Read urhobo Ẹyano 39 Bible Online

Ẹyano 39 - urhobo bible

Ẹyano 39

¹Ayen de ko iwun iyoyovwi rẹ ọgiọgiọ vẹ orhurhu vẹ ododo, re a vwo ga ẹga vwẹ asan ọfuanfon na; ayen de ko iwun efuanfon na kẹ Ẹrọn; kirobo rẹ Ọrovwohwo ta kẹ Mosis.

²Ọ da vwẹ oro ko ibuluku na, ọgiọgiọ vẹ orhurhu vẹ isene na; kugbe esada ra nabọ me na re bru ona phihọ.

³E de duvwu oro pẹpẹghẹ kerẹ ọbe a da biẹn krẹkrẹ kerẹ oruru e de we phihọ urhiẹ rẹ ọgiọgiọ vẹ orhurhu kugbe isene, kugbe esada ra nabọ me na, re bru ona phihọ.

⁴Ayen de ko amwa rhurhu igabọ rẹ adagba na, a da rhuọn kugbe vwẹ igogo ivẹ na.

⁵Yẹ umuehu ra nabọ rhuo na hẹ enu rọye, oghẹre rẹ ekuakua ọvuọvo na e vwo ruo vẹ ona ọvuọvo na, ọ rẹ oro, ọgiọgiọ vẹ orhurhu vẹ ododo, vẹ esada ra nabọ me kirobo rẹ Ọrovwohwo ta kẹ Mosis.

⁶A da rhuẹrẹ eragha na e de ku oga rẹ oro rhurhu ayen e de bru ena phihọ kerẹ ena rẹ oka, kerẹ edẹ rẹ emọ rẹ Izrẹl.

⁷Ẹtiyin o de phi ayen phihọ enu rẹ ibuluku na, rere ayen vwọ dia eragha rẹ ẹkarohọ kẹ emọ rẹ Izrẹl; kirobo rẹ Ọrovwohwo ta kẹ Mosis.

⁸O de ko adja na re bru omamọ rẹ ona phihọ na, kerẹ ibuluku na, vwẹ oro, ọgiọgiọ vẹ orhurhu vẹ ododo vẹ esada ra nabọ me.

⁹Igogo rọye ẹne na ejobi ukuku; adja na e de kpirho ibro ivẹ ugrogro rọye esabọ ọvo ohẹhẹre rọye je hẹ esabọ ọvo e de phio rhurhu.

¹⁰E de ru irhiẹ rẹ eragha ẹne phihọ. Urhiẹ ri sardius, topaz, vọ rẹ kabukol ọye orẹsosuọ;

¹¹urhiẹ rivẹ, ọ rẹ emerad, saphire, kugbe diamond;

¹²urhiẹ rerha ọ ri jacinth, agate, kugbe ametyst;

¹³urhiẹ rẹne, ọ ri beryl, onyz, kugbe jasper, ada rọye oro vwọ pharẹ ayen.

¹⁴Eragha ihwivẹ re herọ vẹ ẹdẹ rayen kerẹ edẹ rẹ emọ rẹ Izrẹl; ayen da dia kerẹ oka, ra tuọn odẹ ọvuọvo phihọ, vwọ kẹ orua ihwivẹ na.

¹⁵Etiyin ayen de duvwu ọjọnrọn phihọ adja na; ọjọnrọn ra vwẹ omamọ rẹ oro duvwu;

¹⁶ayen de duvwu egba rẹ oro ivẹ kugbe isa rẹ oro ivẹ, ayen de phi isa na ive phihọ akakọ ivẹ rẹ adja na,

¹⁷ayen da wọn ifi rẹ oro ivẹ na phihọ isa na ivẹ na rẹ orhọn rẹ adja na.

¹⁸Oba rẹ ifi na ivẹ na e de churu ayen mu egba ivẹ na; etiọna kọye e churu ayen mu obaro rẹ igabọ rẹ ibuluku na.

¹⁹Etiyin ayen de duvwu isa rẹ oro ivẹ, ayen de phi ayen phihọ ẹtan ivẹ rẹ adja na, vwẹ akakọ rẹ evun rọye kẹrẹ ibuluku na.

²⁰Ayen de duvwu isa rẹ oro ivẹ, ayen de churu ayen mu obotọ vwẹ obaro rẹ ibuluku na vwẹ asan igabọ rọye, vwẹ asan re de kuogbe vwẹ obenu rẹ ibuluku na.

²¹Ayen da rọye ufi rẹ ọgiọgiọ vwo churu isa rẹ adja na si isa rẹ ibuluku na, rere o vwo she kpahe enu rẹ ufi rẹ ibuluku ra nabọ rhuo na, rere adja na vwo jẹ ibuluku na esheno, kirobo rẹ Ọrovwohwo ta kẹ Mosis.

²²O de ji ko ibuluku na ra vwẹ ọgiọgiọ vwo rhuo na

²³unu re bruphihọ adagba na da họhọ unu rẹ ewun diodi, e de ko amwa riariẹ ohọre rọye, ro vwo jẹ ẹbẹre.

²⁴Vwẹ orhọn rẹ adagba na ayen de ko pomegranate rẹ ọgiọgiọ vẹ orhurhu vẹ ododo vẹ esada ra nabọ me.

²⁵Ayen de ji duvwu igogo rẹ omamọ rẹ oro ayen de phi igogo na phihọ ohri rẹ pomegranate na vwẹ enu rẹ orhọn rẹ adagba na riariẹ, vwẹ ohri rẹ ejọjọ na;

²⁶agogo vẹ pomegranate, agogo vẹ pomegranate riariẹ akakọ rẹ adagba na rere a vwọ ga ẹga; kirobo rẹ Ọrovwohwo ta kẹ Mosis.

²⁷Ayen ji ko ikotu, ra vwẹ esada rhuo vwọ kẹ Erọn vẹ emọ rọye.

²⁸Erhu rẹ esada yoyovwi, kugbe erhuẹrevwe rẹ esada yoyovwi, kugbe ewun rẹ awọ ra vwẹ esada ra nabọ me rhuo na,

²⁹kugbe umuehu ra vwẹ omamọ rẹ esada ra nabọ me ọ rẹ ọgiọgiọ vẹ orhurhu vẹ ododo ra vwẹ ukoti ko; kirobo rẹ Ọrovwohwo ta kẹ Mosis.

³⁰Ayen da vwẹ oro duvwu erhu ọfuanfon na e de si eravwọ phihọ, kerẹ obo re kuru ra vwọ tamu emu, ọfuanfon kẹ Ọrovwohwo.

³¹Ayen de churu ejọjọ rẹ ọgiọgiọ muo rere e vwo churo mu obenu rẹ erhu na, kirobo rẹ Ọrovwohwo ta kẹ Mosis.

³²Enẹ kọye iruo rẹ ebabọn rẹ ọgarivi rẹ utughẹ ra da vwa oma na ru re; ihwo rẹ Izrẹl de ru kirobo rẹ Ọrovwohwo ta kẹ Mosis; ọtiọye kọye ayen ruru.

³³Ayen de mu ọgarivi na rhe Mosis, utughẹ na vẹ ekuakua rọye ejobi, abọ rọye, edọvi rọye, egbẹn rọye; ichivwo rọye, vẹ usikẹ rọye,

³⁴urhurho rẹ ophiẹn rẹ egbo re cheri vẹ ophiẹn rẹ ẹvwe, kugbe oga re churu sio;

³⁵ekpeti rẹ iseri na vẹ ekpọ rọye vẹ akpanurhe rẹ arodọvwẹ na,

³⁶imẹjẹ na vẹ ekuakua rọye ejobi kugbe ikara rẹ Obaro na;

³⁷ogburhukpẹ rẹ omamọ rẹ oro na ọ vẹ irhukpẹ rọye ra rhuẹrẹ phihọ kugbe ekuakua rọye ejobi, kugbe evwri rẹ urhukpẹ na;

³⁸agbada rẹ oro na, ori re vwo ghworo vẹ ugboduma ro gbo ọnrhe ororo kugbe odjiko re vwo huhu utughẹ na;

³⁹agbada rẹ ẹrovwo na, vẹ uwuye rẹ ẹrovwo ekpọ rọye, vẹ ekuakua rọye ejobi; oze na vẹ usikẹ rọye;

⁴⁰osirhere rẹ ọguan na, ichivwo rọye, usikẹ rọye kugbe odjiko rẹ unurhoro rẹ Ọguan na, ifi rọye, vẹ esotọ rọye; kugbe ekuakua rẹ ẹga rẹ ọgarivi na ejobi, vwẹ utughẹ ra da vwa oma na;

⁴¹iwun ra nabọ rhuo fiki rẹ ẹga vwẹ asan ọfuanfon na, iwun efuanfon na vwọ kẹ Erọn rẹ orherẹn na, kugbe iwun rẹ emọ rọye re ayen vwo ru iruo rẹ irherẹn.

⁴²Kirobo rẹ Ọrovwohwo ta kẹ Mosis ejobi eye emọ rẹ Izrẹl ruru.

⁴³Etiyin Mosis da mrẹ iruo na ejobi, nighe, ayen ruro nure; kirobo rẹ Ọrovwohwo tare, ọtiọye ayen ruro. Etiyin Mosis da nẹ ẹrhovwo kẹ ayen.