Read urhobo Nehemaya 3 Bible Online

Nehemaya 3 - urhobo bible

Nehemaya 3

¹Ẹbẹre re djeri nẹ a rhuẹrẹ Etiyin Eliashib rẹ olori rẹ Irherẹn de vrẹn ọ vẹ iniọvo rọye rẹ irherẹn na ayen da bọn igbẹhẹ rẹ Anurhoro rẹ Igegede ayen de ruo fon, ayen ghwẹ ẹchẹ phihọ, ayen de ruo fon rhiri rhi te Ohẹrhẹ rẹ Ujori, rhiri re te Ohẹrhẹ ri Hananel.

²Ihwo re Jeriko da rha bọn kerẹ. Ihwo rẹ Zakuri ọmọ re Imri da je bọn kẹrẹ.

³Emọ ri Hassena-ah da bọn Anurhoro rẹ Eri, ayen de mu ighere phihọ, ayen da ghwẹ ẹchẹ phihọ kugbe ejẹhọ vẹ isiaphrẹ

⁴O rọ vwọ kpahe ayen Mẹrẹmọt ọmọ rẹ Yuraya, ọmọ ri Hakọz da rhuẹrẹ. O rọ vwọ kpahe ayen ki Meshulam ọmọ ri Berikaya, ọmọ ri Meshezahel da rhuẹrẹ. O rọ vwọ kpahe ayen Zadọk ọmọ ri Baana da rhuẹrẹ.

⁵Ọ rọ vwọ kpahe ayen Ihwo ri Tekoa da rhuẹrẹ. Ẹkẹvuọvo otu rẹ ehọnvwọre na rhe phi iroro rẹ ayen phihọ iruo rẹ Orovwaye na-a.

⁶Jehaida ọmọ ri Paseah vi Meshulam rẹ ọmọ ri Besọdeiah da rhuẹrẹ Anurhoro re Awanre na. Ayen de mu ighere phihọ, ayen da ghwe ẹchẹ vẹ isiaphre kugbe egbẹn phihọ.

⁷Ọ rọ rhuẹrẹ vwọ kpahe ayen ki Melatiah ohwo ri Gibeọn kugbe Jadọn ohwo ri Merọn, ihwo ri Gibeọn vẹ ihwo ri Mizpah, re hẹ otọ rẹ isuesun rẹ osun re ubrotọ rọ hẹ obovrẹn rẹ Urhie na.

⁸Ọ rọ vwọ kpahe ayen Uzziẹl ọmọ ri Harhaya Oduvwiro, da je rhuẹrẹ Ọ rọ vwọ kpahọ ki Hananiah, ọvo vwe ihwo ri ruẹ ishani na, da re rhuẹrẹ, ayen da rhuẹrẹ Jerusalẹm rhiri re te Igbẹhẹ Ohẹhẹre na.

⁹Ọ rọ kpahe ayen ọmọ rẹ Hur ro suẹn abọvo ri Jerusalẹm da rhuẹrẹ.

¹⁰Ọ rọ kpahe ayen Jedayah ọmọ rẹ Harumaf da rhuẹrẹ asan ro hirhe opharo ku uwevwi rọye, ọ rọ vwọ kpahe Hattuah ọmọ ri Hashabaniah da rhuẹrẹ.

¹¹Malkijah ọmọ ri Harim vẹ Hashub ọmọ ri Pahatimoab da rhuẹrẹ ẹbẹre rivẹ na kugbe Ohẹrhẹ rẹ Ovini.

¹²Ọ rọ kẹre ke Shallum ọmọ ri Hallohẹsh, o ro suẹn abọvo ri Jerusalẹm, ọ da rhuẹrẹ phihọ, te ọye ve emetẹ rọye.

¹³Hanum vẹ ihwo re Zanoah da je rhuẹrẹ Anurhoro rẹ iyara na, ayen rhoma bọn, ayen da ghwẹ ẹchẹ rọye phihọ isiaphrẹ rọye vẹ egbẹn rọye, ayen da rhuẹrẹ kubit ujuhwe vwẹ oma rẹ igbẹhẹ na, rhiri re te Unurhoro rẹ Isọn na.

¹⁴Malkujah ọmọ ri Rekab, osun vwẹ ubrotọ ri Bethakrem, da rhuẹrẹ unu rẹ Unurhoro Isọn na, o rhoma bọn ọ da ghwe ẹchẹ phihọ, isiaphre rọye veẹ egbẹn rọye.

¹⁵Shallum ọmọ ri Kọlhozeh, osun re ubrotọ ri Mizpah, da rhuẹrẹ Ughere rẹ Ogbugbu na, ọ rhoma bọn o de rhurho, o de mu ẹchẹ rọye vi, isiaphre vẹ ejẹhọ vẹ egbẹn rọye ọ da je bọn igbẹhẹ rẹ ẹtẹrhẹ ri Shẹlah rọ hẹ ọgba rẹ ovie, rhiri re te agbada rọ wan nẹ orere ri Devid rhe.

¹⁶Vwẹ ukuko rọye, Nehemaya, ọmọ rẹ Azbuk, osun rẹ abọvo rẹ ubrotọ ri Betzur, ọ da rhuẹrẹ rhiri rhi te asan rọ hirhe opharo ku ushi ri Devid, rẹ owẹ ra tọnre na, ji re te uwevwi re egba re ihwo na.

¹⁷Ro vwo ru nu, ihwo ri Livae da je rhuẹrẹ. Rehum re ọmọ ri Bani, o rọ kpaherọ Hashabiah, osun rẹ abọvo rẹ ubrotọ ri Keilah. Ọ da rhuẹrẹ ubrọtọ rọye.

¹⁸Iniọvo rayen keye rhuẹrẹ kpahọ Bavai ọmọ ri Henadad, osun rẹ abọvo vwẹ ubrotọ ri Keilah.

¹⁹Ọ rọ kpaherọ Ezer ọmọ ri Jeshua, osun ri Mizpah, da rhuẹrẹ ẹkẹn ọfa rọ hirhe aro ku asan re de yere kpo uwevwi rẹ ekuakua rẹ ofovwi rọ ka Ubienyẹ.

²⁰Rha vwo kpahọ Baruch ọmọ ri Zabbai da rhuẹrẹ ubro ọfa nẹ Ubienyẹ re te ẹchẹ rẹ Uwevwi rẹ Eliashib rẹ orherẹn rode.

²¹Rha vwọ kpahọ Meremọt ọmọ re Yuraya, ọmọ re Hakọz, da rha rhuẹrẹ ubro ọfa nẹ ẹchẹ rẹ uwevwi rẹ Eliashib re te oba rẹ uwevwi rẹ Eliashib.

²²Rha vwo kpahọ kẹ irherẹn na, vẹ ihwo re hẹ obo Uphẹphẹn na, da rhuẹrẹ.

²³Rha vwọ kpahọ ayen Bẹnjamm vẹ Bashub da rhuẹrẹ asan ro hirhe aro ku uwevwi rayen. Ro vwo nẹ ayen kẹ Azariah ọmọ ri Maaseiah, ọmọ rẹ Ananiah da rhuẹrẹ orhoma rẹ uwevwi rẹ obọ rọye.

²⁴Ro vwo no nu Binui rẹ ọmọ ri Henadad ọ da rhuẹrẹ akakọ ọfa, ne uwevwi rẹ Azariah re te Ubienyẹ na,

²⁵re te akakọ, Palal ọmọ rẹ Uzai da rhuẹrẹ Ubienyẹ rọ hirhe aro ku ohẹrhẹ na rọ riẹn abọ nẹ uwevwi rẹ enu rẹ ovie na vwẹ asan ọguan rẹ oherhẹ na. Ko vwo no nu ke Pedaya rẹ ọmọ ri Parosh

²⁶kugbe idibo re uwevwi rẹ Ọrovwohwo na re dia enu re Ofẹl da rhuẹrẹ re te asan ro hirhe aro ku Anurhoro rẹ Ame na vwẹ obaro ọnre rọ riẹn abọ kpo obo ohẹrhẹ na.

²⁷Ke ọna vwo no, ihwo ri Tekoa da rhuẹrẹ akakọ ọfa rọ riẹn abọ kpọ obọ ohẹrhẹ rhiri re te igbẹhẹ rẹ Ofẹl.

²⁸Vwẹ obenu rẹ Anurhoro rẹ Iyesi na irherẹn na da rhuẹrẹ, asan ro hirhe aro ku dohwo duwevwi rọye.

²⁹O vwo nẹ ayen nu Zadọk ọmọ rẹ Imma da rhuẹrẹ asan rọ hirhe aro ku uwevwi rọye. Rọ vwọ nọ nu ki Shemaya ọmọ ri Shikaniah, rọ sẹro rẹ Anurhoro rọ hẹ Obarọ ọnre, da rhuẹrẹ.

³⁰Ro vwo no nu ki Hananiah ọmọ ri Shelemiah vi Hanum ọmọ resan ri Zalaf da rhuẹrẹ akakọ ọfa. Ro rhe vwo no nu ki Meshulam ọmọ ri Berekiah da rhuẹrẹ asan ro hirhe aro ku uvun rọye.

³¹Ro vwo no nu Malkijah ọvo vwe idjogun na, da rhuẹrẹ rhiri re te uwevwi rẹ idibo rẹ uwevwi rẹ Ọrovwohwo na, kugbe iri ineki na, ro hirhe aro ku Uwevwi rẹ Ukoko, re te uvun rọ hẹ obenu rọ hẹ akakọ na.

³²Vwe uvwre rọ hẹ obenu vwẹ akakọ na vẹ Anurhoro rẹ Igegede na idjogun na vẹ ineki na da rhuẹrẹ.