Read urhobo 2 Ikun rẹ Ivie 9 Bible Online

2 Ikun rẹ Ivie 9 - urhobo bible

2 Ikun rẹ Ivie 9

¹Asakiephana ovie aye ri Sheba vwo nyo usi ri Solomọn ọ da rhe Jerusalẹm rhe vwẹ enanọ egangan vwọ davwọ ni, ọ vẹ usun ri tue nene kugbe kamẹl re ghwa oghwa rẹ egẹn vẹ oro buebu kugbe ibieragha esiri. Ọke rẹ ayen vwo te asan ri Solomọn, ọ da ta obo ri rhere vwẹ udu ejobi kẹ.

²Solomọn da kpahe phihọ enanọ na ejobi kẹ; o vwo emu ọvuọvo rọ djahe kẹ Solomọn ro jẹ fan otọ rọye kẹ-ẹ.

³Ọke rẹ ovie aye ri Sheba vwọ mrẹ ẹghwanre ri Solomọn nu, uwevwi rọ bọnre,

⁴emuọre rọ ria, obo rẹ ediaguare rọye tidia wan, obo rẹ idibo rọye gbe odibo kẹ te, irhuerhuo rayen, ihwo ri muidi kẹ, kugbe emwa rayen, kugbe izobo ẹtorhẹ rọye rọ torhẹ kẹ Ọrovwohwo vwẹ uwevwi rọye, udu gbi rhe vwẹ awọ-ọ.

⁵Ọ da ta kẹ ovie na, Ikun ri mi nyori na uyota ri mi nyo kpahe otọ wẹn vẹ eyere wẹn kugbe ẹghwanre wẹn,

⁶ẹkẹvuọvo mi se se ikun na gbuyota-a bẹsiẹ re me vwọ rhe ẹro mẹ ghine mrẹre; gbe nighe, a tobọ gbe ubro rẹ ọrhọ vẹ ẹghwanre wẹn na kẹ vwẹ-ẹ; wọ rho vrẹn iyẹnrẹ ri mi nyori na.

⁷Aghọghọ kẹ eya wẹn. Aghọghọ kẹ idibo wẹn nana, ri vwi kẹdẹ kẹdẹ muẹdia obaro wẹn re kerhọn rẹ ẹghwanre wẹn.

⁸Ebruba kẹ Ọrovwohwo Ọghẹnẹ wẹn, rẹ ivun wẹ vwerhere rọ da vwẹ owẹ tidia ekete rọye nu wọ re ovie vwẹ obaro rẹ Ọrovwohwo Ọghẹnẹ wẹn. Fikiridie Ọghẹnẹ wẹn guọnọ Izrẹl ọ ke guọnọ nẹ ọ vwẹ owọ rọye muotọ bẹdẹ, ọ da vwẹ owe mu ovie vwẹ enu rẹ ayen, rere wo brorhiẹ rẹ ọsoso vẹ ọvwata.

⁹Etiyin ọ da kẹ ovie na talẹnt re oro ujori ivẹ gbẹ uje, kugbe egẹn buebu gangan, kugbe ibieragba eghaghare; a je mrẹ oghẹre rẹ egẹn tioghẹrẹ rẹ ovie aye ri Sheba na vwọ kẹ Ovie Solomọni-i.

¹⁰Ọ rọ marho vwọ idibo ri Huram kugbe idibo ri Solomọn re ghwa oro nẹ Ọfa rhe, da je ghwa uhi rhe kugbe eragha eghaghare.

¹¹Ovie na da vwẹ uhi na ru ichiyi phihọ uwevwi rẹ Ọrovwohwo na vẹ uwevwi rẹ ovie na, te isorogun vẹ ekpata vwọ kẹ otu ri soine; a rha mrẹ oghẹre ọtiọye rhabae na vwẹ otọ ri Juda na-a.

¹²Ovie Solomọn da kẹ ovie aye ri Sheba na obo rọ guọnọre ejobi, obo rọ nọre ejobi vẹ obo rẹ ikpuyovwi rọye ghwarhe ovie na. Etiyin o de rhivwi kpo otọ rẹ obọ rọye, vẹ idibo rọye.

¹³Asakiephana ovwanvwọn rẹ oro ro bru Solomọn rhe vwẹ ukpe ọvo na da dia talẹnt rẹ oro ujori esan kugbe ujorha gbẹ esan,

¹⁴e rhe kere e rẹ ineki ri chueki ghwarhee; kugbe ivie rẹ Arebia vẹ isun rẹ otọ na da je ghwa oro vẹ idọnọ vwo rhe Solomọn.

¹⁵Ovie Solomọn de duvwu ekpọfia ride ivẹ rẹ oro; shekẹl ujori esan rẹ oro ọye e vwo ru ọvuọvo.

¹⁶O de duvwu ekpọfia ujori erha rẹ oro; shekẹl ujori erha rẹ oro e vwo ru ọvuọvo; ovie na de phi ayen phihọ Uwevwi rọ hẹ obo evun rẹ Egbo ri Lẹbanọn.

¹⁷Ovie na da je kanre ekete rẹ akeni rode, ọ da nabọ vwẹ oro pharọ.

¹⁸Ekete na de vwo ichiyi esan kugbe akpanurhe rẹ oro vwẹ obotọ, ra kanre mu ekete na, te abọ nana te abọ rivẹ rẹ ekete asan ra vwẹ abọ rẹrẹ da herọ kugbe ikpe kpo ivẹ re hẹ obuko rẹ asan ra vwọ abọ rẹrẹ na.

¹⁹vẹ ikpohrokpo ihwivẹ mudia vwọ etiyin, ọvo hẹ oba rẹ ichiyi ọvuọvo vwẹ enu rọ ichiyi esan na. A je mrẹ oghẹre yena vwẹ uvie ọvuọvo-o.

²⁰Iko rẹ Ovie Solomọn vwọ da idi ejobi oro e vwo ru ayen, ekuakua ejobi rẹ Uwevwi rẹ obo Egbo ri Lẹbanọn na omamọ rẹ oro e vwo ru ayen; idọnọ fi emuọvo vwẹ ọke ri Solomọni-i.

²¹Kidie ekọ rẹ ovie kpo Tashish vẹ idibo ri Huram; ẹsiẹvo ẹgbukpọ erha ọye ekọ ri Tashish vwo duvwẹ re ghwa oro, idọnọ, akeni, okpe, kugbe pikọk.

²²Kẹnẹ Ovie Solomọn vwo fe nọ ivie rẹ akpọ na ọ ke je ghwanre nọ ayen.

²³Ivie rẹ akpọ na ejobi ke guọnọ Solomọn mrẹ rerẹ ayen kerhọn rẹ aghwanre rọye, rẹ Ọghẹnẹ phihọ udu rọye.

²⁴Ọvuọvo rọ cha mẹ phare ọko rhe, ekuakua rẹ idọnọ vẹ oro, iwun, adjija, egẹn, iyesi kugbe irhuẹn, buebu kukpẹ kukpe.

²⁵Solomọn de vwo urhuẹn uriori ẹne rẹ iyesi vẹ ekpẹrẹ kugbe ihwo re gua iyesi uriori ihwivẹ, rọ ghwẹ phihọ irere rẹ ekpẹrẹ re vẹ ovie gba dia Jerusalẹm.

²⁶Kọye ri suẹn ivie ejobi nẹ Yufretis re te otọ ri Filistia, rhiri rẹ te ughwru rẹ Ijipt,

²⁷Ovie na de ru idọnọ efuanfon kueku kerẹ ibieragha vwi Jerusalẹm, o de rhe ru igẹdu kueku kerẹ sikamọ ri Shefelah.

²⁸Ijipọ kugbe etọ efa kọye a da ghwa iyesi vwo rhe Solomọn.

²⁹Asakiephana eyere ri Solomọn ejobi, nẹ ẹsosuọ re te oba, e rhe si ayen phihọ ẹbe rẹ ikun ri Natan rẹ ọmraro na, kugbe evun rẹ aruẹmrẹ rẹ Ahijah rẹ ohwo ri Shilo, kugbe emramrẹ rẹ Iddo rẹ ọmrẹ na kpahe Jeroboam rẹ ọmọ ri Nebat?

³⁰Solomọn da re vwi Jerusalẹm kugbe Izrẹl ejobi ikpe ujuvẹ.

³¹Solomọn da vwerhẹ kugbe esẹ rọye, e de sho phihọ orere ri Devid ọsẹ rọye; Rehoboam rẹ ọmọ rọye da re vwẹ edia rọye.