Read urhobo Ẹyano 31 Bible Online

Ẹyano 31 - urhobo bible

Ẹyano 31

¹Ọrovwohwo da ta kẹ Mosis,

²Nighe, Mi se Bezalẹl ọmọ rẹ Uri ọmọ ri Họ, ọ rẹ orua ri Juda:

³me da vwẹ Erhi rẹ Ọghẹnẹ vwọ vọn, ọ vẹ ogangan vẹ ọhọ vẹ erianriẹn vẹ ona ejobi,

⁴rere o vwo bru ona, ro vwo duvwu oro, idọnọ efuanfon, kugbe ẹrovwo,

⁵ro vwo bru ona phihọ oragha, rere ọ rha kare irhe, rere o vwo ru ona kona.

⁶Nighe, Me je vwẹ Oholiab ọmọ rẹ Ahisamak vwo mu, ọ rẹ orua ri Dan; me je vwẹ ogangan kẹ ihwo re sa wian owian ejobi, rere ayen vwo ru obo re me ta kẹ wẹ na ejobi:

⁷Utughẹ ra da vwa oma na vẹ ekpeti rẹ iseri na vẹ akpanurhe rẹ arodọvwe, vẹ ekuakua ra vwo rhuẹrẹ utughẹ na ejobi,

⁸imẹjẹ na vẹ ekuakua rọye ejobi, vẹ omamọ rẹ ogburhukpẹ na vẹ ekuakua rọye, kugbe agbada rẹ ugboduma na,

⁹kugbe agbada rẹ izobo rẹ ẹtorhẹ vẹ ekuakua rọye, vẹ oze kugbe otọ rọye,

¹⁰kugbe iwun ra nabọ ko, iwun efuanfon vwọ kẹ Erọn rẹ orherẹn na kugbe iwun rẹ emọ rọye vwọ gọ ẹga rẹ irherẹn,

¹¹ori re vwo ghworo na vẹ insens ro gbo ọnrhe ororo na kọ rha dia asan ọfuanfon na. Obo re me ta kẹ wẹ ejobi ọye ayen ru.

¹²Ọrovwohwo da ta kẹ Mosis,

¹³Ta kẹ ihwo rẹ Izrẹl nẹ, Wa me yọnrọn ẹdidjala mẹ, kidie ọnana cha dia oka vwẹ uvwre mẹ vẹ ovwan ra ro uvwiẹ wẹn ejobi, rere wọ vwọ riẹn nẹ Mẹvwẹ, rẹ Ọrovwohwo, ri ru we fon.

¹⁴Wọ me yọnrọn ẹdidjala na kidie ọfuanfon kẹ wẹ; ohwo ro miovwiro ke hwe ghwu, kohwo kohwo ro ru iruo vwẹ evun rọye, erhi yena ku wo sionẹ ohri rẹ ihwo rọye.

¹⁵Ẹdẹ esan ọye we vwo ru iruo, ẹkẹvuọvo ẹdẹ righwrẹ na ọye hẹ ẹdidjala rẹ omaerovwo dẹn rọ fonro kẹ Ọrovwohwo, ohwo ro ru iruo vwẹ ẹdidjala na ke hwe ghwu.

¹⁶Fiki rẹ ọtiọye na ihwo rẹ Izrẹl ke yọnrọn ẹdidjala na ra ro uvwiẹ rayen ejobi, rọ dia ọphọ re rara.

¹⁷Ọyena kọ dia oka ri bẹdẹ rọ hẹ uvwre mẹ vẹ ihwo rẹ Izrẹl na tanẹ ẹdẹ esan ọye Ọrovwohwo vwọ ma odjuvwu vẹ akpọ, ẹdẹ rẹ ighwrẹn o de rovwoma, oma rọye da sasa.

¹⁸Ọ da vwẹ ephapha rẹ iseri ivẹ na vwọ kẹ Mosis, ọke rẹ ọ vẹ ọye vwo ta ota vwẹ enu rẹ Ugbenu ri Sinae nu, ephapha rẹ oragha rẹ Ọghẹnẹ vwẹ urhiabọ rọye si.