Read urhobo Ẹyano 15 Bible Online

Ẹyano 15 - urhobo bible

Ẹyano 15

¹Etiyin Mosis vẹ ihwo rẹ Izrẹl da so une nana kẹ Ọrovwohwo, ayen da ta, Me so une kẹ Ọrovwohwo, kidie o phi kparobọ vẹ urinrin, tẹ iyesi vẹ ohwo rọ gua ọ kpare ayen phihọ abadi na.

²Ọrovwohwo ọye ogangan mẹ kugbe une mẹ, o ji rhi hirhe phihọ esivwo mẹ; ọnana Ọghẹnẹ mẹ, ki mi jiro, Ọghẹnẹ rẹ ọsẹ mẹ, ke me kparọ kpenu.

³Ọrovwohwo ohwo rẹ ofovwi; Ọrovwhohwo na ọye odẹ roye.

⁴Te akpẹrẹ ri Fero vẹ ihwo rọye ọ kpare ayen phihọ evun rẹ abadi, ilori rẹ ofovwi rọ sanọre idivwi ghwu vwẹ evun rẹ Abadi ọvwavware na.

⁵Ame de rhurhu ayen; ayen de divwi kpotọ kerẹ oragha.

⁶Obọrhe wẹn, E Ọrovwohwo, ọ vẹ urinrin vẹ ogangan, obọrhe wẹn, E Ọrovwohwo, ọ hra ivwighrẹ na.

⁷Vwẹ evun rẹ orhuarho rẹ ọrho wẹn wo de kpoviẹ ukọn wẹn she; wẹ re vwẹ ophu wẹn rhe, ọ da torhẹ ayen kerẹ ẹbe eyaya.

⁸Wọ vwọ fiẹ iwe wẹn ame na de yeri kpenu, ame na de mu ukori kpenu, ikokodo na de djemu koi vwẹ uherevie rẹ abadi na.

⁹Ivwighrẹ na da ta, Me vwọ tua, re me korẹ, me ghare ughwẹ na, ẹguọnọ mẹ kọ wan oma rayen gba. Mi che yoro ọlọkọ mẹ obọ mẹ kọ guọghọ ayen.

¹⁰Wo de dju odju wẹn rhe, abadi na de rhurhu ayen; ayen de divwi kerẹ odje vwẹ evun rẹ ame rode na.

¹¹Ono re họhọ owẹ, E Ọrovwohwo, vwẹ ohri rẹ eghẹnẹ na ejobi? Ono re họhọ owẹ, vwẹ ọrho vẹ ẹfuọn, ro muoshọ vwẹ iruo rẹ urinrin, ro ruẹ emu rẹ igbunu?

¹²Wọ riẹn obọrhe wẹn phia, otọ na da rọ ayen.

¹³Wẹ vwẹ ẹguọnọ ro jẹrhẹriẹ wẹn vwo sun ihwo na re wọ tan hirhe, wẹ vwẹ ogangan wẹn vwo sun ayen kpo ẹdia ọfuanfon wẹn na.

¹⁴Ihwo na nyori, ayen kpoghori; Anegbe da ra teye ihwo ri Filistia.

¹⁵Asakiephana ofu de dje igbuyovwi rẹ Idọm; isun ri Moab, ke phariẹ kpakpakpa; ihwo ri Kenan ejobi wran kufia re kakare.

¹⁶Oshọ vẹ uguegue she teyọ ayen; fiki rẹ ọrho rẹ igbabọ wẹn, ayen pha fọfọ kerẹ oragha, bẹsiẹ rẹ ihwo wẹn, E Ọrovwohwo, vwọ wan vrẹn, bẹsiẹ rẹ ihwo wẹn vwọ wan e re wọ tanhirhe.

¹⁷Wẹ re rọye ayen rhe uwevwi, wọ da kọn ayen phihọ ugbenu wẹn, asan na, E Ọrovwohwo, ru wo ru kẹ ẹdia wẹn, ẹshẹ wẹn, E Ọrovwohwo, rẹ abọ wẹn ọvo bọnre.

¹⁸Ọrovwohwo re uvie bẹdẹ bẹdẹ.

¹⁹Kidie ọke rẹ iyesi ri Fero vẹ akpẹrẹ rọye vẹ ihwo re gua iyesi rọye vwọ ro evun rẹ abadi na, Ọrovwohwo da vwẹ ame rẹ abadi na vwo rhurhu ayen; ẹkẹvuọvo emọ rẹ Izrẹl da wan otọ ọyaya vrẹn vwẹ uherevie rẹ abadi na.

²⁰Etiyin Miriam, orherẹn rẹ aye na, oniọvo rẹ Erọn, da rọye ekpagha; eya na ejobi da rọye ekpagba ayen de nene gbe eha ro ada.

²¹Miriam da so une ke ayen: So une kẹ Ọrovwohwo, fikiridie o phi kparobọ vẹ urinrin; tẹ iyesi tẹ ohwo ro gua ọ kpare ayen phihọ abadi na.

²²Etiyin Mosis de sun Izrẹl nẹ Abadi ọvwavware na kpo obaro, ayen de rhi te aton ri Shọ; ayen da yan ẹdẹ erha vwẹ evun rẹ aton na yẹ ayen mrẹ ame-e.

²³Ọke rẹ ayen rhi vwo te Mata, ayen gbe sa da ame na-a fikiridie ame na yara, kọye ayen vwo se nẹ Mara.

²⁴Ihwo na de gu Mosis, tanẹ, Kidie avwanre da?

²⁵O de kperi se Ọrovwohwo; Ọrovwohwo de dje urhe ọvo kẹ, o de phio phihọ ame na, ame na da vwerhe. Etiyin Ọrovwohwo da vwẹ iji kẹ ayen ọ da davwe ayen ni,

²⁶tanẹ, Wọ da vwẹ oma kpotọ nyo ota rẹ Ọrovwohwo Ọghẹnẹ wẹn, wo de ru obo ri shephihọ vwẹ ẹro rọye, wọ da kerhọ rẹ iji rọye wọ da yọnrọn ayen, emiavwe ri mi vwo mu ihwo rẹ Ijipt na gbi che mu we-e, kidie Mẹvwẹ Ọrovwohwo, osivwi wẹn.

²⁷Ayen de rhi te Elim, asan rẹ ogbugbu rẹ ame ihwivẹ kugbe iriẹ ujorha gbẹ ihwe epha; ayen de mu erhọn phihọ oma rẹ ame na.