Read urhobo Ẹyano 9 Bible Online

Ẹyano 9 - urhobo bible

Ẹyano 9

¹Etiyin Ọrovwohwo da ta kẹ Mosis, Yanran bru Fero, rere wọ ta kẹ, Enẹ Ọrovwohwo na tare, Ọghẹnẹ rẹ ihwo ri Hibru na, Jẹ ihwo mẹ kpo, rere ayen ra ga vwẹ.

²Kidie wọ da sẹn nẹ ayen kpo-o ru wọ da je yọnrọn ayen,

³nighe, obọ rẹ Ọrovwohwo na kọ che she tuatua vẹ ọtiekọ kpahe uchuru wẹn ri evun rẹ aghwa, iyesi na, ekẹtẹkẹtẹ na, kamẹl na, ekru rẹ irhuẹn, vẹ ekru rẹ igodẹ na.

⁴Ẹkẹvnọvo Ọrovwohwo che phi ofẹnẹ phihọ eranvwe rẹ ihwo rẹ Izrẹl vẹ erẹ Ijipt, ọtiọye na emu ọvuọvo gbi che ghwu nẹ iri ihwo rẹ Izrẹl na-a.

⁵Ọrovwohwo de bru ọke kẹ tanẹ, Ọdẹ rẹ cha Ọrovwohwo ko che ru emu nana vwẹ otọ na.

⁶Odẹ vwo te Ọrovwohwo de ru emu nana: uchuru rẹ ihwo rẹ Ijipt ejobi de ghwu re, yẹ ọvuọvo ghwu nẹ iri ihwo rẹ Izrẹl na-a.

⁷Fero de ji ihwo, nighe, ọvuọvo ghwu vwẹ uchuru rẹ ihwo rẹ Izrẹl na-a. Ẹkẹvuọvo yẹ udu ri Fero je gan phihọ, o gbi ji siobọ nẹ ihwo na kpo-o.

⁸Ọrovwohwo na da ta kẹ Mosis vẹ Erọn, Ghwẹ ẹkuobọ vọn vẹ iwurhie nẹ enyerhanre na, wo ji Mosis phi ayen kpenu vwẹ irharo ri Fero.

⁹Ko cha dia iwurhie vwirivwiri vwẹ enu rẹ otọ rẹ Ijipt ejobi, ko che hirhe phihọ irubẹ ri bre era vwẹ oma rẹ ihwo vẹ eranvwe vwẹ otọ rẹ Ijipt ejobi.

¹⁰Ọtiọye na ayen da rọye iwurhie nẹ enyerhanre na, ayen de mudia vwẹ obaro ri Fero, Mosis de phi ayen kpenu, o de rhi hirhe phihọ iribẹ rẹ era vwẹ oma rẹ ohwo vẹ eranvwe.

¹¹Otu rẹ egbẹnẹkẹ na gbi se dede Mosis fiki rẹ iribẹ na-a, kidie iribẹ na ji mu ihwo rẹ eghẹnẹkẹ na vẹ ihwo rẹ Ijipt ejobi.

¹²Ẹkẹvuọvo Ọrovwohwo de ru udu ri Fero gan, ọ rha kerhọ raye-en; kirobo rẹ Ọrovwohwo ta kẹ Mosis.

¹³Etiyin Ọrovwohwo da ta kẹ Mosis, Fobọ vrẹn vwẹ irhiọke rere wọ re mudia vwẹ obaro ri Fero, rere wọ ta kẹ, Enẹ Ọrovwohwo na, Ọghẹnẹ ri Hibru tare, Jẹn ihwo mẹ kpo rere ayen ga vwẹ.

¹⁴Kidie vwẹ ọke nana me cha vwẹ ọtiekọ mẹ ejobi teyọ udu wẹn, te idibo wẹn, vẹ ihwo wẹn, rere wọ vwọ riẹn nẹ ohwo ọvuọvo rọ họhọ ovwẹ vwẹ otọ rẹ akpọ na herọ-ọ.

¹⁵Kidie asan rẹ ọke teri na ye me vwẹ obọ mẹ vwọ vwẹ emiavwe mu we vẹ ihwo wẹn, manẹ yẹ si we nẹ akpọ na re.

¹⁶Ẹkẹvuọvo fiki rẹ ọnana me vwọ yan ju we vwo vwẹ akpọ, rere e vwo dje ogangan mẹ kẹ wẹ, rere a vwẹ odẹ mẹ phia vwẹ akpọ na ejobi.

¹⁷Wọ je kpare oma wẹn kpenu kpahe ihwo mẹ, wọ je rhọvwẹ nẹ ayen kpo-o.

¹⁸Nighe, odẹ ọke ọtiọna me nẹrhẹ okposio rode rẹ imieho rhọ, rọ je rhọ vwẹ Ijipt na dẹvo-o nẹ ọke ra vwọ fan rhi te ọke nana.

¹⁹Asakiephana gbe ji, ra ghwẹ uchuru wẹn kugbe obo wo vwori ejobi vwẹ obo aghwa vwo kpo asan ro fu ayen oma; kidie osio rẹ imicho na cha rhọ phihọ enu ri kohwo kohwo kugbe eranvwe keranvwe rọ evun rẹ aghwa ra rẹyọ kpo uwevwi-i, ayen ki ghwu.

²⁰Etiyin ohwo rọ djẹ oshọ rẹ ota rẹ Ọrovwohwo vwẹ usun rẹ idibo ri Fero na da vwẹ eviẹn rọye vẹ eranvwe rọye djẹ kpo iwevwi;

²¹ẹkẹvuọvo ohwo ro se ota rẹ Ọrovwohwo gbemuu da yan jẹn eviẹn rọye vẹ uchuru rọye vwo vwẹ evun rẹ aghwa.

²²Ọrovwohwo da ta kẹ Mosis, Riẹn obọ wẹn kpenu, rere osio rẹ imicho rhọ phihọ otọ tẹ Ijipt na ejobi, vwẹ enu rẹ ohwo vẹ eranvwe vẹ kurhe kurhe rẹ aghwa na, vwẹ otọ rẹ Ijipt na ejobi.

²³Etiyin Mosis da riẹn ọkpọ rọye kpenu; Ọrovwohwo da vwẹ agbrara vẹ osio rẹ imicho rhe, erhanre da rhe otọ na. Ọrovwohwo da rhọ osio re imicho phihọ otọ rẹ Ijipt na;

²⁴osio rẹ imicho na da rhọ, erhanre kọ nyavwaro phẹrẹphẹrẹ vwẹ evun rẹ osio rẹ imicho na, osio rẹ imicho na rhoro gangan, a je mrẹ oghẹrẹ rọye vwẹ otọ rẹ Ijipt na dẹvo-o rhabae rọ vwọ dia ẹgborho na.

²⁵Osio rẹ imicho na de ghwie kemn kemu rọ evun rẹ aghwa vwẹ otọ rẹ Ijipt na ejobi she, te ohwo te eranvwe; osio rẹ imicho na de ghwie kurhe kurhe rẹ aghwa na ejobi she, ọ da hra kurhe kurhe rẹ aghwa na ejobi.

²⁶Jokpa rẹ otọ ri Goshẹn ọvo, asan rẹ ihwo rẹ Izrẹl epha na ọvo osio rẹ imicho na de jẹ rhọ.

²⁷Etiyin Fero de ji ihwo re se Mosis vẹ Erọn, ọ da ta ke ayen, Mi ru imwemwu vwẹ obọ nana; Ọrovwohwo re re ase, te mẹvwẹ vẹ ihwo mẹ ru chọ .

²⁸Rẹ Ọrovwohwo na, kidie osio rẹ imicho na vẹ agbrara na teri; mi jẹn uwe kpo, we gbi rhe mudia ọfa-a.

²⁹Mosis da ta kẹ, ọke ri mi de ghwe nẹ orere na nu, ke me bẹrẹ abọ mẹ kẹ Ọrovwohwo: agbrara na kọ daji, osio rẹ imicho na gbe rhọ ọfa-a, rere wọ vwọ riẹn nẹ Ọrovwohwo ri vwo akpọ na.

³⁰Ẹkẹvuọvo vwọ kẹ we vẹ idibo wẹn, me riẹnre nẹ wọ je djẹ oshọ rẹ Ọrovwohwo Ọghẹnẹ-ẹ.

³¹Iruru na vẹ ẹka na da guọghọ, kidie eka na ghwa mọ vwẹ obọ, iruru na je ghwa so phihọ vwẹ obọ.

³²Ẹkẹvuọvo eka na vẹ ughẹ rayen eguọghọre-e, kidie ayen fobọ djẹ phia-a.

³³Ọtiọye na Mosis de nẹ orere na nẹ oma ri Fero, ọ da bẹrẹ abọ rọye kẹ Ọrovwohwo; agbrara na vẹ osio rẹ imicho na da daji, osio gbe rha rhọ vwẹ otọ na ọfa-a.

³⁴Ẹkẹvnọvo ọke ri Fero vwọ mrẹ nẹ osio rẹ imicho na vẹ agbrara na daji nnre, ọ da rhoma ru umwemwu, o de ru udu rọye gan, te ọye vẹ idibo rọye.

³⁵Ọtiọye na udu ri Fero da rhoma gan, ọ gbe rhọvwe siobọ nẹ ihwo rẹ Izrẹl kpo-o; kirobo rẹ Ọrovwohwo wan oma ri Mosis ta.