Read urhobo Ẹyano 24 Bible Online

Ẹyano 24 - urhobo bible

Ẹyano 24

¹Ọ da ta kẹ Mosis, Yanrhe obenu bru Ọrovwohwo rhe, wẹ kughe Erọn, Nadab, kugbe Abibu, kugbe ekpako ujorha gbẹ ihwe rẹ Izrẹl, rere we tephe wa ga vwẹ.

²Mosis ọvo ri che biẹkẹrẹ Ọrovwohwo; ẹkẹvuọvo iri chekọ che biẹkẹrẹ-ẹ, yẹ ihwo na ji che nene kpenu-u.

³Mosis da rhe ọ da rhe ta ota rẹ Ọrovwohwo na vwọ kẹ ihwo na kugbe ẹgha rọye ejobi; ihwo na ejobi de kuenu gbe ọvo, tanẹ, Eta rẹ Ọrovwohwo tare ejobi avwanre ru.

⁴Mosis de si eta rẹ Ọrovwohwo na ejobi. O de vrẹn vwẹ irhiọke ride, ọ da so agbada phihọ esiri rẹ ugbenu na, vẹ ichivwo ihwivẹ, kirobo rẹ orua ihwivẹ rẹ Izrẹl epha.

⁵O de ji imighele rẹ ihwo rẹ Izrẹl, ri ze izobo rẹ ẹtorhẹ vẹ izobo rẹ ufuoma rẹ irhuẹn kẹ Ọrovwohwo.

⁶Mosis da rọye abọvo rẹ ọbara na o de kuo phihọ ize, abọvo rẹ ọbara na o de miro ku agbada na.

⁷Etiyin ọ da rọye ọbe rẹ ọphọ na, o de se kẹ ihwo na nyo; ayen da ta, Obo rẹ Ọrovwohwo tare ejobi avwanre ru, avwanre ji nyo Ọwẹn.

⁸Mosis da rọye ọbara na ọ da fẹrẹ ku ihwo na, ọ da ta, Gbe ni ọbara rẹ ọphọ na rẹ Ọrovwohwo vẹ owẹ rere kirobo rẹ eta nana ejobi epha.

⁹Etiyin Mosis vẹ Erọn, Nadab vẹ Abihu, vẹ ekpako ujorha gbẹ ihwe rẹ Izrẹl de yeri kpenu;

¹⁰ayen da mrẹ Ọghẹnẹ rẹ Izrẹl; vwẹ obotọ rẹ awọ rọye umukpe ra teyere ro lo kerẹ oragha, rọ họhọ ekpuyovwi rẹ odjuvwu na fikiridie ofiotọ gangan.

¹¹Ọ shabọ rọye phihọ ehọnvwọre rẹ Izrẹl na-a; ayen mrẹ Ọghẹnẹ, ayen da re ayen da da.

¹²Ọrovwohwo da ta kẹ Mosis, Bru vwe rhe obenu rẹ ugbenu na, wọ hẹrhẹ vwẹ etiyin; ke me kẹ wẹ ephapha rẹ oragha, vẹ urhi na vẹ iji na, ri mi siri fiki rẹ eyono rayen.

¹³Ọtiọye na Mosis de vrẹn vẹ odibo rọye Joshua, Mosis da yanran kpenu rẹ ugbenu rẹ Ọghẹnẹ.

¹⁴Ọ da ta kẹ ekpako na, Wa hẹrhẹ avwanre vwẹ etinẹ, bẹsiẹ rẹ avwanre vwo rhoma bru ovwan rhe; gbe nighe, Erọn vi Họ vẹ owẹ herọ, ohwo ro vwo ota, e jo bru ayen ra.

¹⁵Etiyin Mosis de kpo obenu rẹ ugbenu na, egho de rhurhu ugbenu na.

¹⁶Urinrin rẹ Ọrovwohwo da hẹ obenu rẹ Ugbenu ri Sinae, egho na de rhurho ẹdẹ esan; ẹdẹ righwrẹn o de se Mosis nẹ evun rẹ egho na rhe.

¹⁷Asakiephana urinrin rẹ Ọrovwohwo vwọ vwẹ oma phia na ọ da họhọ erhanre rọ tua vwẹ enu rẹ ugbenu na vwẹ irharo rẹ ihwo rẹ Izrẹl na.

¹⁸Mosis da ro evun rẹ egbo na, o de yeri kpenu rẹ ugbenu na. Etiyin Mosis da dia enu rẹ ugbenu na ẹdẹ ujuvẹ kugbe ason ujuvẹ.