Read urhobo Ẹyano 8 Bible Online

Ẹyano 8 - urhobo bible

Ẹyano 8

¹Etiyin Ọrovwohwo da ta kẹ Mosis, Yanran bru Fero rere wo ta kẹ, Enẹ Ọrovwohwo tare, Jẹn ihwo mẹ kpo, rere ayen ra ga vwẹ.

²Ẹkẹvuọvo wọ da sẹn nẹ ayen kpo-o, nighe ke me vwẹ igoro rhe họnre orho wẹn;

³Nile ko vọn vẹ igoro ke cha rhe iwevwi wẹn, kugbe uvun wẹn vẹ enu rẹ ehwa ru wo sherhẹ, kugbe evun rẹ iwevwi rẹ idibo wẹn kugbe iri ihwo wẹn, vẹ enyerhanre wẹn, kugbe odo rẹ egun wẹn.

⁴Igoro na ki che bru wẹ rhe vẹ ihwo wẹn kugbe idibo wẹn ejobi.

⁵Ọrovwohwo na da ta kẹ Mosis, Ta kẹ Erọn, Riẹn obọ wẹn vẹ ọkpọ wẹn na phihọ irhie na, phihọ igbo na, phihọ etẹrhe na, rere wo se igoro rhe otọ rẹ Ijipt na.

⁶Ọtiọye Erọn da riẹn obọ rọye phihọ ame rẹ Ijipt na; igoro na da rhe rhi rhurhu otọ rẹ Ijipt na.

⁷Ẹkẹvuọvo ihwo rẹ egbẹnẹkẹ na da rhe ayen de ji ru ọtiọye na vẹ egbẹnẹkẹ rayen, igoro da rhe otọ rẹ Ijipt na.

⁸Etiyin Fero de se Mosis vẹ Erọn, ọ da ta, Wa rẹ Ọrovwohwo rere o si igoro na nẹ uvwe oma vẹ oma rẹ ihwo mẹ; ki mi siobọ nẹ ihwo na re ze izobo kẹ Ọrovwohwo.

⁹Mosis da ta kẹ Fero, Gbe je o je we wọ ta kẹ vwẹ ọke re me vwọ rẹ, vwọ kẹ wẹ vẹ idibo wẹn kugbe ihwo wẹn rere igoro na vwọ guọghọ nẹ oma wẹ vẹ iwevwi wẹn rere ayen dia Nile ọvo.

¹⁰Ọ da ta, Odẹ. Mosis da ta, Gbe jọ dia kirobo re wọ tare na, rere wọ vwọ riẹn nẹ ohwo ọvuọvo herọ kerẹ Ọrovwohwo Ọghẹnẹ rẹ avwanre-e.

¹¹Igoro na che ne oma wẹn, vẹ iwevwi wẹn vẹ idibo wẹn, te ihwo wẹn; Nile ọvo kọye ayen cha dia.

¹²Ọtiọye Mosis vẹ Erọn da yan jẹ Fero vwo; Mosis de kperi se Ọrovwohwo fiki rẹ igoro na, kirobo rọ rhọvwe kẹ Fero.

¹³Ọrovwohwo de ru kirobo ri Mosis tare: igoro na de ghwu nẹ iwevwi na vẹ igodo na re kugbe evun rẹ aghwa na.

¹⁴Ayen da ghwẹ ayen koko, ẹkuẹko, otọ na ejobi ko gbo phi.

¹⁵Ẹkẹvuọvo ọke ri Fero vwọ mrẹ nẹ ufuoma hẹ otọ na re, udu rọye da rhoma gan, ọ rha kerhọ raye-en; kirobo rẹ Ọrovwohwo tare na.

¹⁶Etiyin Ọrovwohwo da ta kẹ Mosis, Ta kẹ Erọn, Riẹn ọkpọ wẹn na vwọ teye iwurhie rẹ otọ na, rere o rhi hirhe phihọ ishishi vwẹ otọ rẹ Ijipt na ejobi.

¹⁷Ayen de ru ọtiọye, Erọn da riẹn ọkpọ rọ obọ rọye phia, ọ da teye iwurhie rẹ otọ na, ishishi da rhe ro ihwo vẹ eranvwe; lwurhie rẹ otọ na ejobi da rhe vọn vẹ ishishi vwẹ evun rẹ otọ rẹ Ijipt na ejobi.

¹⁸Ihwo rẹ egbẹnẹkẹ na da vwẹ egbẹnẹkẹ rayen vwo se ishishi; ẹkẹvuọvo ayen se ruo-o. Ọtiọye na ishishi da ro ihwo vẹ eranvwe.

¹⁹Ihwo rẹ egbẹnẹkẹ na da ta kẹ Fero, ọnana urhiabọ rẹ Ọghẹnẹ. Ẹkẹvuọvo udu ri Fero je gan, ọ gbe sa kerhọ raye-en; kirobo rẹ Ọrovwohwo tare.

²⁰Etiyin Ọrovwohwo da ta kẹ Mosis, Vrẹn vwẹ irhiọke rhirhi wọ ra hẹrhẹ Fero, vwẹ ọke ro de kpo obo ame na, rere wọ ta kẹ, Enẹ Ọrovwohwo tare, Jẹn ihwo mẹ kpo rere ayen ra ga vwẹ.

²¹Ọ da dianẹ, wọ gbi jẹn ihwo mẹ kpo-o, nighe, ki mi che ji ekru lyẹn bru we rhe vẹ idibo wẹn vẹ ihwo wẹn, ke ro evun rẹ iwevwi wẹn; iwevwi rẹ ihwo rẹ Ijipt ke cha vọn vẹ iyẹn, ọtiọye jẹ otọ rayen mudia phihọ.

²²Ẹkẹvuọvo vwẹ ẹdẹ yena ki rni chẹ phi otọ ri Goshẹn phihọ akakọ, asan rẹ ihwo mẹ epha na, rere ekru iyẹn na Ọvuọvo vwo jẹ oboyi ete; rere wọ vwọ riẹn nẹ Mẹvwẹ Ọrovwohwo vwẹ uherevie rẹ akpọ na.

²³Enẹ kọye mi che phi ogharọ phihọ uvwre rẹ ihwo mẹ vẹ ẹwẹn. Vwẹ odẹ rọ cha na, oka nana kọ cha phia.

²⁴Ọrovwohwo de ghinẹ ru ọtiọye; ekru rẹ iyẹn ride na da rhan ro uwevwi ri Fero vẹ iwevwi rẹ idibo rọye, vwẹ evun rẹ otọ rẹ Ijipt na ejobi iyẹn na da gnọghọ otọ na re.

²⁵Eriyin Fero de se Mosis vẹ Erọn, ọ da ta, Kpo, re ze izobo kẹ Ọghẹnẹ wẹn vwẹ evun rẹ otọ na.

²⁶Ẹkẹvuọvo Mosis da ta, ọ she phihọ re vwo ru ọtiọye-e; kidie emu rẹ ihwo rẹ Ijipt gha eye me che vwo ze izobo kẹ Ọrovwohwo Ọghẹnẹ rẹ avwanre. Ọ da dianẹ avwanre ze izobo rẹ obo rẹ ihwo rẹ Ijipt gha vwẹ irharo rayen, ayen gbi phi avwanre?

²⁷Avwanre yan oyan rẹ ẹdẹ erha kpo evun rẹ aton re ze izobo kẹ Ọrovwohwo Ọghẹnẹ rẹ avwanre kirobo ro ji urhi kẹ avwanre.

²⁸Ọtiọye na Fero da ta, Mi jẹn uwe kpo, re ze izobo kẹ Ọrovwohwo Ọghẹnẹ wẹn vwẹ evun rẹ aton; jokpa nẹ wa gbe yan sheri-i. Rẹ kẹ vwẹ.

²⁹Etiyin Mosis da ta, Nighe, me cha yan ju we vwo kẹ me cha rẹ Ọrovwohwo rere ekru iyẹn na vwo nẹ oma ri Fero, nẹ idibo rọye, vẹ ihwo rọye, odẹ; we rhe jẹn Fero phiẹn ohwo ọfa-a ro vwo jẹn obọ esionẹ ihwo na re ze izobo kẹ Ọrovwohwo.

³⁰Ọtiọye na Mosis da yan jẹn Fero vwo ọ da ra rẹ Ọrovwohwo.

³¹Ọrovwohwo de ru kirobo ri Mosis nọre, o de si iyẹn na nẹ oma ri Fero vẹ idibo rọye kugbe ihwo rọye, ọvuọvo gbi chekọ-ọ.

³²Ẹkẹvuọvo udu ri Fero je gan obọ nana rhe na, o gbi jẹn ihwo na kpo-o.