Read urhobo Nehemaya 6 Bible Online

Nehemaya 6 - urhobo bible

Nehemaya 6

¹Asakiephana ra vwọ vuẹ Sanballat vi Tobiah vi Gẹshẹm rẹ ihwo rẹ Arebia kugbe otu re ivwighrẹ rẹ avwanre nẹ mi mu igbẹhẹ ri Jerusalẹm vi re, ne uprophro vuọvo rha hero-ọ, (dede na rhi te ọke yena ye me je ghwẹ ẹchẹ rẹ anurhoro na phihọ-ọ),

²kẹ etiyin Sanballat vi Gẹshẹm da vuẹ rhe vwe, tanẹ, Yanrhe re avwanre vwọma vwẹ ọke ọvo vwẹ uphephẹ rẹ Ono Ẹkẹvuọvo iroro umwemwu ayen jẹ kpahe ovwẹ.

³Etiyin me da vuẹ ihwo rhe ayen, tanẹ, Mi ruiruo rode me cha sa rhe-e. Me da yan bru we rhe iruo na rhe mudje-e?

⁴Abọ-ẹne ayen jẹ ikọn bru vwe rhe ota ọvuọvo na me je kpahe ke ayen.

⁵Je vwẹ obọ ọvuọvo na Saballat ji odibo rọye rhe vwẹ abọ riyori vẹ ọbe rọ vwọ kẹ vwo rhe vwe obọ rọye.

⁶E de si phihọ nẹ, E vwo gbẹ ikun vwẹ evun re ẹgborho na, ekpuyovwi ri Gẹshẹm je ta rhe, nẹ wọ vẹ ihwo ri Ju na je iroro rẹ ozighi, kọye sorọ re wa vwọ ma igbẹhẹ na; A je ghwa vwọ phia nẹ wọ vwẹ oma wẹn vwo muẹ ovie kẹ ayen.

⁷Wọ je ghwa vwẹ emraro mu rere ighwoghwo aghwoghwo kẹ wẹ vwi Jerusalẹm nẹ, Ovie hẹ Juda. Asakiephana ka cha nẹ iyẹnrẹn nana keẹ ovie kirobo re eta nana epha na. Vwe ọtiọye gba yanrhe, re avwanre je iroro kugbe.

⁸Etiyin me da vuẹ rhe, tanẹ, E ru emu ọvuọvo ọtiọye kirobo re wọ tare na-a, kidie wọ de vwẹ evun obọ wẹn di muẹ ayen ta

⁹Kidie ayen de dje uguegue muẹ avwanre, ayen ki roro nẹ, Abọ rayen cha ghwrọrọ ne iruo na, e gbi ruo-o. Ẹkẹvuọvo vwẹ asakiephana, E Ọghẹnẹ, gba vwẹ ẹgba vwọ ke abọ me.

¹⁰Asakiephana mi vwo kpo uwevwi ri Shemayah ọmọ ri Delayah, ọmọ ri Mẹhẹtabẹl, re huhu ẹchẹ gbẹ, O da ta, Jẹn avwanre ra vwa oma vwẹ obo uwevwi rẹ Ọghẹnẹ, vwe evuevun rẹ uwevwi rẹ ẹga na, rere avwanre kanre ẹchẹ rọye gboma; kidie ayen cha che hwe we vwẹ ason, ayen cha che hwe we.

¹¹Me da ta, ohwo kere omẹvwẹ na dje? Kono kerẹ omẹvwẹ na sa yanran kpo evun rẹ uwevwi re ẹga ra dia? Me cha ra-a.

¹²Me da riẹn, Me da mrẹ ne ọ dianẹ Ọghẹnẹ ri jiro-o, ọ de mraro nana ghevweghe kpahe ovwẹ kidie Tobiah vi Sanballat durhire.

¹³Fiki rẹ ọnana sorọ re ayen vwo durhie, rere oshọ vwo mu vwe re mi vwo ru ọtiọna re mi vwọ ru imwemwu, rere ayen mrasan mu odẹ ọbrabra kẹ vwẹ re ayen vwẹ ovwẹ jehwẹ vwọ.

¹⁴E Ọghẹnẹ me, karophihọ Tobiah vi Sanballat, vwẹ imu nana rẹ ayen ruru na, je karophihọ Noadiah ọmraro rẹ aye na kugbe emraro ri chekọ re guọnọ djẹ oshọ mu vwe na.

¹⁵Ọtiọye na a da rhe ma igbẹhẹ na toba vwẹ ẹdẹ uje gbẹ iyori rẹ emeranvwe re Elul, vwẹ ẹdẹ ujuvẹ gbẹ ihwivẹ.

¹⁶Re ivwighrẹ rẹ avwanre ejobi vwo nyo re, ẹgborho re yariẹ avwanre phihọ na da rhe vọn vẹ oshọ oma da rhọ ayen; kidie ayen vwe evun roro nẹ e ruiruo nana vwẹ ọchuko rẹ Ọghẹnẹ re avwanre.

¹⁷Ọrọmarho vwẹ ọke yena ehọnvwọre ri Juda de si ẹbe buebu rhe Tobiah, ẹbe ri Tobiah de rhe bru ayen ra.

¹⁸Kidie ihwo buebu vwi Juda vọye duvwu iyori koma, fikiridie ọgọ ri Shekaniah rẹ ọmọ rẹ Arah oruẹ, ọmọ rọye Jehohanan reyọ ọmọtẹ ri Meshullam re ọmọ ri Berekiah vwọ rọvwọ.

¹⁹Ayen gbẹ ikun esiri rọye vwẹ irharo me, ayen da je ghwẹ eta mẹ bro ra. Tobiah de si ọbe rhi vwo guegue uvwe.