Read urhobo Ezra 5 Bible Online

Ezra 5 - urhobo bible

Ezra 5

¹Asakiephana emraro na, Hegae vi Zakaraya rẹ ọmọ rẹ Iddo, da mraro kẹ ihwo ri Ju re hẹ obi Juda kugbe Jerusalẹm, vwẹ odẹ rẹ Ọghẹnẹ rẹ Izrẹl ro vwẹ ayen.

²Etiyin Zerubabẹl omọ ri Shealtiẹl kugbe Jeshua ọmọ ri Jozadak de vrẹn, ayen ke rhoma bọn uwevwi rẹ Ọghẹnẹ rọ hẹ obi Jerusalẹm, emraro rẹ Ọghẹnẹ, de mudia kẹrẹ ayen re cha ayen uko.

³Vwẹ ọke yena Tattenai osun rẹ ubrakpọ rẹ Obovrẹn rẹ Urhie na vi Shetarbozenai kugbe irivẹ rayen de bru ayen rhe re ta ota ọtiọna kẹ ayen nẹ, Ono ke ovwan urhi nẹ ovwan bọn uwevwi na kugbe rere ovwan ruo re?

⁴Ayen da je nọ ayen ọnana, Didi odẹ rẹ ihwo re bọn uwevwi nana?

⁵Ẹkẹvuọvo ẹro rẹ Ọghẹnẹ rayen ọ hẹ enu rẹ ekpakọ ri Ju na, ayen gbẹ sa da ayen obọ ji-i, bẹsiẹ rẹ ota na vwo te obọ ri Dariọs kugbe ẹkpahọ ro che nẹ obọ rọye cha.

⁶Isiesi rẹ ọbe ri Tattenai osun rẹ ubrakpọ rẹ Obovrẹn rẹ Urhie na vẹ Shetabozenai vẹ otu rọye si vwo rhe Dariọs ovie na.

⁷Ayen da vwẹ iyẹnrẹn vwo rhe, re siri ọtiọna nẹ: Vwọ kẹ Dariọs ovie na, ufuoma ejobi.

⁸Jẹn ovie riẹn nẹ avwanre kpo ubrakpọ ri Juda, re te uwevwi rẹ Ọghẹnẹ rode na. A ra vwẹ eragha ride bọn, e mu ighere phihọ igbẹhẹ rọye nure, iruo na rayan ghwraghwra-ghwra. O ji ghwe yovwẹ vwẹ abọ rayen.

⁹Etiyin avwanre da nọ ekpakọ na, avwanre da ta ke ayen otiọna, Ono kẹ ovwan ogangan nẹ ovwan bọn uwevwi nana kugbe rere ovwan ruo re?

¹⁰Avwanre da je nọ ayen ekpẹn rẹ odẹ rayen, rere avwanre mrẹ obo rẹ avwanre vuẹ wẹ, rere avwanre ji si edẹ rẹ ihwo ri vwo uyovwi vwọ.

¹¹Ọtiọna koye ayen kpahe kẹ avwanre. Avwanre idibo rẹ Ọghẹnẹ rẹ odjuvwu vẹ akpọ, kẹ avwanre rhoma bọn uwevwi na re a bọnre vwẹ ikpe buebu re, rẹ ovie rode ọvo vwẹ Izrẹl bọnre, ro ji re.

¹²Ẹkẹvuọvo fiki robo rẹ esẹ rẹ avwanre vwo ru Ọghẹnẹ rẹ odjuvwu emu rẹ ophu, kọye o de mu ayen phihọ obo ri Nebukadreza ovie rẹ Babilọn, ohwo ri Kaldia, rọ guọghọ uwevwi nana ọ de mu ihwo na kpo Babilọn.

¹³Ẹkẹvuọvo vwẹ ukpe rẹ ẹsosuọ ri Sairọs ovie ri Babilọn, Sairos ovie na de ji urhi tanẹ uwevwi rẹ Ọghẹnẹ nana a rhoma bọn.

¹⁴Te oro kugbe ekuakua rẹ idọnọ rẹ uwevwi rẹ Ọghẹnẹ, ri Nebukadreza muru nẹ uwevwi na vwi Jerusalẹm vwo kpo uwevwi ri Babilọn, enana Sairọs ovie rhoma reyọ nẹ uwevwi ri Babilọn vwọ rhe, a da ghwẹ ayen vwọ kẹ ohwo ọvo re se Sheshbazar, ro vwo mu osun.

¹⁵Etiyin o da ta kẹ nẹ, gba reyọ ekuakua nana, rere wo re mu ayen phihọ uwevwi rẹ ẹga rẹ obi Jerusalẹm, rere wọ je ayen rhoma bọn uwevwi rẹ Ọghẹnẹ phihọ ẹdia rọye.

¹⁶Kẹ etiyin Sheshbazar nana da rhe re vwẹ uchivwo rẹ uwevwi rẹ Ọghẹnẹ ro obi Jerusalẹm na viotọ nẹ ọke yena rhi te nonẹ e vwo mu uwevwi na phihọ ebon, ye a je sa bọn re-e.

¹⁷Fiki rẹ ọtiọye na, o de je ovie, e gbẹ jẹ a ra hiẹ uwevwi ra da sẹro rẹ ẹbe kẹ ovie vwẹ obi Babilọn, sa sa mrẹ urhi ri Sairọs ovie jiri kpahe ebabọn rẹ uwevwi rẹ Ọghẹnẹ rọ obi Jerusalẹm. Rere ovie kpahe obo ro jere rhe avwanre vwẹ oma rẹ ota nana.