Read urhobo Ẹyano 32 Bible Online

Ẹyano 32 - urhobo bible

Ẹyano 32

¹Ọke rẹ ihwo na vwọ mrẹ nẹ Mosis kri enu rẹ ugbenu na nọ, ihwo na de koko oma bru Erọn, ayen da ta kẹ, Vrẹn wọ ma edjọ kẹ avwanre; ono kọye cha ka obaro kẹ avwanre; vwọ kẹ Mosis na, ohwo ro sun avwanre nẹ otọ rẹ Ijipt rhe na, ma gbe riẹn obo ri ruro-o.

²Etiyin Erọn da ta kẹ ayen, Wa reyọ erovwọn rẹ erhọn rẹ oro rẹ erhọn rẹ eya rẹ ovwan, e rẹ emeshare rẹ ovwan vẹ e rẹ emetẹ rẹ ovwan, wa vwẹ ayen rhe vwe.

³Ọtiọye ihwo na ejobi da reyọ erovwọn rẹ erhọn rẹ oro rẹ erhọn rayen ayen da vwẹ ayen rhe Erọn.

⁴Ọ da reyọ oro na mie ayen, ọ da vwẹ umumo rẹ ogu duvwo, o de duvwo phihọ ọmọ rẹ erhuẹn; eriyin ayen da ta, Enana edjọ wẹn, E Izrẹl, re reyọ owẹ nẹ otọ rẹ Ijipt rhe.

⁵Ọke rẹ Erọn vwọ mrẹ ọnana re, ọ da so agbada kẹ. Eriyin Erọn de ghwoghwo ọ da ta, Odẹ rọ cha na ka re orẹ kẹ Ọrovwohwo.

⁶Ayen de vrẹn vwẹ irhiọke ride, ayen de ze izobo rẹ ẹtorhẹ ayen da vwẹ izobo rẹ ufuoma rhe, ihwo na de tidia te otọ re ria rẹ ayen vwọ da, etiyin ayen de vrẹn ki gbe eha

⁷Etiyin Ọrovwohwo da ta kẹ Mosis, Won kpotọ; kidie ihwo wẹn re wọ reyọ nẹ otọ rẹ Ijipt rhe na, miovwi oma rẹ ayen.

⁸Ayen rhẹriẹ nẹ idjerhe na phẹphẹre ọ rẹ me vuẹ ayen na; ayen duvwu ọmọ rẹ erhuẹn kẹ oma rẹ ayen, ayen garọ ayen de rhe ze izobo kẹ, ayen da ta, Enana edjọ wẹn, E Izrẹl, ọ rọ rọye owẹ nẹ otọ rẹ Ijipt rhe.

⁹Etiyin Ọrovwohwo da ta kẹ Mosis, Me mrẹ ihwo na re, nighe ayen ihwo vẹ udu gangan,

¹⁰asakiephana gbe ju vwe vwo, rere ivuemiovwo mẹ vwọ rhorho kpahe ayen re me guọghọ ayen, ẹkẹvuọvo me vwẹ owẹ ru ẹgborho rode.

¹¹Ẹkẹvuọvo Mosis da rẹ Ọrovwohwo Ọghẹnẹ rọye, ọ da ta, E Ọrovwohwo, die sorọ rẹ ivuemiovwo wẹn vwọ rhorho kpahe ihwo na, ihwo re wo rọye nẹ otọ rẹ Ijipt rhe vẹ ẹgban rode vẹ obọ ọgangan?

¹²Die sorọ rẹ ihwo rẹ Ijipt vwọ tanẹ Uvun umwemwu ọye ọ vwọ reyọ ayen rhe, rere o vwo hwe ayen vwẹ enu rẹ igbenu, rere ọ vwọ guọghọ ayen nẹ otọ rẹ akpọ na? Fue ophu ọrhorhorho wẹn na, rere wo je emu ọbrabra ru wo che vwo ru ihwo nana vwo.

¹³Karohọ Ebraham, Aizik vẹ Izrẹl, idibo wẹn, ihwo re wọ vwẹ oma wẹn duvwu iyori kẹ, wọ da ta kẹ ayen, Mi ru uvwiẹ wẹn bu kerẹ isio rẹ obenu na, otọ nana ejobi ri mi ve kẹ wẹ na ke Me vwọ kẹ ikru wẹn, kẹ ayen riuku rọye bẹdẹ.

¹⁴Etiyin Ọrovwohwo de fue ophu ọbrabra rọ guọnọ mu kpahe ihwo rọye.

¹⁵Etiyin Mosis da rhẹriẹ oma o de won nẹ ugbenu na rhe otọ ọ vẹ ephapha ivẹ rẹ iseri na vwẹ abọ rọye, ephapha re siri tobonẹ tobonẹ; ẹbẹre ọvo rọye vẹ ẹbẹre rivẹ rọye e siri.

¹⁶Ephapha na iruo rẹ Ọghẹnẹ, isiesi na je ọ rẹ Ọghẹnẹ, e bruro phihọ ephapha na.

¹⁷Ọke ri Joshua vwo nyo edo rẹ ihwo na rẹ ayen vwo kpere, ọ da ta kẹ Mosis, Edo rẹ ofovwi obo erhọn na.

¹⁸Ẹkẹvuọvo ọ da ta, ọnana dia edo rẹ ephiokparobọ-ọ, eyẹ edo re vwo phi ohwo kua-a, ẹkẹvuọvo edo rẹ une ọye mi nyo na.

¹⁹Ugege ro ghwe vwo si kẹrẹ erhọn na rọ vwọ mrẹ ọmọ rẹ erhuẹn na vẹ eha na, ophu ri Mosis da tua, o de phi ephapha na nẹ obọ rọye i de vwirhi ayen vwẹ asan esiri rẹ ugbenu na.

²⁰Ọ da rọye ọmọ rẹ erhuẹn rẹ ayen duvwuru na, ọ da guọghọ, ọ da nọ vworovworo, o de tue phihọ ame, ọ da tanẹ emọ rẹ Izrẹl da.

²¹Etiyin Mosis da ta kẹ Erọn, Didi emu ihwo nana ru we re wọ vwọ rọye umwemwu rode nana vwo rhe ayen?

²²Etiyin Erọn da ta, Wo jẹ ophu rẹ Ọrovwovwe tua-a, wọ riẹn ihwo na, tanẹ ayen ihwo umwemwu.

²³Kidie ayen ta kẹ vwẹ, Ma edjọ kẹ avwanre, e re cha ka obaro kẹ avwanre, vwọ kẹ Mosis nana, ohwo rọ rọye avwanre nẹ otọ rẹ Ijipt rhe na, avwanre gbe riẹn obo ri ruro-o.

²⁴Me da ta kẹ ayen, we jẹ ohwo ro vwo oro ghwiẹ rhe; ayen da rọye vwọ kẹ vwẹ, mi de phio phihọ erhanre, etiyin ọmọ rẹ erhuẹn nana de yoro phia.

²⁵Ọke rẹ Mosis vwọ mrẹ nẹ ihwo na ke vabọ (kidie Erọn nẹrhẹ ayen vabọ, rọ dia omaẹvuọ kẹ ayen vwẹ ohri rẹ ivwighrẹ rayen),

²⁶etiyin Mosis de mudia anurhoro re erhọn na, ọ da ta, Ono ẹbẹre rẹ Orovwohwo? We bru vwe rhe. Emọ rẹ Livae ejobi de koko bro rhe.

²⁷Etiyin ọ da ta kẹ ayen, Etiọna Ọrovwohwo Ọghẹnẹ rẹ Izrẹl tare, Ohwo kohwo dje ọlọkọ rọye phihọ ako, wa yan nẹ anurhoro kpo anurhoro rẹ erhọn na ejobi, rẹ ohwo ọvuọvo hwe onlọvo rọye, rere dohwo doru rọye hwe, rere dohwo dọrivẹ rọye hwe.

²⁸Etiyin emọ ri Livae de ru kirobo rẹ ota ri Mosis epha, ihwo ri ghwuru vwẹ ẹdẹ yena da dia oma rẹ uriori erha.

²⁹Etiyin Mosis da ta, Nonẹ na wa vwẹ oma rẹ ovwan vwo kẹ iruo rẹ Ọrovwohwo nure, fiki rẹ dohwo dọmọ rọye dohwo doniọvo rọye ro ghwuru rere a vwọ nẹ ẹrhovwo kẹ wẹ nonẹ na.

³⁰Irhiọke rivẹ Mosis da ta kẹ ihwo na, We ru umwemwu rode. Asakiephana ki mi yeri kpenu bru Ọrovwohwo; siẹvo se me sa gọ ẹgua nẹ ovwan oma fiki rẹ umwemwu rẹ ovwan.

³¹Etiyin Mosis de hirhe bru Ọrovwohwo ọ da ta, E ihwo nana ru umwemwu rode; ayen ma edjọ rẹ oro kẹ oma rẹ ayen.

³²Ẹkẹvuọvo asakiephana, ọ da dianẹ wo vwo umwemwu rayen vwo ghovwo ayen ọ rha dia ọtiọye-e, gbe phoro uvwe, Me rẹ wẹ, nẹ ọbe wẹ na ru wo siri na.

³³Ẹkẹvuọvo Ọrovwohwo da ta kẹ Mosis, Ohwo ro ru umwemwu kpahe ovwẹ ọvo, ọye mi phoro nẹ ọbe mẹ.

³⁴Ẹkẹvuọvo asakiephana, gba yanran re sun ihwo na kpo asan re me ta kẹ owẹ na, nighe, amakashe mẹ cha ka obaro kẹ wẹ. Dede ẹdẹ re me cha rhe, ke me re ihri rẹ umwemwu rayen.

³⁵Ọrovwohwo de ji ọtiekọ rhe ihwo na, fikiridie ayen duvwu ọmọ rẹ erhuẹn rẹ Erọn duvwuru na.