Read urhobo Job 10 Bible Online

Job 10 - urhobo bible

Job 10

¹Arhọ mẹ nu vwe ọhọ; ki mi gu obo re me mrẹre phia, ke me ta ota vwẹ evun rẹ ophu ro mu vwe djọghọ-djọghọ na.

²Me ta kẹ Ọghẹnẹ nẹ wo brẹhwe vwe-e; ju vwe riẹn obo re sorọ wọ vwọ họnra ovwẹ.

³Ofori kẹ wẹ re wo vwo shenyẹ ohwo, wọ vwọ siẹn iruo rẹ obọ wẹn, wọ rhọvwe phihọ iroro rẹ oruimwemwu?

⁴Ibiẹro rẹ ugboma wo vwori? Wọ mrẹ emu kirobo rẹ ohwo mrẹ?

⁵Ẹdẹ wẹn kọ họhọ ẹdẹ rẹ ohwo rẹ akpọ, eyẹ kẹ ikpe wẹn họhọ ikpe rẹ ohwo,

⁶ru wọ vwọ guọnọ orukuruku mẹ phia, ru wọ je vwọ guọnọ umwemwu mẹ?

⁷Yu wọ riẹnre nẹ me re abe-e, ye ohwo ọvuọvo herọ rọ se sivwe nẹ abọ wẹ-ẹ?

⁸Abọ wẹn re kare ovwẹ ayen je ma vwẹ; asakiephana wo kuoma rhẹriẹ wọ da ghwọrọ ovwẹ.

⁹Karohọ nẹ ọphiẹn wọ vwọ ma vwẹ; ku wọ rhọma hirhe uvwe kpo ekpẹn?

¹⁰Wo rhe ku vwe fia kerẹ ameivie-e ri mi de dje kerẹ evwri-i?

¹¹Wọwẹ re vwe ohọrọma vẹ uvwo vwo rhuo vwe, wọ da vwẹ ibeku vẹ iriẹn vwo so vwẹ gba.

¹²Wẹwẹ re kẹ vwẹ arhọ vẹ ẹguọnọ esiri; ẹruẹvwote wẹn yi ri sivwi erhi mẹ.

¹³Imu nana ejobi na wo si nu vwẹ udu wẹn, me riẹnre nẹ ọnana iroro wẹn.

¹⁴Mi de ru umwemwu, wẹ re ka oka phihọ ovwẹ, wo si vwe nẹ orukuruku mẹ-ẹ.

¹⁵Me da dia ohwo umwemwu, ekan dia kẹ vwẹ! Me da dia ovwata, me sa kpare uyovwi mẹ-ẹ; kidie me vọnre vẹ omaẹvuọ gbe ni ọdjarhe mẹ.

¹⁶Me da kpare oma mẹ kpenu, ku wọ vwẹ ovwẹ bẹrẹ ibefi kerẹ okpohrokpo, wọ da rhoma ru iruo rẹ igbunu kpahe ovwẹ;

¹⁷wọ rhoma se iseri ọkpokpọ kpahe vwẹ, ophu wẹn da rhoma buphihọ kpahe ovwẹ, wọ da ghwẹ otuofovwi ekpokpọ vwọ so ovwẹ.

¹⁸Die jabọ wo vwo si vwe nẹ uwevwiẹ rhe? Manẹ mi ghwuru rẹ ẹro ke mrẹ vwẹ,

¹⁹Kerẹsiẹ ra mrẹ nẹ me je dia dẹvo-o yẹ e mu vwe nẹ evun rhe kpo ushi.

²⁰Ẹdẹ rẹ akpọ mẹ rha havwe-e? ju vwe vwọ, rere oma fuvwe emerha,

²¹tavwe mi ki kpo nẹ etinẹ, mi gbi rhivwi-i, kpo otọ rẹ okuku vẹ ebri rode na-a,

²²otọ rẹ okuku vẹ ozighi, asan rẹ urhukpẹ da họhọ ebri.