Read urhobo Ẹsta 8 Bible Online

Ẹsta 8 - urhobo bible

Ẹsta 8

¹Ẹdẹ yena Ovie Ahasuerus da reyọ uwevwi ri Heman ọvweghrẹn rẹ ihwo ri Ju na vwọ kẹ Ẹsta aye rẹ ovie. Etiyin Modekai da rhe obaro rẹ ovie, fikiridie Ẹsta dje obo rọ vọye epha ke re:

²Ovie na da yoro isa rọye, ọ rọ reyọ mie Heman jovwo na, ọ da vwọ kẹ Modekai. Ẹsta de phi Modekai phihọ enu rẹ uwevwi ri Heman.

³Etiyin Ẹsta da rhoma ta kẹ ovie na; o de she diguẹ vwẹ asan awọ rọye ọ da re vẹ amioviẹ ro ku iroro imiomiovwi ri Heman rẹ ohwo rẹ Agag vẹ ufi rọ kpahe hẹrhẹ ihwo ri Ju na rhẹriẹ.

⁴Ovie na da kpare ọkpọ rẹ oro na vwo rhe Ẹsta,

⁵Ẹsta de vrẹn o de mudia vwẹ obaro rẹ ovie na. Etiyin ọ da ta, O de je ovie, me da mrẹ ẹroesiri rọye, ọ da dianẹ emu na shephihọ vwẹ ẹro rẹ ovie, mi de rhe ji je vwẹ ẹro, gbẹ ji e si ọbe ra pha urhi ri Heman ohwo rẹ Agag na jiri, ọmọ ri Hamedata, ro siri nẹ a vwọ guọghọ ihwo ri Ju re hẹ ubrakpọ rẹ otọ rẹ ovie na ejobi.

⁶Komavọ mi se vwo odiri vwọ mrẹ ukpokpogho ro bru ihwo me cha na.

⁷Etiyin Ovie Ahasuerus da ta kẹ Ẹsta rẹ aye rẹ ovie vi Modekai rẹ ohwo ri Ju na, Nighe, me vwẹ uwevwi ri Hẹman vwọ kẹ Ẹsta, yẹ ayen ji churo si vwe etan na nure, kidie o che hwe ihwo ri Ju.

⁸Gbe si obo ri je we ejobi vwọ kpahe ihwo ri Ju na, vwẹ odẹ rẹ ovie na, wọ vwẹ isa rẹ ovie na tamuo; fikiridie urhi ra vwẹ isa rẹ ovie tamu nu a gbe sa pha-a.

⁹E de se isiẹbe rẹ ovie na koko vwẹ ọke yena, vwẹ emeranvwe rerha, ọye emeranvwe ri Sivan, vwẹ ẹdẹ uje gbẹ erha; e de si urhi na kirobo ri Modekai tare ejobi vwọ kpahe ihwo ri Ju na vwo rhe ehọnvwọre rẹ ovie, vẹ isun kugbe emo rẹ ivie rẹ ubrakpọ na nẹ India re te Ẹtiopia, ubrakpọ ujosan gbẹ ighwrẹn, ubrakpọ ọvuọvọ vẹ isiesi rọye kuohwo kuephẹrẹ rọye, e de ji vwo rhe ihwo ri Ju vwẹ ephẹrẹ rayen.

¹⁰Isiesi na kẹ odẹ rẹ ovie Ahasuerus e vwo sio a da rha vwẹ isa rẹ ovie tamuo, a da rha vwẹ ẹbe na kẹ ihwo re gua iyesi rẹ ovie, ra ghẹre vwẹ egodo rẹ ovie re vwẹ ayen djẹ yanran.

¹¹Vwẹ ọnana ovie na da vwẹ uphẹ kẹ ihwo ri Ju re hẹ orere ọvuọvo rere i koko rere ayen vwo sivwi arhọ rayen vwo nẹ ẹ guọghọ, vwọ hwe, vwo phorho nẹ otọ kunuofovwi eyẹ kohwo kihwo yẹrẹ ubrakpọ kubrakpọ re kpare ohọnre vwọ so ayen, te emọ rayen vẹ eya rayen, we mi rhe gborho ekuakua rayen.

¹²Vwẹ ẹdẹ ọvo na, vwẹ ubrakpọ rẹ Ovie Ahasuerus suẹn na, vwẹ ẹdẹ ihwerha rẹ emeranvwe rihwivẹ, re se Ada,

¹³Ọbe rẹ ọbo re siri na ka cha vwọ phia kerẹ urhi vwẹ ubrakpọ ọvuọvo, e mi ji ghwoghwo kẹ ihwo ejobi, ihwo ri Ju ke je ghwa cha oma vwẹ ẹdẹ yena rere ayen vwọ reihri vwẹ obọ rẹ ivwighrẹn rayen.

¹⁴Etiyin ikọn na de pho ro iyesi re djẹ kpatakpata na ra vwọ yan uwevwi kẹ ovie na, ayen de bru okpakpa, kirobo rẹ urhi rẹ ovie epha, ayen de re ghwoghwo urhi na vwi Susa rẹ otorere na.

¹⁵Etiyin Modekai da yan phia nẹ obaro rẹ ovie na vẹ edagba rẹ uvie e rẹ ọgiọgiọ vẹ efuanfon, vẹ erhu rẹ uvie rẹ oro kugbe adagba rẹ esada oyoyovwi kugbe isene, jẹ orere ri Susa kperẹ ghọghọ.

¹⁶Ihwo ri Ju na rhe mrẹ oma da vwerhe ayen vẹ aghọghọ, ọghọ da dia ayen oma.

¹⁷Kubrakpọ ọvuọvọ vẹ orere ọvuọvo, asan rẹ ota vẹ urhi rẹ ovie na teri, omavwerhovwẹ vẹ aghọghọ kọye herọ vwọ kẹ ihwo ri Ju, ore vẹ omerovwo. Ihwo rẹ orho na buebu da vwẹ oma ru ihwo ri Ju, kidie oshọ rẹ ihwo ri Ju mu ayen.