Read urhobo Nehemaya 4 Bible Online

Nehemaya 4 - urhobo bible

Nehemaya 4

¹Asakiephana ri Sanballat vwo nyo nẹ avwanre bọn igbẹhẹ na, ivun de miovwo, ophu de muo gangan, ọ da vwẹ ihwo ri Ju jehwẹ.

²Ọ da ta vwẹ irharo rẹ iniọvo rọye vẹ unuofovwi ri Sameria, Die ihwo ri Ju na emọ evwiẹrẹ na ruẹ? Kẹ ayen se ze izobo? Kẹ ayen sa bọnre vwẹ ẹdọke? Kẹ ayen sa ra hiẹ ibieragha ne evun re erhurhu rhe, ibieragha re torhẹre na?

³Tobiah ohwo rẹ Ammọn mudia kẹrẹ, ọ da ta, Uyota, obo rẹ aycn bọn na — urhiranko de yere enu rọye o vwirhi igbẹhẹ rẹ oragha rayen na.

⁴Nyo E Ọghẹnẹ rẹ avwanre, kidie a je avwanre fia, Rhẹriẹ ọjefia rayen phihọ uyovwi rayen, jẹn ogborho rhi gborho ayen vwẹ otọ re che mu ayen imu ra na.

⁵Wo rhurhu abe raye-en wọ je phoro imwemwu rẹ ayen nẹ vwẹ obaro wẹ-ẹn; kidie ayen kpare ophu wẹn vwẹ obaro rẹ ihwo re bọn igbẹhẹ na.

⁶Ọtiọye, avwanre da bọn igbẹhẹ na. Igbẹhẹ na ejobi a da rhe rhuọn ayen kugbe rhi te abọvo rẹ enu-era rọye, kidie, ihwo na vwo udu re iruo.

⁷Ẹkẹvuọvo Sanballat vi Tobiah kugbe ihwo rẹ Arebia na kugbe ihwo rẹ Ammọn kugbe ihwo rẹ Ashdọd vwo nyo nẹ avwanre rhuẹrẹ igbẹhẹ ri Jerusalẹm yanran ghwrara, nẹ asan rẹ vare na a ran ayen gbẹ, ivun de miovwi ayen gangan.

⁸Ayen ejobi de se umẹ koko ne ayen cha họnre Jerusalẹm, rere ayen rhi gbẹ ozighi phihọ.

⁹Avwanre da nẹ ẹrhovwo kẹ Ọghẹnẹ rẹ avwanre a da vwẹ erhẹrotọ vwo mu re rhẹrẹ vwẹ ason vẹ uvo.

¹⁰Ẹkẹvuọvo Juda da ta, Ogangan rẹ ihwo re ghwa oghwa hi ro she, ye erhurhu na ji obuebu; kọye avwanre vwo je iruo e se ruo vwe obọ igbẹhẹ na.

¹¹Ivwighrẹ rẹ avwanre da ta, Ayen cha sa riẹ-ẹn, eyẹ mrorẹ-ẹ bẹsiẹ rẹ avwanre vwọ ro uherevie rẹ ayen e mi hwe ayen a me da iruo na ji.

¹²Ọke rẹ ihwo ri Ju re dia kẹrẹ ayen vwọ rhe ayen da ta kẹ avwanre asiehwe nẹ, Ne asan ejobi re ayen dia rhe ayen cha rhe rhe họnre avwanre.

¹³Ọtiọye na vwẹ asan rọ kpotọ ro pheri vwẹ obuko re igbẹhẹ na, vwẹ asan iphephẹ, me da ghare ihwo uvwiuvwie rayen, vẹ elọkọ rayen adjara rayen vẹ umurhabọ rayen.

¹⁴Mi de ni, mi de vrẹn, me da ta ke ehọnvwọre iruiruo kugbe ihwo ri chekọ na ejobi, wa djẹ oshọ re aye-en. Karohọ Ọrovwohwo na, rọ rhoro rọ muoshọ, rere wa họnre kẹ imoni, emọ wẹn, emetẹ wẹn, eya wẹn kugbe uwevwi wẹn.

¹⁵Ọke rẹ ivwighre rẹ avwanre vwọ riẹn nẹ avwanre riẹnre nẹ Ọghẹnẹ gbẹ ozighi phihọ iroro rayen, avwanre ejobi de rhivwi kpo obo igbẹhẹ na, dohwo dako rẹ iruo rọye.

¹⁶Nẹ ẹdẹ yena yanran, abọvo rẹ idibo mẹ ru iruo, ye abọvo ri chekọ yọnrọn, ekpọfia, umurhabọ, kugbe ewun rẹ itehru; isun na ejobi de mudia phihọ obuko rẹ iwevwi ri Juda ejobi,

¹⁷re bọn igbẹhẹ na. Otu re ghwa oghwa e de kru oghwa rayen ọtiọye rere abọvo hẹ oghwa ye abọ rivẹ yọnre adjara.

¹⁸Ohwo ovuọvo re bọn igbẹhẹ na vẹ ọlọkọ rọye vwẹ ako yọ bọn. Ohwo ro hworo ọgban na mudia kẹre ovwẹ.

¹⁹Me da ta ke ehọnvwọre na vẹ otu re iruiruo na kugbe ihwo ri chekọ na, nẹ iruo na ọrhuarho o ke rha hẹrẹ otọ, ye avwanre tephe keẹ ohwohwo, vwe enu re igbẹhẹ na.

²⁰Vwẹ asan we de nyo edo rẹ ọgban, we rhi bi gba avwanre vwẹ etiyin. Ọghẹnẹ re avwanre cha họnre kẹ avwanre.

²¹Ọtiọye kọye avwanre ru iruo na, abọvo rẹ ayen da yọnre adjara ne irhiọke rhiri re te ọke re isio vwọ varhe.

²²Me da ji ihwo na vwẹ ọke yena nẹ E jẹn ohwo ọvuọvo vẹ idibo rọye vwerhe evun ri Jerusalẹm, rere ayen dia erherotọ ke avwanre vwẹ ason rere ayen rha wian owian vwẹ uvo.

²³Ọtiọye na mẹvwẹ eye iniọvo mẹ eyẹ idibo mẹ eyẹ erhẹrotọ na ri nene uvwe, avwanre ohwo ovuọvo ro ku ewun nẹ oma herọ-ọ; dohwo dekuakua rẹ ofovwi rọye da yọnre vwẹ obọ.