Read urhobo Ẹyano 12 Bible Online

Ẹyano 12 - urhobo bible

Ẹyano 12

¹Ọrovwohwo da ta kẹ Mosis vẹ Erọn vwẹ otọ rẹ Ijipt.

²Emeranvwe nana kọ cha dia ẹtuọhọ rẹ emeranvwe, kọ cha dia emeranvwe rẹ esosuọ vwẹ ukpe na kẹ wẹ.

³Ta kẹ ukoko rẹ Izrẹl ejobi nẹ ẹdẹ rihwẹ rẹ emeranvwe nana ohwo ọvuọvo kọ reyọ ogodẹ kirobo rẹ iwevwi rẹ esẹ rayen epha, ogodẹ ọvo unuwevwi ọvo;

⁴unuwevwi na da hanvwe nọ kẹ ogodẹ ọvo, ohwo vẹ ọrivẹ rọye ro bi kẹrẹ uwevwi rọye me reyọ kerẹ uchunu rẹ ihwo re hẹ etiyin, kirobo rẹ ohwo ọvuọvo sa re ọye a gba arhọghọ phihọ ogodẹ na.

⁵Ogodẹ wẹn na che vwo oka-a, ọrọ ọshare ẹgbukpe ọvo ọ ghwo te; wọ me reyọ nẹ ohri rẹ igodẹ na yerẹ ẹvwe na;

⁶ku wo churo re te ẹdẹ rihwẹne rẹ emeranvwe nana, ọke rẹ ukoko rẹ Izrẹl ejobi de che hwe igodẹ na vwẹ ovwọnvwọn na.

⁷Ayen ke reyọ emerha rẹ ọbara na, vwo te edọvi ivẹ rẹ anurhoro na kugbe ọ rẹ vwo gbere obenu rẹ anurhoro rẹ iwevwi rẹ ayen da cha re ayen na.

⁸Ayen ke re uvwo rọye vwẹ ason yena a vwọ tọn; vẹ ikara ro jephuo, kugbe ebe re yara ayen vwọ riọ.

⁹Wọ riọ ọkpokpọ eyẹ a vwẹ ame chere-e, ẹkẹvuọvo a vwọ tọn, te uyovwi rọye vẹ awọ rọye vẹ ivun rọye.

¹⁰Wo jẹn emerha rọye eheko re te irhiọke-e, obo ri chekọ re te irhiọke wa me torhẹ kufia.

¹¹Enẹ kọye wa riọ: chobiẹ amwa wẹn, ku isahato wẹn phihọ, yọnrọn ọkpọ wẹn vwẹ obọ wẹn; ku wọ riọ okpokpakpa. Ọnana ẹwanvrẹn rẹ Ọrovwohwo na.

¹²Kidie me cha wan otọ rẹ Ijipt vrẹn vwẹ ason yena, ke me ghwiẹ emekpako rẹ otọ rẹ Ijipt ejobi hwe te ohwo te eranvwe, ke me vwẹ edjọ rẹ Ijipt ejobi guẹdjọ; Mẹvwẹ Ọrovwohwo na.

¹³Ọbara na kọ cha dia oka kẹ wẹ, vwẹ enu rẹ uwevwi rẹ ovwan epha, ọke me da mrẹ ọbara na, ke me wanvrẹn wẹ, emiavwe ọvuọvo gbi che te we rọ guọghọ owẹ-ẹ, ọke re Me da rhe ghwiẹ otọ rẹ Ijipt na.

¹⁴Nonẹ na kọ cha dia ẹdẹ rẹ ẹkarohọ kẹ wẹ, ku wọ yọnrọn kerẹ orẹ kẹ Ọrovwohwo, vwẹ evun rẹ uvwiẹ wẹn ejobi ku wọ yọnrọn kerẹ ẹgha bẹdẹ.

¹⁵Ẹdẹ ighwrẹn wa vwọ re ikara ro jephuo vwẹ ẹdẹ rẹ ẹsosuọ ku wo si ikara ro jephuo na nẹ uwevwi wẹn, kidie ọ da dianẹ ohwo ọvo re obo ri phuru nẹ ẹdẹ rẹ ẹsosuọ na ri te ẹdẹ ri ighwrẹn, ka nyavwe ohwo yena kufia nẹ Izrẹl na.

¹⁶Vwẹ ẹdẹ rẹ ẹsosuọ kẹ ovwan vwo ọghwẹgbe ọfuanfon, vwẹ ẹdẹ rẹ ighwrẹn ku we vwo ọghwẹgbe ọfuanfon; we ru iruo ọvuọvo vwẹ ẹdẹ yena-a; ẹkẹvuọvo jokpa rẹ obo rẹ ohwo ọvuọvo re ọye wa rhuẹrẹ.

¹⁷Ku wa re orẹ rẹ ikara ro jephuo na, kidie ẹdẹ nana kpekpekpe na ọye me vwọ reyọ urogho rẹ ovwan nẹ otọ rẹ Ijipt rhe; fiki rẹ ọtiọye na wa me yọnrọn ẹdẹ nana, vwẹ uvwiẹ wẹn ejobi, kerẹ ẹgha bẹdẹ.

¹⁸Vwẹ emeranvwe rẹ ẹsosuọ, vwẹ ovwọnvwọn rẹ ẹdẹ rihwẹne rẹ emeranvwe na ọye wa vwọ re ikara ro jephuo na, kẹ ọtiọye re te ẹdẹ uje gbẹ ọvo rẹ emeranvwe na vwẹ ovwonvwọn.

¹⁹Vwẹ ẹdẹ ighwrẹn we ja mrẹ iphuephu vwe iwevwi rẹ ovwa-an; ọ da dianẹ ohwo re obo ri phuru, ohwo yena ka nyavwọ nẹ ukoko rẹ Izrẹl na, owenẹ ọ dia ọrhorha eyẹ ọmotọ.

²⁰Wa ria emu ọvuọvo ro phuru-u; vwẹ ẹdia rẹ ovwan ejobi wa re ikara ro jephuo.

²¹Eriyin na Mosis de se ekpako rẹ Izrẹl ejobi, ọ da ta kẹ ayen, Sanọ igodẹ kẹ oma rẹ ovwan kirobo rẹ orua rẹ ovwan epha, we hwe ogodẹ rẹ ẹwanvrẹn na.

²²Reyọ ekru rẹ ahworhẹ re wo duvwo phihọ ọbara na rọ hẹ oze na, wo vwo te ophapha rọ obenu rẹ anurhoro na vẹ ọ rẹ akakọ rọye; we jẹn ohwo ọvuọvo vrẹn nẹ anurhoro rẹ uwevwi na ruẹ afe-e bẹsiẹ rẹ urhiọke vwo te.

²³Fikiridie Ọrovwohwo cha wanvrẹn re hwe ihwo rẹ Ijipt na; ọke rọ da mrẹ ọbara na vwẹ ophapha rọ obenu vẹ ọ rẹ akakọ rẹ anurhoro na, Ọrovwohwo me shariẹ ẹchẹ yena vrẹn, ọ gbe rhọvwe nẹ ọguọghọ na vwẹriẹ iwevwi wẹn re hwe we-e.

²⁴Ku wọ gha ẹgha nana kerẹ urhi vwọ kẹ oma wẹn vẹ emọ wẹn bẹdẹ.

²⁵Ọke ri wo de rhi te otọ rẹ Ọrovwohwo vwọ kẹ wẹ kirobo ro veri na, ku wọ sẹro rẹ ẹga nana.

²⁶Ọke rẹ emọ wẹn da ta kẹ wẹ, Otọ rẹ ẹga nana rhọ?

²⁷Ku wọ ta, ọnana izobo rẹ ẹwanvrẹn rẹ Ọrovwohwo na, kidie ọ wan iwevwi rẹ ihwo rẹ Izrẹl vrẹn vwẹ otọ rẹ Ijipt, ọke ro vwo hwe ihwo rẹ Ijipt, ẹkẹvuọvo ọ da yan jẹn iwevwi rẹ avwanre vwo. Ihwo na de gbe iyovwi kpotọ ayen da ga.

²⁸Etiyin ihwo rẹ Izrẹl da yanran re ru ọtiọye: kirobo rẹ Ọrovwohwo ta kẹ Mosis vẹ Erọn, ọtiọye ayen ruru.

²⁹Vwẹ uherevie ason Ọrovwohwo de hwe emekpako rẹ otọ rẹ Ijipt nẹ ọmọkpako ri Fero ro tidia vwẹ ekete rọye na re te ọmọkpako rẹ ọviẹn rọ evun rẹ uwodi kugbe emekpako rẹ eranvwe.

³⁰Fero de vrẹn vwẹ ason, te ọye, vẹ idibo rọye, kugbe ihwo rẹ Ijipt ejobi; ugo rẹ oviẹ de mu vwẹ Ijipt, kidie o vwo uwevwi ọvuọvo rẹ ohwo de je ghwo-o.

³¹O de se Mosis vẹ Erọn vwẹ ason, ọ da ta, Vrẹn, we kpo nẹ ohri rẹ ihwo mẹ, te owẹ te ihwo rẹ Izrẹl na, wa yanran, ra ga Ọrovwohwo, kirobo wọ tare.

³²Reyọ igodẹ wẹn kugbe uchuru wẹn, kirobo wọ tare, rere wa yanran; re wa nẹ ẹrhovwo kẹ vwẹ rhe.

³³Ihwo rẹ Ijipt na ki bru ihwo na okpakpa, rere ayen vrẹn nẹ otọ na kpatakpata, kidie ayen tare, Avwanre na ejobi kẹ irivwi re.

³⁴Ọtiọye na ihwo na de mu odo rẹ ikara rayen ri ji phn-u, ize rẹ ayen vwo gbe ikara ayen da vwẹ emwa phare ayen vwọ ya igabọ rayen.

³⁵Ihwo rẹ Izrẹl ji ru obo ri Mosis ta kẹ ayen, kidie ayen yare miẹ ihwo rẹ Ijipt na ekuakua rẹ idọnọ vẹ oro kugbe emwa;

³⁶Ọrovwohwo da vwẹ ẹroesiri kẹ ihwo na vwẹ obaro rẹ ihwo rẹ Ijipt, ọtiọye na kemu kemu rẹ ayen nọ miẹ ayen ejobi ayen de siobọ no kẹ ayen. Enẹ kọye ayen miovwi ihwo rẹ Ijipt na.

³⁷Ihwo rẹ Izrẹl de mu oyan phihọ nẹ Ramesis kpo Sukọt, ayen kerẹ ihwo odu-esan re vwẹ owọ yan, e kerẹ eya vẹ imitete-e.

³⁸Ihwo efa buebu ọguagua ji nene ayen, kugbe uchuru buebu, igodẹ vẹ irhuẹn.

³⁹Ayen da kakọ ikara ri jephuo re hẹ evun rẹ ido rẹ ayen mu nẹ otọ rẹ Ijipt rhe, kidiẹ iphuru-u, fikiridie a djẹ ayen nẹ otọ rẹ Ijipt ayen gbe sa hẹrhẹ-ẹ, ayen ji chere ẹmu ọvuọvo ghwa-a.

⁴⁰Ọke rẹ ihwo rẹ Izrẹl dia otọ rẹ Ijipt te da dia ikpe ujori ẹne gbẹ ọgban.

⁴¹Vwẹ oba rẹ ikpe ujori ẹne gbẹ ọgban na, vwẹ ẹdẹ yena kpekpekpe na, ọye urogho rẹ Ọrovwohwo ejobi da yan nẹ otọ rẹ Ijipt.

⁴²Ọye na ason rẹ ẹrhẹrẹ kẹ Ọrovwohwo, ro vwo si ayen nẹ otọ rẹ Ijipt rhe; ọtiọye na ason yena kẹ ason rẹ ẹrhẹrẹ rẹ ihwo rẹ Izrẹl ejobi rhẹrẹ kẹ Ọrovwohwo vwẹ uvwiẹ rayen ejobi.

⁴³Ọrovwohwo da ta kẹ Mosis vẹ Erọn, ọnana kọye ẹgha rẹ ẹwanvrẹn na: we jẹn ọrhorha riọ-ọ:

⁴⁴ẹkẹvuọvo ọviẹn ra vwẹ igho dẹ ọ sa riọ ọ da dianẹ a yanvwerọ nu.

⁴⁵Ọrhorha ghevweghe yẹrẹ odibo ra yare rhe sa riọ-ọ.

⁴⁶Vwẹ evun rẹ uwevwi ọvuọvo wa da cha riọ; wa reyọ emerha rẹ uvwo rọye nẹ evun rẹ uwevwi ro otafe-e; we vwirhi ubeku rọye-e.

⁴⁷Ukoko rẹ Izrẹl na ejobi me yọnrọn.

⁴⁸Ọ da dianẹ ọrhorha rọ vẹ owẹ gba dia guọnọ re orẹ rẹ ẹwanvrẹn na kẹ Ọrovwohwo, jẹn eshare rẹ ayen ejobi yanvwe tavwe; tavwe ro ki sikẹrẹ re ọ ke riọ; kọ dia kerẹ ọmọtọ rẹ otọ na. Ẹkẹvuọvo ohwo rọ yavwere-e sa riọ-ọ.

⁴⁹Urhi ọvuọvo re cha dia kẹ ọmotọ vẹ ọrhorha rọ dia ohri rẹ ovwan.

⁵⁰Enẹ ihwo rẹ Izrẹl ejobi ruru; kirobo rẹ Ọrovwohwo ji urhi kẹ Mosis vẹ Erọn, ọtiọye ayen ruru.

⁵¹Vwẹ ẹdẹ yena kpekpekpe na Ọrovwohwo da reyọ ihwo rẹ Izrẹl ejobi nẹ otọ rẹ Ijipt.