Read urhobo Ẹyano 35 Bible Online

Ẹyano 35 - urhobo bible

Ẹyano 35

¹Mosis de se ukoko rẹ Izrẹl na ejobi koko, ọ da ta kẹ ayen, Enana emu rẹ Ọrovwohwo tanẹ we ru.

²Ẹdẹ esan we vwo ru iruo, ẹkẹvuọvo ẹdẹ rẹ ighwrẹn na kẹ we vwo edidjala ọfuanfon rẹ omaerovwo kẹ Ọrovwohwo, kohwo kohwo ro ru oka rẹ iruo vwẹ evun rọye kẹ hwe;

³wo koko erhanre phihọ vwẹ ẹdia wẹn vwẹ edidjala na-a.

⁴Mosis da ta kẹ ukoko rẹ ihwo rẹ Izrẹl na ejobi, ọnana obo rẹ Ọrovwohwo tare.

⁵Wa reyọ ẹga nẹ oma rẹ ovwan vwo rhe Ọrovwohwo, kohwo kohwo ro vwo udu esiri, we jọ vwẹ ẹga rhe Ọrovwohwo: oro, idọnọ vẹ ẹronvwo.

⁶Ọ rẹ ọgiọgiọ vẹ orhurhu vẹ ododo vẹ esada ra nabọ me, ẹton rẹ ẹvwe

⁷ophiẹn rẹ egbo re cheri vẹ ophiẹn rẹ ẹvwe vẹ ẹron,

⁸evwri re vwo gbe urhukpẹ, egẹn re tue ku ori re vwo ghworo vẹ ugboduma ro gbo ọnrhe ororo,

⁹eragha eghaghare vẹ eragha rẹ ebabọn, vwọ kẹ ibuluku vẹ adja.

¹⁰Wo jẹn ohwo ro te edje vwẹ ohri rẹ ovwan rhi ru obo rẹ Ọrovwohwo tare na: ọgarivi na,

¹¹utughẹ rọye vẹ urhurho rọye, abọ rọye vẹ edọvi rọye, igbẹhẹn rọye, ichivwo rọye, vẹ esiri rọye;

¹²ekpeti na vẹ ekpọghọ rọye, akpanurhe rẹ arodọvwẹ na, vẹ oga re vwo rhurho na;

¹³imẹjẹ na vẹ ekpọghọ rọye vẹ ekuakua rọye, vẹ ikara rẹ obaro,

¹⁴ogburhukpẹ re mu urhukpẹ kpahe, ọ vẹ ekuakua rọye vẹ irhukpẹ rọye, vẹ evwri rẹ urhukpẹ;

¹⁵kugbe agbada rẹ ugboduma, ọ vẹ ekpọghọ rọye, vẹ ori re vwo ghworo vẹ insens ro gbo ọnrhe ororo, vẹ amwa rẹ unurhoro, vwẹ unurhoro rẹ ọgarivi na,

¹⁶agbada rẹ izobo rẹ ẹtorhẹ, ọ vẹ uwuye rẹ ẹrovwo, ekpọghọ rọye, vẹ ekuakua rọye ejobi, oze rẹ ẹhworhẹ vẹ awọ rọye.

¹⁷Osirhere rẹ ọguan na, ichivwo rọye vẹ esiri rọye kugbe amwa rẹ unurhoro rẹ ọguan na,

¹⁸esotọ rẹ ọgarivi na vẹ esotọ rẹ ọguan na, vẹ ifi rayen,

¹⁹iwun ra nabọ rhuo ra vwọ ga ẹga vwẹ asan ọfuanfon na, iwun efuanfon na vwọ kẹ Erọn rẹ orherẹn na, iwun rẹ emọ rọye, re ayen vwọ ga ẹga kerẹ irherẹn.

²⁰Etiyin ukoko rẹ ihwo rẹ Izrẹl na ejobi de nẹ obaro ri Mosis.

²¹Etiyin ayen ihwo ri vwẹ ẹnwẹn seri, vẹ ihwo rẹ erhi muru, ayen da rọye izobo rẹ Ọrovwohwo na vwọ rhe utughẹ ra da vwa oma na, kugbe e rẹ ẹga ejobi vẹ e rẹ iwun efuanfon na.

²²Eriyin ayen da rhe te eya te eshare, ihwo ri vwo udu esiri ejobi da rọye ugbẹ vẹ isa rẹ erhọn vẹ isa, vẹ umuahọ, obo ra vwẹ oro ru ejobi kohwo kohwo de ze izobo rẹ oro kẹ Ọrovwohwo.

²³Kohwo kohwo ra mrẹ ọgiọgiọ yẹrẹ orhurhu yẹrẹ ododo yẹrẹ esada ra nabọ me yẹrẹ ẹton rẹ ẹvwe yẹrẹ ophiẹn rẹ egbo re cheri, yẹrẹ ophiẹn rẹ ẹvwe vwẹ obọ rọye da vwẹ ayen rhe.

²⁴Kohwo kohwo rọ sa vwẹ idọnọ eyẹ ẹrovwo vwọ ga ega da ghwẹ ayen rhe Ọrovwohwo, kohwo kohwo re vwo ẹron ro je vwo ru emu, da ghwa rhe.

²⁵Eya ri vwo ogangan da vwẹ abọ rayen rhuo emu, ayen da ghwa emu rẹ ayen rhuori rẹ ọgiọgiọ vẹ orhurhu vẹ ododo vẹ esada ra nabọ me,

²⁶eya ri se vwo udu ri vwo ọgangan ejobi de rhuo ẹton rẹ ẹvwe.

²⁷Ilori na da ghwa eragha dohwo daro vẹ eragha gheghe rhe rhi phihọ, re vwo ko ibuluku rẹ ẹga na vẹ adja,

²⁸kugbe egẹn vẹ evwri rẹ urhukpẹ kugbe ori re vwo ghworo, kugbe ugboduma ro gbo ọnrhe ororo.

²⁹Eshare vẹ eya na ejobi, ihwo rẹ Izrẹl re vwẹ ọhọrobọ rayen ghwẹ emu ro te ayen obọ rhe iruo rẹ Ọrovwohwo vuẹ Mosis nẹ o ru na, ayen da vwọ rhe kerẹ ẹga ro nẹ otọ rẹ udu rhe vwọ kẹ Ọrovwohwo.

³⁰Etiyin Mosis da ta kẹ ihwo rẹ Izrẹl, Nighe, Ọrovwohwo se odẹ ri Bezalẹl ọmọ rẹ Liri, ọmọ ri Họ, ọ rẹ orua ri Juda;

³¹ọ da vwẹ Erhi rẹ Ọghẹnẹ vwọ vọn oma vẹ ẹgba vẹ erianriẹn vẹ ọhọ vẹ ona ejobi,

³²ro se vwo bru ona, ro se duvwo oro vẹ idọnọ kugbe ẹrovwo,

³³ro se bru eragha ra vwọ bọn uwevwi, rọ je sa kare urhe, ro ru ona kona ejobi.

³⁴O de ji phi erhi rẹ uyono phihọ evun, te ekpuyovwi rọye vẹ Oholiab ọmọ rẹ Ahisamak ọ rẹ orua ri Dan.

³⁵Ọ da kẹ ayen ẹgba re ayen vwo se ru kiruo kiruo rẹ ihwo ri ruẹ ona rẹ ekakare yẹrẹ ọ rẹ emama yẹrẹ ọ rẹ irhuerhuo ọ rẹ ọgiọgiọ vẹ orhurhu vẹ ododo vẹ ọ rẹ esada ra nabọ me, yẹrẹ ọ rẹ irhuerhuo, yẹrẹ ọ rẹ kọwena kọwena se ruẹ.