Read urhobo Ẹsta 1 Bible Online

Ẹsta 1 - urhobo bible

Ẹsta 1

¹Vwẹ ọke rẹ Ahasuerus ro sunru nẹ India re te Etiopia vwẹ enu rẹ ibrotọ ujosan gbẹ ighwrẹn soso,

²vwẹ ọke yẹna rẹ Ovie Ahasuerus vwo tidia phihọ ekete rẹ uvie rọye vwi Susa rẹ otorere na,

³vwẹ ukpe rerha rẹ usuon rọye o de chere emu kẹ isun vẹ idibo rọye, ilori rẹ ofovwi ri Pẹsha vi Media vẹ ikpihwo ride vẹ isun rẹ ibrotọ re hẹ otọ rọye na,

⁴yọ vwẹ efe vẹ urinrin rẹ uvie rọye vẹ erhuvwu vẹ ọrho rọye vwọ nẹ vwẹ ẹdẹ buebu, ẹdẹ ujurhirin.

⁵Ọke rẹ ẹdẹ nana rhe vwọ gba nu, ovie na de ru ẹse kẹ ihwo ejobi re rhe Susa rẹ otorere na, te ride vẹ itete, orẹ ra rere ẹdẹ ighwrẹn soso, vwẹ evun rẹ ọguan vwẹ ogba rẹ ighẹn rẹ ovie na.

⁶Emwa efuanfon rẹ unurhoro herọ vẹ osirhere rẹ ọgiọgiọ ra vwẹ irihrẹ rẹ esada vẹ isene vwọ sane ra samu isa rẹ idọnọ efuanfon vẹ ichivwo rẹ oragha, egbara rẹ iro vẹ e rẹ idọnọ efuanfon re hẹ enu rẹ imukpe ra vwẹ ibieragha rẹ eghaghare ma.

⁷A da vwẹ iko rẹ iro jẹ idi, iko dohwo daro, a da jẹ ọ rọhọrhọ kẹ ovie kidie ovie na ghwẹ idi phihọ otọ gbidi.

⁸A da da idi na nene urhi, a gba ohwo ọvuọvo da udi na-a, kidie ovie na ji urhi kẹ ilotu rẹ ighẹn rọye nẹ ayen ru kirobo rẹ ohwo ọvuọvo guọnọre.

⁹Aye rẹ ovie Vashti ji chere emu kẹ eya na vwẹ ighẹn rẹ Ovie Ahasuerus na.

¹⁰Vwẹ ẹdẹ righwrẹn, rẹ oma vwọ vwerhọ ovie na fiki rẹ idi rọ dare, ọ da ta kẹ Mehuman, Bizta, Habona, Bizta kugbe Abagta, Zethar, kugbe Kakas, eghwara ighwrẹn ri muẹ idi kẹ Ahasuerus rẹ ovie na,

¹¹rere ayen reyọ Vashti aye rẹ ovie na vẹ erhu rẹ uvie rọye vwọ rhe obaro rẹ ovie, rere o vwo dje erhuvwu rọye kẹ ihwo vẹ isun; fikiridie o vwo erhuvwu gangan.

¹²Ẹkẹvuọvo Vashti rẹ aye rẹ ovie da sen ota rẹ ovie ta kẹ eghwara na nẹ a ta kẹ na. Fiki rẹ ọnana ivun de miovwi ovie na, evun rọye kọ riọ vẹ ophu.

¹³Etiyin ovie da ta kẹ evwẹghwanre re riẹn ọke na — fikiridie ọnana idjerhe rẹ ovie nene kẹ ihwo re riẹn urhi vẹ ẹdjeguo,

¹⁴ihwo re vwọ kpahọ da dia Kashena, Sheta, Admata, Tashishi, Meres, Masena, kugbe Memukan, isun ighwrẹn ri Pẹsha kugbe Media, re mrẹ opharo rẹ ovie na, eye je ihwo ri tidia ka obaro vwẹ uvie na.

¹⁵Kirobo rẹ urhi epha, Didi emu e ru Vashti rẹ aye rẹ ovie na, fikiridie o ru obo rẹ Ovie Ahasuerus tare vwẹ unu rẹ eghwara rọye na na-a?

¹⁶Etiyin Memukan da ta vwẹ irharo rẹ ovie vẹ isun na, Ọ dia ovie na ọvo yẹ Vashti aye rẹ ovie ru chọ-ọ, ẹkẹvuọvo ji te isun vẹ ihwo ejobi re hẹ otọ rẹ Ahasuerus Ovie na.

¹⁷Kidie uruemu ri Vashti aye rẹ ovie na ruru na cha phia kẹ eya na ejobi, kọ cha nẹrhẹ eya na ni eshare rayen saka, kidie ayen cha ta nẹ, Ovie Ahasuerus tare nẹ e se Vashti aye rẹ ovie rhe mrẹ ọye, ye ọ rhere-e.

¹⁸Ẹdẹ ri nonẹ na eya ri Pẹsha kugbe Midia ri nyo kpahe uruemu rẹ aye rẹ ovie ruru na kọ cha ta kẹ isun na, ọjẹfia vẹ ehwẹjẹ ke cha dia buebu.

¹⁹O de je ovie, e gbẹ jo ji urhi, re e rhe sio phihọ irhi rẹ ihwo ri Pẹsha vẹ Media re je kurhẹriẹ, nẹ Vashti gbẹ rhi mudia obaro rẹ ovie Ahasuerus ọfa-a, rere ovie vwẹ edia rọye kẹ aye ọfa ro yovwi nọ.

²⁰Ọtiọye na ọke re de ghwoghwo urhi nana rẹ ovie jiri na nene uvie rọye na ejobi, rọ pha rhuarho na, eya na ejobi ki mu ọghọ kẹ eshare rayen, tẹ ọrode tẹ otutuno.

²¹Ota nana da vwerhe ovie vẹ isun na ejobi, ovie na de ru kirobo rẹ Memukan jẹ iroro rọye na,

²²o de si ọbe nene ibrotọ rẹ uvie rọye na ejobi, ubrotọ ọvuọvo vẹ isiesi rọye, vwọ kẹ ihwo ọvuọvo vwẹ ephẹrẹ rẹ ihwo rọye.