Read urhobo Job 14 Bible Online

Job 14 - urhobo bible

Job 14

¹Ohwo rẹ aye vwiẹri, ẹmẹdẹ rọye pha krẹkrẹ, ọ je vọn vẹ ukpokpogho

²O yoro phia kerẹ ododo, ọ mi vwioro; Ọ rhan kerẹ uhoho, o mudia fọ vwẹ asan ọvo-o.

³Ku wo rhiẹ ẹro wẹn phiyọ kẹ oghẹre rẹ ohwo ọtiọye wọ me reyọ rhi vwo guẹdjọ?

⁴Ono ri si emu ọfuanfon nẹ evun rẹ emu ogbegbe cha? O vwo ọvuọvo-o.

⁵Re vwo bru ẹdẹ rọye kpahe nure na, rẹ unu rẹ emeranvwe rọye vwọ hẹ obọ wẹn na, ru wo vwo gbere ughwru kẹ rọ yan ba,

⁶ku ẹro fia, rere wo da obọ ji, rere ọ mrasa ghọgho vwẹ ẹdẹ rọye, kerẹ ọredurhieri.

⁷Kidie iphiẹrohọ ọvo ọye urhe vwori, ọ da dianẹ eshere teye otọ, ọ je cha rhoma tanrhe, eghọn rọye che fue-e.

⁸Owenẹ owọ rọye kriri vwẹ otọ na, rẹ uchuku rọye de ghwu vwẹ otọ na,

⁹dede na ọ de ghwe nyo ọrhen rẹ ame kọ sa ẹroro o me tan eghọn kerẹ umurhe ọboba.

¹⁰Ẹkẹvuọvo ohwo ghwẹ, ka riẹn phihọ otọ, ohwo de she ẹnwẹn nu, ki tivọ ọ epha?

¹¹Kirobo rẹ ame kpọ nẹ ẹtẹrhe na, rẹ urhie da djẹ kpọ ọ me ya na,

¹²eriyin ohwo sherhẹ nẹ o rhe vrẹn ọfa-a; bẹsiẹ rẹ idjuvwu vwo re o rha rhọvwọ-ọ, eyẹ a gbe rhọvwọ nẹ ovwerhẹ rọye-e.

¹³E manẹ wọ sivwe nu vwẹ Erivwi vwonẹ, ku wa vwẹ ovwẹ djahe bẹsiẹ rẹ ophu wẹn vwo fue, mane we bru ẹkẹ kẹ vwẹ, wọ vwọ karohọ ovwẹ!

¹⁴Ọda dianẹ ohwo ghwuru, ko je sa rhọ? Vwẹ ẹdẹ rẹ iruo mẹ ejobi ke me hẹrhẹ, bẹsiẹ rẹ obọ esiono mẹ vwọ rhe.

¹⁵Ku wo se, ki mi nyo we, ku wo rhẹro rẹ iruo rẹ abọ wẹn.

¹⁶Kẹsiẹye wo ki keri ichihi mẹ, wo rha diotọ rhẹrẹn umwemwu mẹ-ẹ,

¹⁷Ke kru ogbeku mẹ phihọ ebo, ku wo se rhurhu orukuruku mẹ.

¹⁸Ẹkẹvuọvo ugbenu she o mi kporo kufia, o mi si ikuta na nẹ ẹdia rọye,

¹⁹ame na hworhẹ elalọ na kuẹfia, ọkẹre na ra fa ekpẹn rẹ otọ kuẹfia, eriyin wọ ghwọrọ iphiẹrohọ rẹ ohwo.

²⁰Wẹwẹ re kparobo nọ bẹdẹ, ọ da wan vrẹ, wẹwẹ re rhẹriẹn opharo rọye, wọ me djẹ yanran.

²¹Emọ rọye me rhe rho te ọghọ, jọ riẹnre-e, a vwẹ ayen hwaotọ, yo mrẹrẹ vughe-e.

²²Ẹmiavwọ rẹ ugboma rọye ọvo o nyori, o de muoma phihọ kẹ oma rọye ọvo.