ vwi Hẹt, ihwo rẹ Amọr, ihwo ri pẹrẹz, ihwo ri Hiv, ihwo ri Jebu, re dia ihwo rẹ Izrẹli-i,

⁸Uvwiẹ rayen ri ghwu chekọ vwẹ evun rẹ otọ na, rẹ ihwo rẹ Izrẹl hweri-i — enana keye Solomọn bru oghwa rẹ owian nyẹ rhi te nonẹ na.

⁹Ẹkẹvuọvo vwọ kẹ ihwo rẹ Izrẹl ri chekọ Solomọn rha vwẹ ayen ru ọviẹn rẹ owia-an; ayen kẹ ọtuemọ, kugbe inotu, vẹ isun rẹ ekpẹrẹ rọye, kugbe ihwo re gua iyesi rọye.

¹⁰Enana keye ihwo ride rẹ inotu rẹ Ovie Solomọn, ujori ivẹ gbe ujuvẹ gbe ihwe, ri vwo ogangan vwẹ enu rẹ ihwo na.

¹¹Solomọn da reyọ ọmọtẹ ri Fero nẹ orere ri Devid rhe vwo kpo uwevwi rọ bọn kẹ, kidie ọ tare nẹ, Aye mẹ cha dia uwevwi ri Devid ovie rẹ Izrẹli-i, kidie asan rẹ ekpeti rẹ Ọrovwohwo te nure pha fuanfon.

¹²Etiyin Solomọn de ze izobo rẹ ẹtorhẹ kẹ Ọrovwohwo vwẹ enu rẹ agbada rẹ Ọrovwohwo rọ so phihọ obaro rẹ ọguan na,

¹³Kirobo rẹ iruo rẹ ẹdọke ọvuọvo guọnọre, re ze kirobo rẹ urhi rẹ izobo ri Mosis ji kẹ edidjana epha, ọ rẹ ọtuphro rẹ emeranvwe, kugbe orẹ erha rẹ ẹgbukpe na — orẹ rẹ ikara ro jephuo, orẹ rẹ ẹdẹwọ, kugbe orẹ rẹ egarivi.

¹⁴Kirobo rẹ urhi ri Devid ọsẹ rọye epha, ọ da ghare irherẹn na phihọ ẹdẹdẹ rẹ ẹga rọye, ihwo ri Livae na phihọ ẹdẹdẹ re ine ẹsuọ vẹ ejiro vwọ kẹ irherẹn rẹ ẹga teri vwẹ ẹdẹ ọvuọvo kirobo ra guọnọre, erhẹrẹchẹ na vwẹ oghogharọ rayen vwọ kẹ ẹga rẹ anurhoro na; kidie ọtiọye Devid rẹ ohwo rẹ Ọghẹnẹ na ji urhi.

¹⁵Ayen gbobọ nyẹ urhi rẹ ovie na ji kẹ irherẹn na vẹ ihwo ri Livae na kpahe ota nana-a vẹ uwevwi rẹ efe na-a.

¹⁶E nẹ kọye iruo ri Solomọn ejobi vwọ gba nẹ ẹdẹ ra vwẹ uchivwo rẹ uwevwi rẹ Ọrovwohwo na vi otọ rhi te ẹdẹ ro vwo re. Kẹnẹ uwevwi rẹ Ọrovwohwo na ru re.

¹⁷Etiyin Solomọn de kpo Eziọngeba yẹ Elọt vwẹ obo orhoma rẹ abadi na, vwẹ otọ rẹ Idọm.

¹⁸Huram da vwẹ eko kẹ idibọ rọye rẹ riẹn obọ re biẹ okọ vwẹ abadi rhe, ayen de bi kpo Ọfa kugbe idibo ri Solomọn, ayen da ra ghwa oghwa rẹ oro ro bu te talẹnt rẹ oro ujori enẹ kugbe ujuvẹ gbẹ ihwe rhe Ovie Solomọn.