Read urhobo Ezra 7 Bible Online

Ezra 7 - urhobo bible

Ezra 7

¹Asakiephana rẹ enana vwọ wan nu, vwẹ ẹriọ rẹ Artaxterxes ovie ri Pẹsha, Ẹzra rẹ ọmọ ri Seraya, ọmọ rẹ Azaraya, ọmọ ri Hilkaya,

²ọmọ ri Shallum, ọmọ rẹ Zadọk, ọmọ rẹ Ahitub,

³ọmọ rẹ Amaraya, ọmọ rẹ Azaraya, ọmọ ri Meraiọt,

⁴ọmọ ri Zera-haya, ọmọ rẹ Uzzi, ọmọ ri Bukki,

⁵ọmọ rẹ Abishua, ọmọ rẹ Finehas, ọmọ rẹ Elezaar, ọmọ rẹ Erọn rẹ olotu rẹ irherẹn —

⁶Ẹzra nana koye ne Babilọn rhe. Osiọbe o ruẹ rọ riẹn kpahe urhi ri Mosis rẹ Ọrovwohwo rẹ Ọghẹnẹ rẹ Izrẹl vwọ kẹ, ovie da vwẹ emu ejobi rọ guọnọre vwọ kẹ, kidie obọ rẹ Ọrovwohwo Ọghẹnẹ rọye vẹ ọye herọ.

⁷Evo da je yan kpo Jerusalẹm, vwẹ ukpe righwrẹn rẹ Artaxserxes rẹ ovie na, ihwo ri Livae, ibuine kugbe irhẹrhẹche, kugbe idibo rẹ uwevwi na.

⁸Ọ da rhe Jerusalẹm vwẹ emeranvwe riyori, kọye ukpe righwrẹn rẹ ovie na,

⁹kidie vwẹ ẹdẹ rẹ ẹsosuọ rẹ emeranvwe rẹ ẹsosuọ ọye o vwo mu oyan nẹ Babilọn rhe, vwẹ ẹdẹ rẹ ẹsosuọ vwẹ emeranvwe riyori o de rhi te Jerusalẹm, kidie obo esiri rẹ Ọghẹnẹ vọye herọ.

¹⁰Kidie Ẹzra vwẹ ẹnwẹ roye kpahe eyono rẹ urhi rẹ Ọrovwohwo na, rere o vwo ruo, rere o vwo yono iji kugbe urhi rọye vwẹ Izrẹl.

¹¹Ọnana kọye isiesi rẹ ọbe re siri rẹ Ovie Artaxserxes vwọ kẹ Ẹzra rẹ orherẹn na, osiọbe rọ riẹn eta rẹ irhi rẹ Ọrovwohwo na vẹ iji rọye ro ji kẹ Izrẹl.

¹²Artaxserxes ovie rẹ ivie, vwo rhe Ẹzra rẹ orherẹn na, osiọbe rẹ urhi rẹ Ọghẹnẹ rẹ Odjuvwu.

¹³Vwẹ asakiephana, mi ji urhi neẹ, kohwo kohwo vwẹ Izrẹl na, eyẹ irherẹn rayen eyẹ ihwo ri Livae vwẹ evun rẹ uvie mẹ na rẹ ọ guọnọre nẹ ọye kpo Jerusalẹm se nene uwe yanran.

¹⁴Kidie ovie ji we vẹ ediaguare rọye ighwrẹn nẹ wọ ra guọnọ otọ rẹ Juda vi Jerusalẹm, kirobo rẹ urhi rẹ Ọghẹnẹ, rọ hẹ obọ wẹn epha.

¹⁵Ku wọ je ghwẹ idọnọ vẹ iro rẹ ovie vẹ ediaguare rọye reyọ vwo ruẹse kẹ Ọghẹnẹ rẹ Izrẹl, rẹ ẹdia rọye hẹ Jerusalẹm.

¹⁶Wọ je reyọ idọnọ vẹ iro re wa sa mrẹ vwẹ ubrakpọ ri Babilọn, ji kugbe ẹse ro nẹ evun rhe rẹ ihwo na vẹ irherẹn na, re ayen vwẹ evun esiri ve vwọ kẹ uwevwi rẹ Ọghẹnẹ rayen rọ hẹ obi Jerusalẹm.

¹⁷Vwẹ evun rẹ igho nana kẹ etiyin wo da vwẹ oma te otọ vwọ dẹ irhuẹn rẹ eshare, ughwanran, kugbe imigodẹ, vẹ eka rẹ izobo kugbe udi rayen, ku wọ vwẹ ayen ejobi ze izobo kẹ Ọghẹnẹ vwẹ enu rẹ agbada vwẹ uwevwi rọye vwi Jerusalẹm.

¹⁸Kemu kemu ro yovwi kẹ wẹ vẹ imoni wẹn nẹ ovwan reyọ idọnọ vẹ iro ri chekọ vwo ru, we se vwo ru, kirobo rẹ Ọghẹnẹ wẹn guọnọre.

¹⁹Ekuakua na ra vwọ kẹ wẹ fiki rẹ iruo rẹ uwevwi rẹ Ọghẹnẹ wẹn na, ku wọ ghwẹ ayen phihọ obaro rẹ Ọghẹnẹ ri Jerusalẹm.

²⁰Kemu kemu ọfa de ji chekọ ra guọnọre fiki rẹ uwevwi rẹ Ọghẹnẹ wẹn, ro fe obo re wa dẹ, wa dia evun rẹ ekpu rẹ igho rẹ ovie na da dẹ.

²¹Mẹvwẹ, rẹ Artaxserxes rẹ ovie na ri ji urhi vwọ kẹ otu rẹ eyọnrigho vwẹ ubrakpọ rẹ Obovrẹn rẹ Urhie na kemu kemu rẹ Ẹzra rẹ orherẹn na, vẹ osiọbe rẹ urhi rẹ Ọghẹnẹ rẹ odjuvwu guọnọre vwẹ obọ rẹ ovwan, wa nabọ vwẹ oma kpotọ ruo,

²²rhiri re te talent ujori rẹ idọnọ, ovwanvwọn rẹ ọka ujori vẹ iputusẹ ujori rẹ udi, eghwara rẹ evwri ujori vẹ ughweraka buebu.

²³Kemu kemu ejobi rẹ Ọghẹnẹ rẹ Odjuvwu tare nẹ e ru, e je ruo gbagba rere ophu vwo je muo vwọ kpahe uwevwi rẹ ovie vẹ emọ rọye.

²⁴Avwanre je vuẹ ovwan nẹ, ofori rere ovwan kru oghwa rẹ osa rẹ uyovwi, osa rẹ otọ, vẹ arhọghọ nyẹ irherẹn na vẹ ihwo ri Livae na, ibuine na vẹ ihwo re rhẹrẹ anurhoro, idibo rẹ uwevwi rẹ ẹga na vẹ idibo efa rẹ uwevwi rẹ Ọghẹnẹ na-a.

²⁵Te owẹ rẹ Ezra, kirobo ẹ ẹghwanre rẹ Ọghẹnẹ wẹn rọ hẹ obọ wẹn epha, gba vwẹ iguẹdjọ rẹ itete vẹ iride vwo mu vwẹ ubrakpọ rọ Obovrẹn rẹ Urhie na, ọtiẹ oghẹre rẹ ihwo ri vwo erianriẹn rẹ urhi rẹ Ọghẹnẹ wẹn na, kugbe otu re riẹn aye-en, ku wo yono ayen.

²⁶Kohwo kohwo ro rhe mu ọghọ kẹ urhi rẹ Ọghẹnẹ vẹ urhi rẹ ovie-e, e je vwo guẹdjọ rere e brorhiẹ rẹ ughwu hwe eyẹ a djẹ nẹ orere eyẹ e gborho ekuakua rọye, eyẹ e muo phihọ uwodi.

²⁷Ebruphihọ kẹ Ọrovwohwo, Ọghẹnẹ rẹ esẹ rẹ avwanre, ro phi oghẹre rẹ emu ọtiọna phihọ udu rẹ ovie, nẹ ọ ra rhuẹrẹ uwevwi rẹ Ọghẹnẹ rọ hẹ obi Jerusalẹm.

²⁸Ọ ro djẹ ẹguọnọ ro jẹrhẹriẹ rọye vwọ kẹ vwẹ vwẹ obaro rẹ ovie vẹ ediaguare rọye, kugbe igbuyovwi rọye. Udu mẹ da gan, kidie obọ rẹ Ọrovwohwo rẹ Ọghẹnẹ mẹ vẹ ovwẹ herọ, me da reyọ uvi rẹ ihwo nẹ emọ rẹ Izrẹl rhe nẹ inene uvwe yanran.