Read urhobo Job 11 Bible Online

Job 11 - urhobo bible

Job 11

¹Etiyin Zofa rẹ ohwo ri Naamat da kpahe nẹ;

²A rha kpahe phihọ eta ibuebu na, ohwo rọ ta eta buebu na sa re ase?

³Eta ibuebu wẹn na nẹrhẹ ihwo rhurhu unu, wọ da vwẹ ihwo jehwe, ohwo rhe ku omẹvuọ phihọ ọwe ẹrọ?

⁴Kidie wọ tare, A gua uyono mẹ-ẹ, me pha fuanfon vwẹ ẹro rẹ Ọghẹnẹ.

⁵Ẹkẹvuọvo e, mane kẹ Ọghẹnẹ a ta ota vwonẹ, ro rhie unu rọye kẹ wẹ,

⁶kọ ta odjahọ rẹ aghware kẹ we kidie o vwo erianriẹn buebu. Riẹn nẹ obo rẹ Ọghẹnẹ guọnọ mie we havwe nọ abe ru wọ ruru.

⁷Wọ sa guọnọ emu ikokodo rẹ Ọghẹnẹ phia? ku wọ sa guọnọ oba rẹ Ọrovwoẹgba na mrẹ?

⁸Okpenu vrẹn odjuvwu — die wo se ru? Okodo vrẹn Erivwi — die wo su ru?

⁹Ovwanvwọn rọye gro vrẹn akpọ na, ọ je herẹ vrẹn abadi na.

¹⁰Ọ da dianẹ ọ wanvrẹn, o de mu ohwo phihọ uwodi, o de se ihwo kpo ẹdjọ, kono sa daji?

¹¹Kidie o vughe orharhe rẹ ihwo; ọke rọ da mrẹ orukuruku re, ọ gbi rhe roro-o?

¹²Ẹkẹvuọvo ohwo rhurhu ki rhi vwo erianriẹn, yẹ vwiẹ upene rẹ ekẹtẹkẹtẹ rẹ aghwa kerẹ ohwo.

¹³Ọ da dianẹ wọ kpọ udu wẹn vi, ku wọ riẹn abọ wẹn bro.

¹⁴Ọ da dianẹ orukuruku he obọ wẹn, kuo fia shesheri, wo jẹ umwemwu dia itughe wẹ-ẹn.

¹⁵Uyota ku wọ cha kpare opharo wẹn kpenu sasasa, ku wọ dia ofuvwegbe, wọ gbe djẹ oshọ-ọ.

¹⁶Oja wẹn kẹ chọro owẹ ẹro, wo cha karohọ kerẹ ọkere rọ djẹ wanvrẹn

¹⁷Akpọ wẹn ko che phẹn kerẹ uvo; ebri rọye kọ cha họhọ irhiọke.

¹⁸Udu wẹn kọ dia kọi, fikiridie iphiẹrohọ herọ, ke che rhurhu we ku wo rovwoma vwẹ ofuvwegbe.

¹⁹Ku wo shevwerhe te otọ, ohwo ọvuọvo gbe djẹ oshọ mu we-e, ihwo buebu ke cha guọnọ ẹroesiri wẹn.

²⁰Ẹkẹvuọvo oma ke cha rhọ ibiẹro rẹ ohwumwemwu idjerhe ra wan djẹ vabọ chọrọ ayen ẹro iphiẹrohọ rayen kẹ ughwu ọvo.