Read urhobo Ezra 8 Bible Online

Ezra 8 - urhobo bible

Ezra 8

¹Enana keye igbuyovwi rẹ uwevwi rẹ esẹ rayen, ọnana koye uvwiẹ rẹ otu rẹ ihwo ri nene uvwe nẹ Babilọn rhe, vwẹ ọke rẹ ẹriọ rẹ Artaxserxes ovie na:

²Vwẹ emọ ri Finehas, Gershọm. Vwẹ emọ rẹ Itamar, Daniẹl. Vwẹ emọ ri Devid, Hattush,

³vwẹ emọ ri Shekanaya. Vwẹ emọ ri Parosh, Zekaraya, vẹ ihwo re si vwọ ba da dia ujori kugbe ujuvẹ gbẹ ihwe.

⁴Vwẹ emọ ri Pahatmoab, Eliehoenai ọmọ ri Zerahaya, ji kugbe eshare uri efa ri nenire.

⁵Vwẹ emọ ri Zattu, Shekanaya rẹ ọmọ ri Jahaziẹl, ji kugbe eshare ujori erha ri nenire.

⁶Vwẹ emọ rẹ Adin, Ebẹd rẹ ọmọ ri Jonatan, ji kugbe eshare ujuvẹ gbẹ ihwe ri nenire.

⁷Vwẹ emọ rẹ Elam, Jeshaya rẹ ọmọ rẹ Atalaya, ji kugbe eshare ujorha gbẹ ihwe ri nenire.

⁸Vwẹ emọ ri Shefataya, Zebadaya ọmọ ri Maikẹl kugbe eshare ujọne ri nenire.

⁹Vwẹ emọ ri Joab, Obadaya rẹ ọmọ ri Jehiẹl, kugbe eshare uri gbẹ ihwe gbẹ ẹrenren ri nenire.

¹⁰Vwẹ emọ ri Bani, Shelọmit rẹ ọmọ ri Josiphaya, kugbe eshare ujori gbẹ ujorha ri nenire.

¹¹Vwẹ emọ ri Bebai, Zekaraya, ọmọ rẹ Bebai, kugbe eshare uje gbẹ ẹrenren ri nenire.

¹²Vwẹ emọ rẹ Azgad, Johanan rẹ ọmọ ri Hakkatan, kugbe eshare ujori gbẹ ihwe ri nenire.

¹³Vwẹ emọ rẹ Adonikam re rhere vwẹ ukuko na, edẹ rayen da dia Elifẹlẹt, Jeuẹl vẹ Shemaya, kugbe eshare ujorha ri nene ayen.

¹⁴Vwẹ emọ ri Bigvai, Utai vẹ Zakkur, kugbe eshare ujorha gbẹ ihwe ri nene ayen.

¹⁵Mi de si ayen ejobi koko vwọ rhe urhie rọ djẹ kpo Ahava, kẹ etiyin avwanre muerhọ phihọ ẹdẹ erha. Ri mi vwo rhivwi nẹ ihwo na vẹ irherẹn na ejobi yariẹ, me rha mrẹ emọ rẹ Livae ọvuọvo vwẹ etiyi-in.

¹⁶Etiyin mi de ji ohwo re se Eliezẹr, Ariel, Shemaya, Elnatan, Jarib, Elnatan, Natan, Zekaraya, vi Meshullam, uvi rẹ ihwo rayen, ji kugbe Joiarib vẹ Elnatan, ihwo ri roro emu kokodo,

¹⁷mi de ji ayen uwevwi bru Iddo, olori vwẹ asan re se Kasifaya, ra ta ke ayen obo rẹ ayen vuẹ Iddo kugbe imoni rayen, idibo rẹ uwevwi vwẹ asan re se Kasifaya nẹ ayen jẹ ihwo ri gbẹ odibo vwẹ uwevwi rẹ Ọghẹnẹ rẹ avwanre na rhe.

¹⁸Fiki rẹ obọ esiri rẹ Ọghẹnẹ rẹ avwanre ro nene avwanre dia na, ayen de ji ọshare ọvo ro vwo eriariẹ vwo rhe avwanre, vwẹ usun rẹ emọ rẹ Mahli rẹ ọmọ ri Livae, ọmọ rẹ Izrẹl, re se Sherebia vẹ emọ rọye, kugbe imoni rọye, ayen ihwe gbẹ ẹrenren,

¹⁹ji te Hashabaya, vẹ Jeshaya vẹ emọ rẹ Merari vẹ imoni rọye kugbe emeshare rayen ejobi da dia uje.

²⁰A ke rha mrẹ e re ga ẹga vwẹ uwevwi na ujosan ri Devid vẹ iruiruo rọye sanọre phihọ akakọ nẹ cha ihwo ri Livae na uko. E mu odẹ kẹ ayen ejobi.

²¹Mi de ji urhi nẹ avwanre ejobi gbe chirin owẹvwe vwẹ oma rẹ urhie rẹ Ahava, rere avwanre vwọ mrẹ asan vwọ vwẹ oma rẹ avwanre vwo kpotọ vwọ kẹ Ọghẹnẹ rẹ avwanre, re a vwọ guọnọ vwẹ obọ rọye idjerhe rọ phiọnre vwọ kẹ oma rẹ avwanre, vẹ emọ rẹ avwanre kugbe ekuakua rẹ avwanre vwori ejobi.

²²Fikiridie oma vo vwẹ re me vwọ ta kẹ ovie nẹ ọ vwẹ otuofovwi vẹ otu re gua iyesi ri nene avwanre je chọ avwanre nẹ obọ rẹ ivwighrẹn rẹ avwanre vwẹ idjerhe, kirobo rẹ avwanre ta kẹ ovie jovwo nẹ, Obọ rẹ Ọghẹnẹ rẹ avwanre yovwi kẹ ihwo ejobi re guọnerọ, ogangan rẹ ophu rọye herọ kpahe ihwo ejobi re senrọ.

²³Kọye avwanre de chirin owevwi, avwanre da rẹ Ọghẹnẹ fiki rẹ emu nana, ọ da ghene kerhọn rẹ orẹ rẹ avwanre.

²⁴Etiyin me da sanọ irherẹn re ka obaro ihwive phihọ akakọ, Sherebaya, Hashabaya kugbe imoni rayen re eshare ihwe.

²⁵Me da vwanvwẹ idọnọ vẹ iro vwọ kẹ ayen kugbe ekuakua rẹ izobo rẹ uwevwi rẹ Ọghẹnẹ rẹ avwanre rẹ ovie na vẹ ediaguanre rọye kugbe ehọnvwọnre rọye kugbe Izrẹl ejobi phi phihọ otọ.

²⁶Me da vwanvwẹ talẹnt rẹ idọnọ ujori esan gbẹ ujuvẹ gbẹ ihwe phihọ obọ rayen, kugbe ekuakua rẹ idọnọ ri te talẹnt ujori, kugbe talẹnt rẹ oro ujori.

²⁷Idjokpo uje rẹ oro rọ ghanre te darik uriori, ji kugbe ize iyoyovwi ivẹ rẹ ẹronvwo oyoyovwi ro lo wrowro kerẹ oro ọghanghanre.

²⁸Me da ta kẹ ayen, Ovwan pha fuanfon kẹ Ọrovwohwo, ekuakua rẹ ovwan na efuanfon, idọnọ vẹ iro na kẹ ẹse rẹ evun esiri kẹ Ọrovwohwo, Ọghẹnẹ rẹ esẹ rẹ ovwan.

²⁹Rhẹrẹ ayen sẹro rẹ ayen bẹsiẹ wọ vwọ vwanvwẹ ayen vwẹ irharo rẹ ilori rẹ irherẹn na kugbe ihwo ri Livae kugbe igbuyovwi rẹ uwevwi rẹ esẹ rẹ Izrẹl vwi Jerusalẹm, vwẹ evun rẹ ivun rẹ uwevwi rẹ Ọrovwohwo na.

³⁰Ọtiọye na, irherẹn vẹ ihwo ri Livae na da reyọ ovwanvwọn rẹ idọnọ na kugbe oro na vẹ ekuakua na, rere ayen ghwa ayen kpo Jerusalẹm, kpo uwevwi rẹ Ọghẹnẹ rẹ avwanre.

³¹Etiyin avwanre de vrẹn nẹ urhie rẹ Ahava vwẹ ẹdẹ rihwivẹ rẹ emeranvwe rẹ ẹsosuọ na, vwọ kpo Jerusalẹm, obọ rẹ Ọghẹnẹ rẹ avwanre vẹ avwanre herọ, o de sivwi avwanre nẹ obọ rẹ ivwighrẹn rẹ avwanre re hwa hẹrhẹ avwanre vwẹ idjerhe.

³²Avwanre da rhe Jerusalẹm, kẹ etiyin avwanre diare ẹdẹ erha.

³³Vwẹ ẹdẹ rẹne, vwẹ evun rẹ uwevwi rẹ Ọghẹnẹ rẹ avwanre, tẹ idọnọ vẹ iro kugbe ekuakua na a da vwanvwẹ ayen phihọ obọ ri Meremọt rẹ orherẹn, ọmọ rẹ Uraya, Eleazar rẹ ọmọ ri Finehas je vwọ ba, ihwo ri Livae na, Jozabad rẹ ọmọ ri Jeshua kugbe Noadaya rẹ ọmọ ri Binnui je vwọ ba.

³⁴Ayen ejobi de kere ayen a da vwanvwẹ ayen, uche ovwanvwọn rẹ ọvuọvo e de sio phihọ otọ.

³⁵Vwẹ ọke yena otu ri nẹ ighuvwu rhe na, ri rhivwi nẹ imu rhe na, de ze izobo rẹ ẹtorhẹ kẹ Ọghẹnẹ rẹ Izrẹl, irhuẹn rẹ eshare ihwivẹ, eghwanran ujone gbẹ ihwe gbẹ esan, imigode ujorha gbẹ ihwe gbẹ ighwrẹn, kerẹ izobo rẹ umwemwu, ẹkpro ihwivẹ, enana ejobi kẹ izobo rẹ ẹtorhẹ vwọ kẹ Ọrovwohwo.

³⁶Ayen da vwẹ urhi vẹ ovuẹ rẹ ovie vwọ kẹ inotu rẹ ovie re hẹ Obovrẹn rẹ Urhie na, ayen da chọ ihwo na, vẹ uwevwi rẹ Ọghẹnẹ uko.