Read urhobo Ẹyano 7 Bible Online

Ẹyano 7 - urhobo bible

Ẹyano 7

¹Ọrovwohwo da kpahe kẹ Mosis, “Mi ru we kerẹ Ọghẹnẹ vwọ kẹ Fẹro, Erọn rẹ oniọvo wẹn kọ dia ọmraro wẹn.

²Ku wọ ta obo re me vuẹ wẹ ejobi, Erọn rẹ oniọvo wẹn kọ ta kẹ Fẹro nẹ o siobọ nẹ emọ rẹ Izrẹl ri kpo nẹ otọ rọyen.

³Ẹkẹvuọvo ki mi ru udu rẹ Fẹro gan, owenẹ mi ru eka vẹ igbunu buebu vwẹ otọ rẹ Ijipiti.

⁴Fẹro cha kerhọ wẹẹn, ke me cha vwẹ gagan mẹ vwo gbe oja kẹ Ijipiti ke me cha rọyen ekru rẹ ihwo mẹ Izrẹl vwọ phia nẹ otọ rẹ Ijipiti.

⁵Ihwo rẹ Ijipt na ke cha riẹn nẹ Mẹvwẹ ọye Ọrovwohwo vwẹ ọke rẹ me da vwẹ ogagan mẹ vwọ phia kẹ ayen, ke me reyọ ihwo rẹ Izrẹl nẹ ohri rayen rhe.

⁶Mosis vẹ Erọn de ru ọtiọye; ayen de ru obo rẹ Ọrovwohwo jẹ urhi kẹ ayen.

⁷Asakiephana yẹ Mosis hẹ ikpe ujọne, Erọn ke rha hẹ ikpe ujọn gbẹ erha vwẹ ọke rẹ ayen vwọ ta ota kẹ Fẹro

⁸Ọrovwohwo da ta kẹ Mosis vẹ Erọn,

⁹ọke rẹ Fẹro da ta kẹ wẹ djẹ oma wẹn phia vwẹ emu rẹ igbunu eruo, ku wọ ta kẹ Erọn, “Reyọ ọkpọ wẹn wo phio phiyọ obaro rẹ Fẹro, rere o hirhe phiyọ ọrọdekọ.

¹⁰Etiyin Mosis vẹ Erọn de bru Fero, ayen de ru obo rẹ Ọrovwohwo tare na, Erọn de phi ọkpọ rọye na phihọ otọ vwẹ obaro ri Fero vẹ idibo rọye, o de hirhe phihọ ọrọdekọ.

¹¹Etiyin Fero de se aghwaire na kugbe ẹboepha na, ayen otu ri ruẹ egbẹnẹkẹ vwẹ Ijipt na, ayen da je vwẹ abọ rayen ji ru egbẹnẹkẹ ọtiọye rhe.

¹²Kidie ayen ohwo ọvuọvo de mu ọkpọ rọye teye otọ, ide hirhe phihọ eredekọ. Ẹkẹvuọvo ọkpọ rẹ Erọn da rọ ekpọ rayen ejobi nu.

¹³Jẹ udu ri Fero je gan, ọ gbe je kerhọ raye-en kirobo rẹ Ọrovwohwo tare na.

¹⁴Etiyin Ọrovwohwo da ta kẹ Mosis, Udu ri Fero e ruro gan, ọ sẹnre nẹ ọye siobọ nẹ ibwo na kpo-o.

¹⁵Yanran bru Fero vwẹ irhiọke, ọke ro de kpo obo ame, hẹrhẹ vwẹ orhoma rẹ urhie na, gba rọye ọkpọ rọ birhe phihọ ọrọdekọ na vwẹ obọ wẹn.

¹⁶Ku wọ ta kẹ, Ọrovwohwo na, Ọghẹnẹ rẹ ihwo ri Hlbru, ji vwe bru we rhe, tanẹ, Jẹn ihwo mẹ kpo, rere ayen ra ga vwẹ vwẹ evun rẹ aton; gbe Nighe, wo se mu ọghọ kẹ vwẹ-ẹ.

¹⁷Enẹ Ọrovwohwo tare, Vwẹ oma rẹ ọnana kọye wọ vwọ riẹn nẹ Mẹvwẹ Ọrovwohwo na: nighe, me cha vwẹ ọkpọ rọ obọ mẹ na ghwlẹ ame ri Nile na, ko che hirhe phihọ ọbara;

¹⁸eri rẹ evun ri Nile na ki che ghwu, Nile ko che mwumwerhe, ometuo gbi che jẹ ihwo rẹ Ijipt da ame rọye-e.

¹⁹Ọrovwohwo da ta kẹ Mosis, Ta kẹ Erọn, reyọ ọkpọ wẹn wọ riẹn obọ phihọ ame rẹ Ijipt ejobi, phihọ irhie rayen, phihọ igho rayen, phihọ ewẹ rayen, phihọ etẹrhẹ rẹ ame rayen ejohr, rere ayen rhi hirhe phihọ ọbara, ọbara kọ cha dia otọ rẹ Ijipt na ejobi, te evun rẹ ekuakua rẹ irhe kugbe evun rẹ eragha.

²⁰Mosis vẹ Erọn de ru kirobo rẹ Ọrovwohwo ji kẹ ayen, vwẹ irharo ri Fero vẹ irharo rẹ idiho rọye, ọ da kpare ọkpọ na kpenu vwọ teyọ ame rọ evun ri Nile ejobi de birhe phihọ ọbara.

²¹Eri rẹ evun ri Nile de ghwu; Nile de mwumwerhe, ọtiọye na ihwo rẹ Ijipt gbe sa da ame ri Nile na-a, ọbara da rhe vọn otọ, rẹ Ijipt na ejobi duvwu.

²²Ẹkẹvuọvo ihwo ri ruẹ eghẹnẹkẹ vwẹ Ijipt na da je vwẹ abọ rayen ru ọtiọye na, ọtiọye na udu ri Fero da je gau phihọ, ọ gbe kerhọ raye-en, kirobo rẹ Ọrovwohwo tare na.

²³Fero rhẹriẹ oma o de kpo uwevwi rọye, ọ rha karohọ enana vwẹ udu rọye-e.

²⁴Ihwo rẹ Ijipt ejobi da tọn ewẹ riariẹ Nile phihọ rere ayen mrẹ ame da, kidie ayen gbe sa da ame ri Nile na-a.

²⁵Ẹdẹ ighwrẹn da wan vwẹ ọke rẹ Ọrovwohwo vwọ ghwiẹ ame ri Nile na.