Read urhobo Ẹsta 2 Bible Online

Ẹsta 2 - urhobo bible

Ẹsta 2

¹Rẹ enana ejobi vwọ wan nu, rẹ ophu rẹ Ahasuerus vwo she nu, ọ da rhe karophihọ Vashti vẹ obo ro ruru kugbe urhi ro ji kpahọ.

²Etiyin idibo rẹ ovie na ri gbẹ odibo kẹ da ta, E ja guọnọ emetobẹ vẹ erhuvwu vwọ kẹ ovie na.

³E jẹn uvie na vwẹ ihwo mu vwẹ ibrotọ na ejobi rẹ uvie rọye na rere ayen koko emetobẹ ejobi ri vwo erhuvwu kpo egodo rẹ eya vwẹ Susa rẹ otorere na, vwẹ obo ri Hegai oghwara rẹ ovie ro suẹn na, rere a vwẹ ori rayen kẹ ayen.

⁴We jẹn ọmọtẹ ro jẹ ovie na dia aye rẹ ovie vwẹ ẹdia ri Vashti. Ọnana de je ovie na, o de ru ọtiọye.

⁵Asakiephana ohwo ri Ju ọvo vwi Susa rẹ otorere na odẹ rọye Modekai, ọmọ ri Jair, ọmọ ri Shemei, ọmọ ri Kish, ohwo ri Bẹnjamin,

⁶re muru vwi Jerusalẹm ọ vẹ ighuvwu re mu nene Jekonia ovie ri Juda, ọ ri Nebukadneza ovie ri Babilọn mu yanran.

⁷Ọye re ghẹrẹ Hadasa ghwanre, otọ rọye Ẹsta, ọmọtẹ rẹ oniọvo rọye, fikiridie ọ vwọ ọsẹ yẹrẹ oni-i; ọmọtẹ na vwo erhuvwu gangan ko ji jẹ ihwo, ọke rẹ ọsẹ vẹ oni rọye vwo ghwu nu Modekai de vwo ru ọmọtẹ rọye.

⁸Ọke re vwo ghwoghwo urhi rẹ ovie na, re vwo koko emetẹ na buebu vwi Susa rẹ otorere nu, ra vwọ kẹ Hegai yọnre, a da je vwẹ Ẹsta kpo ighẹn rẹ ovie na a da vwọ kẹ Hegai rọ vwẹ ẹro te eya na yọnre.

⁹Ọmọtẹ na de je ọ da mrẹ ẹro esiri rọye; ọ da djokpakpa vwẹ ori roye kẹ vẹ ẹkẹ emu rọye, kugbe emetẹ ighwrẹn ra sanọre nẹ ighẹn rẹ ovie na rhe, a da reyọ vẹ emetẹ na vwo kpo asan ro me yovwi vwẹ egodo rẹ eya na.

¹⁰Ẹsta ji djẹ ihwo rọye yẹrẹ orua rọye phia-a, fikiridie Modekai tare nẹ o dje phia-a.

¹¹Kẹdẹ kẹdẹ kọye Modekai vwọ yan vwẹ obaro rẹ egodo rẹ eya na, rọ vwọ riẹn obo rẹ Ẹsta yerẹ wan.

¹²Asakiephana rọ rhi vwo te ọke rẹ ọmọtẹ ọvuọvọ vwo bru Ahasuerus rẹ ovie na ra re, rẹ emeranvwe ihwivẹ vwọ gba kirobo rẹ irhi rẹ eya na epha, kidie ọnana ọye ọke rẹ eya na vwọ sẹ, emeranvwe esan ọye e ghwọrọ ori rẹ adjija kugbe emeranvwe esan rẹ egẹn kugbe ori rẹ eya.

¹³Ọke rẹ emetẹ na de bru ovie na kpọ uwevwi vwẹ idjerhe nana ka vwẹ emu rọ guọnọre kẹ rere ọ ghwa nene oma nẹ egodo rẹ eya na kpo ighẹn rẹ ovie na.

¹⁴Ovwonvwon na o da yanran, vwẹ irhiọke ọ mi rhivwi rhe obo egodo rivẹ rẹ ense rọye ri Shaashgaz rẹ oghwara rẹ ovie vwẹ ẹro te na, o gbi rhivwi bru ovie na ọfa-a, jokpa nẹ ovie na guọnerọ rọ de se odẹ nẹ ọ rhe.

¹⁵Ọke ro rhi vwo te ọke rẹ Esta ọmọtẹ rẹ Abihel omoni ri Modekai, rọ reyerọ vwọ ru ọmọtẹ rọye jovwo, ro vwo bru ovie kpo uwevwi, ọ nọ ekpẹn rẹ emu ọvuọvo-o jokpa rẹ obo ri Hegai oghwara rẹ ovie na, ro suẹn eya na ta keẹ. Etiyin Ẹsta da mrẹ ẹruesiri rẹ ihwo ejobi reyọ.

¹⁶Ọke ra vwọ reyọ Ẹsta vwo rhe Ahasuerus rẹ ovie na vwẹ evun rẹ ighẹn rẹ ovie na vwẹ emeranvwe rihwe, rọ dia emeranvwe rẹ Tebẹt, vwẹ ukpe righwrẹn rẹ isuesun rọye,

¹⁷Ẹsta de je ovie na nọ eya na ejobi, ọ da mrẹ ẹse vẹ ẹruesiri rọye nọ emetobẹ na ejobi, etiyin ọ da vwẹ erhu rẹ uvie na tughe uyovwi o de vwo ru aye rẹ ovie vwẹ ẹdia ri Vashti.

¹⁸Etiyin ovie na de chere emu kẹ isun vẹ idibo rọye, ọnana emu ru cheri kẹ Ẹsta. Etiyin ọ da je vwẹ osa rẹ uyovwi vwo ghovwo ihwo vwẹ ubrakpọ yena, o de ru ẹse buebu kẹ ihwo kirobo rẹ ovie ruẹ.

¹⁹Ọke ra vwọ ghwẹ emetobẹ na rhi koko vwẹ obọ rivẹ yi Modekai tidia anurhoro rẹ ovie na.

²⁰Ọke yena yẹ Ẹsta ji dje oma rọye yẹrẹ ihwo rọye phia-a, kirobo ri Modekai ta kẹ, fikiridie Ẹsta nyo ota ri Modekai keresiẹ ra da mrẹ nẹ ọye re ghẹrẹ.

²¹Vwẹ ọkeyena, ri Modekai vwo tidia anurhoro rẹ ovie na, Bigtan vi Teresh, evo vwẹ usun rẹ eghwara rẹ ovie na, re rhẹrẹ anurhoro na, ivun dẹ miovwo ayen kẹ ayen guọnọ Ahasuerus ovie na hwe.

²²Modekai de rhi nyo kpahẹ ọnana, ọ da ta kẹ Ẹsta aye rẹ ovie, Ẹsta da vwẹ odẹ ri Modekai ta kẹ ovie.

²³Ọke ra vwọ guọnọ otọ rọye mrẹ nẹ ọtiọye, e de churu ihwo na ivẹ na si urhe. Etiyin e de sio phihọ ẹbe rẹ ikun rẹ ovie vwẹ irharo rẹ ovie na.