Read urhobo Ezra 3 Bible Online

Ezra 3 - urhobo bible

Ezra 3

¹Vwe ọke rẹ emeranvwe righwrẹn vwọ gba re, rẹ emọ rẹ Izrẹl vwọ hẹ evun rẹ irere na, ihwo na da ghwẹ oma koko kerẹ ohwo ọvo vwọ rhe Jerusalẹm.

²Etiyin Jeshua rẹ ọmọ ri Jozadak de vrẹn, kugbe irivẹ rọye re hẹ irherẹn, kugbe Zerubabẹl rẹ ọmọ rẹ Shealtiẹl vẹ imoni rọye, ayen da tọn agbada rẹ izobo rẹ Ọghẹnẹ rẹ Izrẹl, rere ayen vwo ze izobo rẹ ẹtorhẹ vwẹ enu rọye kirobo re siro phihọ urhi ri Mosis ohwo rẹ Ọghẹnẹ.

³Ayen de mu agbada na vi vwẹ ẹdia rọye, kidie oshọ mu ayen fiki rẹ ihwo rẹ otọ na, ayen de ze izobo rẹ ẹtorhẹ vwẹ enu rọye vwọ kẹ Ọrovwohwo, izobo rẹ ẹtorhẹ vwẹ urhiọke tẹ ovwọnvwọn.

⁴Ayen je re orẹ rẹ ọgarivi, kirobo re siro, ayen ji ze izobo rẹ ẹtorhẹ na kẹdẹ kẹdẹ vwẹ ununu rayen kirobo rẹ urhi tare, kirobo rẹ ẹdẹ ọvuọvo guọnọre.

⁵Ọyena da wanu, izobo rẹ ẹtorhẹ kọke kọke, izobo rẹ otuphro rẹ emeranvwe kugbe ẹdorẹ ejobi re bruru kẹ Ọrovwohwo kugbe izobo ro nẹ udu rhe rẹ ohwo ọvuọvo ze kẹ Ọrovwohwo na.

⁶Nẹ ẹdẹ rẹ ẹsosuọ rẹ emeranvwe rẹ ighwrẹn ayen de mu izobo rẹ ẹtorhẹ phihọ kẹ Ọrovwohwo. Ẹkẹvuọvo ye a ji vwẹ uchivwo rẹ uwevwi rẹ Ọrovwohwo na vi-i.

⁷Ọtiọye ayen da vwẹ igho kẹ otu re ma uwevwi na vẹ otu rẹ ewena, kugbe emuọre, idi, kugbe evwri kẹ ihwo ri Sidọn kugbe ihwo ri Taya, rere ayen ghwa igedu nẹ Lẹbanọn rhe kpo obo abadi, kpo Jọpa, kirobo Sairọs ovie ri Pẹsha rhọvwe kẹ ayen.

⁸Vwẹ ukpe rivẹ rẹ ayen vwọ rhe uwevwi rẹ Ọghẹnẹ vwi Jerusalẹm, vwẹ emeranvwe rivẹ, Zerubabẹl rẹ ọmọ ri Shealtiẹl kugbe Jeshua rẹ ọmọ ri Jozadak da tuẹ ebabọn na phihọ, kugbe imoni rayen ri chekọ, irherẹn na vẹ ihwo ri Livae kugbe ayen ejobi re rhe Jerusalẹm nẹ ighuvwu rhe. Ayen da vwẹ ihwo ri Livae vwo rnu, nẹ ẹgbukpe uje kpenu, rere ayen ni iruo rẹ uwevwi rẹ Ọrovwohwo na.

⁹Kọye Jeshua vẹ emọ rọye re emeshare kugbe imoni rọye kugbe Kadmiẹl vẹ emọ rọye, emọ ri Juda, ayen de kuoma gbe vwọ vwẹ ẹro te ihwo ri ruiruo vwẹ uwevwi rẹ Ọghẹnẹ na, vẹ emọ ri Henadad vẹ ihwo ri Livae, kugbe emọ rayen vẹ imoni rayen.

¹⁰Ọke rẹ ihwo na re bọn uwevwi na vwo mu uchivwo rẹ uwevwi rẹ Ọrovwohwo na vi nu, irherẹn na vẹ iwun rayen da rhe vẹ owanre, kugbe ihwo ri Livae na, emọ rẹ Asaf, vẹ imikiri, rere e vwo jiri Ọrovwohwo, kirobo ri Devid ovie rẹ Izrẹl djeri.

¹¹Ayen da so ine ohwohwo kuo kẹ ohwohwo, ine rẹ ejiro vẹ ẹkpẹvwẹ kẹ Ọrovwohwo, Kidie o yoma, Kidie eguọnọ rọye ro jẹrhẹriẹ na herọ bẹdẹ kpahe Izrẹl Ihwo na ejobi de kperi ukperi ọgangan, rẹ ayen vwo jiri Ọrovwohwo na, fikiridie e mu uchivwo rẹ uwevwi rẹ Ọrovwohwo na vi nure.

¹²Ẹkẹvuọvo buebu rẹ irherẹn na vẹ ihwo ri Livae na kugbe igbuyovwi rẹ uwevwi rẹ esemọ na, ekpako re mrẹ uwevwi rẹ ẹsosuọ na, da viẹ kperi gangan rẹ ayen vwọ mrẹ uchivwo rẹ uwevwi nana re vwo vi na, dede na buebu de kperi ukperi rẹ aghọghọ.

¹³Ọtiọye na ihwo na gbi se vughe ofẹnẹ rẹ edo rẹ aghọghọ vwo nẹ edo rẹ oviẹ rẹ ihwo-o, fikiridie ihwo na kperi gangan, e de nyo umri rọye vwẹ ogboko.