Read urhobo Ẹyano 27 Bible Online

Ẹyano 27 - urhobo bible

Ẹyano 27

¹Wọ me so agbada rẹ ẹron ugrogro rọye kubit iyori ohẹhẹre rọye kubit iyori; agbada na igogo ẹne wọ suọ kubit erha kpenu.

²Wọ me kare ighoro phihọ igogo rọye ẹna na; ighoro rọye me dia oghẹrẹ ọvo, wọ me vwẹ ẹrovwo vwọ pharọ.

³Wo mi phi emevwẹrẹ phihọ rere e tuẹ iwurhie rọye phihọ, te ovwẹvwẹ te ize te eda vẹ ize re vwo koko erhanre phihọ; ekuakua rọye ejobi ẹrovwo e vwo ru ayen.

⁴Wo ji ru uwuye phihọ, ariri rẹ ẹrovwo, vwẹ enu rẹ ariri na wo mi ru adjugẹn rẹ ẹrovwo ẹne phihọ igogo rọye ẹne na.

⁵Wo mi muo phihọ obotọ rẹ agbada na rere ariri na she kpahe agbada na kpotọ re te ugava.

⁶Wọ me kare ekpọ kẹ agbada na, ekpọ rẹ ẹron ra vwẹ ẹrovwo phare;

⁷a me chọrọ ekpọ na phihọ idjugẹn na, rere ekpọ na she kpahe enu rẹ agbada na ivẹ na te obọ nana te obọ yena sie re de muo.

⁸Vwẹ ophapha, ru egbogbo phihọ; kirobo re djere kẹ wẹ vwẹ enu rẹ ugbenu na, ọtiọye wo ruo.

⁹Wo mi ru ọguan rẹ ọgarivi na. Vwẹ obọrhe rẹ ọguan na osirhere me dia ra vwẹ omamọ rẹ esada me kubit ujori o gro te vwẹ ẹbẹre ọvo;

¹⁰ichivwo rayen uje awọ rọyen uje, e rẹ ẹrovwo, ẹkẹvuọvo usikẹ rẹ ichivwo na vẹ ifi rayen me dia iri idọnọ efuanfon.

¹¹Ọtiọye je ugrogro rọye vwẹ obohwẹre ọnre o mi ji vwo osirhere ugrogro rọye kubit ujori, ichivwo rayen uje, awọ rayen uje, rẹ ẹrovwo, ẹkẹvuọvo usikẹ rẹ ichivwo na vẹ ifi rayen me dia e rẹ idọnọ efuanfon.

¹²Vwọ kẹ ohẹhẹre rẹ ọguan na vwẹ obuko ọnre o mi vwo osirhere ugrogro rọye kubit ujuvẹ gbẹ ihwe, vẹ ichivwo ihwe kugbe awọ ihwe.

¹³Ohẹhẹre rẹ ọguan na vwẹ obaro vwẹ obaro ọnre me dia kubit ujuvẹ gbẹ ihwe.

¹⁴Isirhere rẹ abọvo rẹ anurhoro na me dia kubit ihwiori vẹ ichivwo erha kugbe awọ erha.

¹⁵Vwẹ ẹbẹre rivẹ isirhere na me dia kubit ihwiori vẹ ichivwo erha kugbe awọ erha.

¹⁶Wo mi phi ọdjẹvwe phihọ anurhoro rẹ ọguan na ro gro te kubit uje, ọgiọgiọ vẹ orhurhu vẹ ododo vẹ esada ra nabọ me, ra vwẹ ukoti rhuo; ko vwo ichivwo ẹne kugbe awọ ẹne.

¹⁷Ichivwo re riariẹ ọguan na ejobi a me vwẹ idọnọ efuanfon chọrọ; ojẹhọ rọye me dia idọnọ efuanfon, awọ rayen e rẹ ẹrovwo.

¹⁸Ugrogro rẹ ọguan na me dia kubit ujori, ohẹhẹre rọye ujuvẹ gbẹ ihwe enu ẹra rọye kubit iyori, vẹ isirhere ra vwẹ omamọ rẹ isada me vẹ awọ rẹ ẹrovwo.

¹⁹Ekuakua rẹ ọgarivi na ejobi re vwo ru iruo kiruo, vẹ ekanrọ rọye kugbe ekanrọ rẹ ọguan na ejobi, me dia e rẹ ẹrovwo.

²⁰Wọ me ta kẹ ihwo rẹ Izrẹl rere ayen vwẹ omamọ rẹ evwri re vwo gbe ukpẹ rhe, rere e vwo gbe urhukpẹ rọ la kọke kọke.

²¹Vwẹ utughẹ ra da vwa oma na rọ obo otafe rẹ oga na rọ hẹ obaro rẹ iseri na, Erọn vẹ emọ rọye ke vwẹ ẹro te nẹ ovwọnvwọn re te irhiọke vwẹ obaro rẹ Ọrovwohwo. Ọna kọ dia iji rẹ ihwo rẹ Izrẹl yọnre bẹdẹ vwẹ uvwiẹ rayen ejobi.