Read urhobo Job 12 Bible Online

Job 12 - urhobo bible

Job 12

¹Job da kpahe:

²Omuẹro ovwan ihwo na, aghwanre ghwu nene ovwan.

³Ẹkẹvuọvo mi vwo erianriẹn kirobo we vwori, mi rhe yovwi nọ ovwa-an.

⁴Mi hirhe phihọ ehwẹjẹ kẹ igbeyan mẹ; mẹvwẹ, ro se Ọghẹnẹ o mi nyo kevwẹ na, ohwo ọsoso ro vwo abe-e, mi hirhe phihọ ehwẹjẹ.

⁵Vwẹ iroro rẹ ohwo rẹ oma furu ehwẹjẹ kẹ ohwo ro miovwi uyovwi, ọ choma kẹ otu rẹ otọ ghworiẹre.

⁶Itughẹ rẹ igbunegbu herọ vwẹ ufuoma, otu re kpare Ọghẹnẹ ophu ayen herọ vwẹ ofuvwegbe, i ri mu edjọ rayen gbere abọ ayen cha.

⁷Ẹkẹvuọvo gba nọ eranvwe rẹ aghwa na, ayen ki yono uwe, emephran rẹ obenu na, ayen ke ta ke owẹ;

⁸eyẹ ekakon rẹ otọ na, ayen ki yono uwe; iyerin rẹ abadi na ayen ki ghwọghwo kẹ owe.

⁹Ono vwẹ ohri rẹ enana ri jẹ riẹn nẹ obọ rẹ Ọrovwohwo ri ru ọnana?

¹⁰Obọ rọye arhọ ri kemu kemu epha kugbe ẹnwẹn rẹ ihwo na ejobi.

¹¹Erhọn rha davwẹ eta nẹ kirobo rẹ ẹrẹnvwe unu davwẹ emu?

¹²Ekpako na ri vwo aghwanre, erianriẹn kẹ obọ rẹ otọvwe.

¹³Ọghẹnẹ ọye aghwanre vẹ ẹgba rheri; ọye vwẹ eroro kugbe ọhọ.

¹⁴O de kporo te otọ nu, ohwo ọvuọvo sa bọ-ọn, ọ de huhu eche gbe ohwo nu, ohwo ọvuọvo se rhie-e.

¹⁵Ọ da dianẹ ọ da ame ji, ame na kọ kpọ, ọ da dianẹ o siobọ nẹ ayen, e me vọn ro otọ na mwavwe hwẹ.

¹⁶Obọ rọye ẹgba vẹ aghwanre epha, tẹ ọraphiẹnre vẹ ọphiẹn-ihwo erọye.

¹⁷O suẹn ọbuiroro yanran ẹbẹba, Ibrorhiẹ na o mi rhe ru ayen phihọ ẹkpa.

¹⁸Ọ rhan ufi rẹ ivie na, o mi rhe churu ukpaghwa si ayen ehu.

¹⁹O suẹn irherẹn yanran ẹbẹba, o mi rhe geri egba she.

²⁰O gbe ota phihọ unu re ihwo re ayen vwẹ ẹruẹvwọsuọ, O mi si ọmrẹvughe rẹ ekpako na nẹ ayen oma.

²¹O ku omẹvuọ kuẹ emọ re ivie, ọ me rhan umuehu rẹ ọgba na.

²²O rhiẹ emu ikokodo djigbri phihọ, o mi rhe hirhe ebri kpoi phihọ urhukpe.

²³O ruẹ ẹgborho rhua, Ọ me rha guọghọ ayen, O ruẹ ẹgborho rua, ọ mi sun ayen yanran.

²⁴Ọ reyọ erianriẹn miẹ igbuyovwi rẹ akpọ na, ọ me nẹrhẹ ayen ghọrọ ayen vwẹ asan ri jẹ obẹnẹ evwo.

²⁵Ayen ghoro abọ yan vwẹ ebri ro vwo urhukpẹ-ẹ; kọ nẹrhẹ ayen gele kerẹ ohwo rẹ idi muẹ.