Read urhobo Ẹyano 20 Bible Online

Ẹyano 20 - urhobo bible

Ẹyano 20

¹Ọghẹnẹ da ta eta nana ejobi, tanẹ,

²Mẹvwẹ Ọrovwohwo Ọghẹnẹ wẹn, rọ rọye owẹ nẹ otọ rẹ Ijipt rhe, nẹ uwevwi rẹ ọviẹn rhe.

³Wo vwo eghẹnẹ efa-a mẹvwẹ ọvo.

⁴Wọ kare oma ọvuọvo kẹ oma wẹ-ẹn, o ro họhọ emu kemu rọ evun rẹ odjivwu vwe obenn, eyẹ ọ rọ herọ vwẹ evun rẹ akpo na, eyẹ ọ rọ herọ vwẹ evun rẹ ame vwẹ obotọ rẹ akpọ na;

⁵wo shiguẹ kẹ aye-en yẹrẹ wọ ga aye-en; kidie mẹvwẹ Ọrovwohwo Ọghẹnẹ wẹn mẹvwẹ Ọghẹnẹ rọ rioma, ọ vwẹ imwemwu rẹ esẹ ruru nene emọ, nẹ uvwiẹ rerha re te Ọrẹne rẹ ayen ri mu kpahe ovwẹ;

⁶ẹkẹvuọvo ji nẹ eguọnọ ro jẹrhẹriẹ uri aku uri kẹ ayen otu re guọnọ ovwẹ re yọnrọn irhi me.

⁷Wọ se odẹ rẹ Ọrovwohwo Ọghẹnẹ wẹn ogbise-e, kidie Ọrovwohwo se bru orhiẹn ke otu ri se odẹ rọye ogbise-e.

⁸Karohọ edidjala, wọ yọnrọn fuanfon.

⁹Ẹdẹ esan wọ vwo wian, vwo ru iruo wẹn ejobi,

¹⁰ẹkẹvuọvo ẹdẹ righwrẹ na ọye edidjala rẹ Ọrovwohwo Ọghẹnẹ wẹn; vwẹ evun rọye wo ru iruo ọvuọvo-o, wẹ yẹrẹ ọmọshare wẹn, yẹrẹ ọmọtẹ wẹn, yẹrẹ odibo wẹn rẹ ọshare, yẹrẹ odibo wẹn rẹ aye, yẹrẹ uchuru wẹn, yẹrẹ ọrhorha rọ hẹ uwevwi wẹn;

¹¹kidie ẹdẹ esan ye Ọrovwohwo vwọ ma odjivwu vẹ akpọ, abadi na vẹ imu rehẹ evun rẹ ayen ejobi, o de rovwoma vwẹ ẹdẹ righwrẹ na, fiki rẹ ọtiọye na Ọrovwohwo de bruphihọ edidjala na o de ruo fon.

¹²Mu ọghọ kẹ ọsẹ wẹn vẹ oni wẹn, rere ẹdẹ wẹn vwo gro vwẹ otọ rẹ Ọrovwohwo Ọghẹnẹ wẹn vwọ kẹ wẹ na.

¹³Wo hwe ohwo-o.

¹⁴Wo gbe igberadja-a.

¹⁵Wo cho uji-i.

¹⁶Wo se iseri rẹ ekun hwe ọrivẹ wẹ-ẹn.

¹⁷Wo jẹ uwevwi rẹ ọrivẹ wẹn da wẹ ẹro-o; wo jẹ aye rẹ ọrivẹ wẹn da wẹ ẹro-o, yẹrẹ odibo rọye rẹ ọshare, yẹrẹ odibo rọye rẹ aye, erhuẹn rọye eyẹ ekẹtẹkẹtẹ rọye kemu kemu ro rhe ọrivẹ wẹn.

¹⁸Ọke rẹ ihwo na ejobi vwọ mrẹ agbrara na vẹ enu enyavwọ vẹ edo rẹ owanre na vẹ ugbenu na ro bru ivwirhi, oshọ de mu ihwo na ayen ke phariẹ, ayen de mudia vwẹ ogboko,

¹⁹ayen da ta kẹ Mosis, Wẹ ọvo ta kẹ avwanre, avwanre ki nyo; ẹkẹvuọvo wo jẹn Ọghẹnẹ ta kẹ avwanre-e, avwanre de rhe ghwu.

²⁰Mosis da ta kẹ ihwo na, Wa djẹ oshọ-ọ, kidie Ọghẹnẹ rhe davwe ovwan ni, rere oshọ rọye vwọ dia ẹro rẹ ovwan, rere we jẹ imwemwu eruo.

²¹Ihwo na de mudia tephe, ri Mosis vwo siẹkẹrẹ asan ro mu egho na rẹ Ọghẹnẹ epha na.

²²Ọrovwohwo da ta kẹ Mosis, Enẹ wọ cha ta kẹ ihwo rẹ Izrẹl na: Ekpuyovwi wẹn jẹ mrẹre nẹ Mi nene uwe ta ota nẹ obo odjivwu rhe na.

²³Wọ rha kare edjọ rẹ idọnọ ọfuanfon vwọ ba vwẹ-ẹ, eyẹ wọ je ma edjọ rẹ oro kẹ oma wẹ-ẹn.

²⁴Agbada rẹ ekpẹn ọye wo so kẹ vwẹ kẹ enu rọye we de ze izobo rẹ ẹtorhẹ vẹ izobo rẹ ufuoma, igodẹ wẹn vẹ irhuẹn wẹn; vwi kasan kasan re me da tanẹ a karohọ odẹ mẹ ejobi ki mi bru uwe rhe ki mi bruba kẹ wẹ.

²⁵Wọ da vwẹ oragha so agbada kẹ vwẹ, wọ vwẹ oragha re esheri suọ-ọ; fikiridie wọ da vwẹ ekuakua wẹn te, ju wo gbere ẹgua.

²⁶Wo ji yere ichihi kpo agbada mẹ-ẹ, rere ejẹ ẹba wẹn ẹmrẹ vwẹ enu roye.