Read urhobo Ẹyano 19 Bible Online

Ẹyano 19 - urhobo bible

Ẹyano 19

¹Vwẹ emeranvwe ọkpokpọ rerha rẹ ihwo rẹ Izrẹl vwo nẹ otọ rẹ Ijipt nu, vwẹ ẹdẹ yena ayen da rhi te aton ri Sinae.

²Ọke rẹ ayen vwo vrẹn ni Rẹfidim ayen de rhi te aton ri Sinae, ayen de mu erhọn phihọ aton na, vwẹ etiyin Izrẹl de mu erhọn phihọ obaro rẹ ugbenu na.

³Mosis de yeri bru Ọghẹnẹ, Ọrovwohwo de se nẹ enu rẹ ugbenu na rhe tanẹ, Enẹ wọ cha ta kẹ uwevwi ri Jekọp, wọ je ta kẹ ihwo rẹ Izrẹl:

⁴Wọ mrẹ obo ri mi ru kẹ ihwo rẹ Ijipt, kugbe obo ri mi vwẹ ibekpe rẹ ugo mu uwe kẹ oma mẹ.

⁵Asakiephana wo de se mu ọghọ kẹ urhuru mẹ ru wọ da sẹro rẹ ọphọ mẹ, ku wọ cha dia ughwẹ mẹ vwẹ oma rẹ ihwo na ejobi; kidie akpọ na ejobi Ọmẹ,

⁶ku wọ cha dia uvie rẹ irherẹn kẹ vwẹ orho ọfuanfon. Enana keye eta ru wọ ta kẹ emọ rẹ Izrẹl na.

⁷Etiyin Mosis de rhi se ekpako rẹ ihwo na, o de phi eta na ejobi rẹ Ọrovwohwo ta kẹ na phihọ obaro rẹ ayen.

⁸Ihwo na ejobi de ku unu gbe ta, Obo rẹ Ọrovwohwo tare ejobi ọye me ru. Mosis da ghwẹ eta rẹ ihwo na rhe Ọrovwohwo.

⁹Ọrovwohwo da ta kẹ Mosis, Nighe, Mi che bru we rhe vwẹ egho kpoi, rere ihwo na vwo nyo vwẹ ọke me da ta ota kẹ wẹ, rere ayen vwo se we gbuyota bẹdẹ. Etiyin Mosis da ghwẹ eta rẹ ihwo na rhe Ọrovwohwo.

¹⁰Ọrovwohwo da ta ki Mosis, Yanran bru ihwo na rere wo re ru ayen fon nonẹ vẹ odẹ, wo jẹn ayen fọnrhọ emwa rayen,

¹¹wa choma vwẹ ẹdẹ rerha; kidie ẹdẹ rerha ye Ọrovwohwo ko che worọ rhe enu rẹ Ugbenu ri Sinae vwẹ irharo rẹ ihwo na ejobi.

¹²Wo mi gbere ughwru riariẹ kẹ ihwo na, tanẹ, Kẹnẹ oma we yere kpenu rẹ ugbenu na-a eyẹ wọ vwẹ obọ te orhọ rọye-e; kohwo kohwo rọ vwẹ obọ te ugbenu na ka teyọ hwe;

¹³a vwẹ obọ te-e, ẹkẹvuọvo e mi phio hwe eyẹ a me sa; ọ dia ohwo yerẹ eranvwe, we jọ dia-a. Ọke rẹ owanre na de hworo kri, ayen ke yanrhe obenu rẹ ugbenu na.

¹⁴Etiyin Mosis de won nẹ ugbenu na rhe otọ bru ihwo na, o de ru ihwo na fon; ayen da fọnrhe emwa rayen.

¹⁵Ọ da ta kẹ ihwo na, Wa choma hẹrhẹ ẹdẹ rerha na, wo siẹ kẹrẹ aye-e.

¹⁶Vwẹ irhiọke rẹ ẹdẹ rerha agbrara da van, enu da nyavwaro, egho rode de rhi rhurhu ugbenu na, owanre rọ mrare de hworo, ọtiọye na ihwo rẹ erhọn na ejobi ki kpogho.

¹⁷Etiyin Mosis da rọye ihwo na nẹ evun rẹ erhọn na rhe vwa Ọghẹnẹ; ayen de mudia vwẹ otọ rẹ ugbenu na.

¹⁸Ivwirhi de rhi rhurhu Ugbenu ri Sinae, fikiridie Ọrovwohwo wotọ rhe enu rọye vwẹ erhanre; ivwirhi rọye de bru kpenu kerẹ ivwirhi rẹ etu; ugbenu na ejobi de kpogho gangan.

¹⁹Rẹ edo rẹ owanre na vwọ gan phihọ re, Mosis da ta ota, Ọghẹnẹ da rhe kpahe phihọ vwẹ evun rẹ agbrara na.

²⁰Ọrovwohwo de wotọ rhe enu rẹ Ugbenu ri Sinae, O de se Mosis kpenu rẹ ugbenu na, Mosis de yeri kpenu bro ra.

²¹Ọrovwohwo da ta kẹ Mosis, Wotọ wọ ra ta kẹ ihwo na, ọ dia ọtiọye-e ayen me ra shariẹ ughwru na vrẹn re ni Ọrovwohwo ayen buebu da rhe ghwọrọ kufia.

²²Gbe jẹ otu rẹ irherẹn ri bi kẹrẹ Ọrovwohwo na ru oma rẹ ayen fon, ọ dia ọtiọye-e Ọrovwohwo da gbọ rhurhu ayen.

²³Etiyin Mosis da ta kẹ Ọrovwohwo, Ihwo na che se si kẹrẹ Ugbenu ri Sinae-e, kidie ekpuyovwi wẹn ta kẹ avwanre, nẹ Phi ughwru phihọ ugbenu na yariẹ rere wo ruo fon.

²⁴Ọrovwohwo da ta kẹ, Woto, rere wọ rọye Erọn nene oma rhe, ẹkẹvuọvo wo jẹ irherẹn na vẹ ihwo na shariẹ ughwru na vrẹn re ni Ọrovwohwo-o, ọ dia ọtiọye-e ọ me rhe gbọ ku ayen.

²⁵Etiyin Mosis de bru ihwo na ra ọ da ta kẹ ayen.