Read urhobo Job 1 Bible Online

Job 1 - urhobo bible

Job 1

¹Ohwo ọvo herọ vwẹ otọ rẹ Uz, odẹ rọye Job; ohwo na vwẹ eka-an jẹ ohwo ọsoso oruẹ, ohwo rọ djẹ oshọ rẹ Ọghẹnẹ, o de sioma nẹ umiovwo.

²Emeshare ighwrẹ vẹ emetẹ erha eye e vwiẹ kẹ.

³O vwo igegede uriorin ighwrẹ, kamẹl uriorin erha, irhuẹn ivive ra vwọ ya ohwohwo ujorin iyori, kugbe ekẹtẹkẹtẹ ujorin iyori, vẹ idibo buebu; eriyin na ohwo nana kọye ma rho vwẹ obaro ọnre na ejobi.

⁴Emọ rọye ki kpo orẹ vwẹ uwevwi rẹ ohwo ọvuọvo vwẹ ẹdẹ ro tere, ayen mi re se iniọvo rayen rẹ emetẹ erha na nẹ inene ayen re je da kugbe.

⁵Ẹdẹ rẹ orẹ na da wan re, Job mi ji ohwo re ru ayen fon, o mi vrẹn vwẹ irhiọke rhirhi ra gọ iye rẹ izobo rẹ ẹtorhẹ kirobo rẹ ayen ejobi bute; kidie Job tare nẹ, Siẹvo ye emọ mẹ na ru umwemwu, rẹ ayen da je harhẹ Ọghẹnẹ vwẹ udu rayen. Kẹ enẹ Job ruẹ kọke kọke.

⁶Asakiephana ẹdẹ ọvo kọ herọ rẹ emọ rẹ Ọghẹnẹ vwọ rhe, rhe vwẹ oma phia kẹ Ọrovwohwo, Ẹdjọ da je rhe ohri rayen.

⁷Ọrovwohwo da ta kẹ Ẹdjọ, Bovọ wọ nurhe vwo? Ẹdjọ da kpahe kẹ Ọrovwohwo nẹ, Me de yan kpuko kparo kpenu kpotọ vwẹ evun rẹ akpọ na.

⁸Ọrovwohwo ke rha ta kẹ Ẹdjọ, Wọ karohọ odibo mẹ Job, ọrọ họherọ vwẹ akpọ na herọ-ọ, ohwo ro vwo eka-an ọ ke je dia ohwo ọsoso, ohwo rọ djẹ oshọ rẹ Ọghẹnẹ o de ji sioma nẹ umiovwo?

⁹Etiyin Ẹdjọ ke kpahe kẹ Ọrovwohwo, Job de djẹ oshọ rẹ Ọghẹnẹ ghevweghe?

¹⁰O dia owẹ re gba ogba yariẹ vẹ uwevwi rọye kugbe obo ro vwori ejobi, vwi kabọ kabọ? Wo bruba kẹ iruo rẹ abọ rọye, emu ro vwori ejobi rhi bu phihọ vwẹ otọ na.

¹¹Ẹkẹvuọvo gba riẹn obọ wẹn vwẹ etinẹ na, vwo te obo ro vwori, kọ cha harhẹ o wẹ phia.

¹²Ọrovwohwo ke ta kẹ Ẹdjọ, Nighe, obo ro vwori ejobi e hẹ ogangan wẹn; jokpa rẹ ekpuyovwi rọye wo je obọ wẹn e vwo te. Ọtiọye na Ẹdjọ da yanran nẹ obaro rẹ Ọrovwohwo.

¹³Kọye ẹdẹ ọvo re emeshare vẹ emetẹ rọye ke ria emu da udi vwẹ uwevwi rẹ oniọvo rayen rẹ ọkpako;

¹⁴ọyinkọ ọvo de bri Job rhe, tanẹ, Irhuẹn na re voro yẹ ekẹtẹkẹtẹ na ra ria emu vwẹ ọkọkọ rẹ ayen;

¹⁵ihwo rẹ Seba da ghwe rhurhu ayen, ayen de mu ayen kpo, ayen da vwẹ ọlọkọ nyavwẹ idibo na hwe, mẹvwẹ ọvo kọye djẹ vabọ rhe vuẹ wẹ na.

¹⁶Ro je ghwa vwọ ta ota na, ọfa da djẹ rhe, tanẹ, Erhanre rẹ Ọghẹnẹ she nẹ enu rhe ọ da torhẹ igegede vẹ idibo na, i de ghwu; mẹvwẹ ọvo re vabọ rhe vuẹ we na.

¹⁷Rọ je ghwa vwọ ta ota na, ofa da djẹ rhe, tanẹ, Ihwo ri Kaldia de koko unuofovwi erha, ayen de gborho kamẹl na ayen da ghwẹ ayen reyọ, ayen da vwẹ ọlọkọ hwe idibo na, mẹvwẹ ọvo kọye vabọ rhe vuẹ we na.

¹⁸Rọ je ghwa vwọ ta ota na, ọfa da rhe, tanẹ, Emeshare vẹ emetẹ wẹn herọ ria emu da udi vwẹ uwevwi rẹ iniọvo rayen rẹ ọkpako,

¹⁹gbe nighe, odju rode ọvo de dju nẹ aton rhe, rhe teye ibienyẹ ẹne rẹ uwevwi na, o de she teye imighene na, ayen de ghwu, mẹvwẹ ọvo re vabọ rhe vuẹ we na.

²⁰Etiyin Job de vrẹn ọ da bẹrẹ ewu rọye, ọ da wanre uyovwi rọye, o de she teye otọ, ọ da ga Ọghẹnẹ.

²¹Ọ da ta, Ẹbẹba mi vwo nẹ uwevwievwiẹ rẹ oni mẹ rhe, ẹbẹba me che vwo hirhe, Ọrovwohwo re kerẹ, Ọrovwohwo re je reyọ, ebruphihọ kẹ odẹ rẹ Ọrovwohwo na.

²²Vwẹ evun rẹ enana ejobi na Job ru umwemwu-u eyẹ mu ota barẹ Ọghẹnẹ-ẹ.