Read urhobo Job 15 Bible Online

Job 15 - urhobo bible

Job 15

¹Etiyin Elifaz ri Teman da kpahe:

²Ọvwaghwanre sa vwẹ ẹriẹn rẹ aphopho kpahe ota, rọ da vwẹ odju rẹ obaro ọnre vwo vọn oma rọye?

³kẹ ọ sa vwẹ eta ro vwo erere-e vwọ phro aphro, eyẹ kẹ eta re se vwo ru obo ri yovwi-i na?

⁴Ẹkẹvuọvo wo herọ djẹ oshọ rẹ Ọghẹnẹ kuẹfia, wọ ra da umẹ-ese rẹ obaro rẹ Ọghẹnẹ ji.

⁵Kidie orukuruku wẹn yono unu wẹn, wo da jẹ ẹrẹnvwe rẹ ọphiẹvwe reyọ.

⁶Unu wẹn ọvo ri bruhwe we, ọ dia omẹvwẹ-ẹ, igbenu wẹn ọvo se oseri rhurhu uwe.

⁷Wẹwẹ ohwo rẹ ẹsosuọ re ke vwiẹ? Eyẹ e vwiẹ wẹ nu tavwe rẹ igbenu na ke mama?

⁸Wọ je kerhọ vwẹ ẹguare rẹ Ọghẹnẹ? Obọ wẹn aghwanre da ba?

⁹Die wọ riẹnre rẹ avwanre jẹ riẹn? Die wo vugheri ro phẹ kẹ avwanre-e?

¹⁰Ihwo re dje esha vẹ emare hẹ ohri rẹ avwanre, e re kpako nọ ọse wẹn.

¹¹Uchebro rẹ Ọghẹnẹ havwe nọ kẹ wẹ, gbenẹ kẹ ota rọ lọhọre ra ta kẹ owẹ na?

¹²Die sorọ rẹ udu wẹn vwọ ghwa wẹ yanran, die nẹrhẹ ẹro wẹn la erhanre,

¹³re wọ da kpare erhi wẹn vwọ so Ọghẹnẹ, re eta tiọna na de nẹ unu wẹn cha?

¹⁴Die ohwo epha, rọ sa vwọ fuan? Eyẹ ọ rẹ aye vwiẹri na, rọ vwọ sa dia ọvwata?

¹⁵Nighe, Ọghẹnẹ vwẹ ẹro so otuefuanfon rọye na-a, idjuvwu na je fọn vwẹ obaro rọye-e;

¹⁶ko mavọ ọ epha kẹ ohwo ro gbe ẹgua ro ji miovwi, ohwo rọ da orukuruku kerẹ ame!

¹⁷Mi che dje kẹ wẹ, gbe nyo vwe; obo re me mrẹre mi che ghwoghwo

¹⁸(obo rẹ evwaghwanre tare, rẹ esẹ rayen sinu-u,

¹⁹ọye ọvo a vwẹ otọ na kẹ, ọrhorha rha sa wan ọhri rayen vrẹ-ẹn).

²⁰Ohwo umwemwu re gbune vwẹ emiavwe rọye vwẹ ẹdẹ rọye ejobi, Vwẹ ikpe na ejobi re bru koko kẹ ohwo ogbarogba.

²¹Edo rẹ imuoshọ vẹ erhọn rọye; vwẹ oyovwe rọye oghwọrọ na de che brora.

²²O segbuyota nẹ ọye che rhivwi nẹ ebri na cha-a, e vwi ro ze kẹ olokọ nure.

²³O hiro ghoro guọnọ emu, ta nẹ, Ọrhọ vwọ? O riẹnre nẹ ẹdẹ rẹ ebri sikẹre otọ re;

²⁴ukpokpogho vẹ odjadja muo oshọ, ayen phiro kua, kerẹ ovie ro choma kẹ ofovwi.

²⁵Fikiridie o gbobọ se Ọghẹnẹ, o de gbe ota phihọ Ọrovwoẹgba na unu,

²⁶ọ ra djẹ vẹ udu ọgangan vwọ kpahọ vẹ ekpọfia rọye;

²⁷fikiridie ọ vwẹ ivwri rọye vwo rhurhu opharo rọye, ọ da je ghwẹ ọrho kpahe ehun rọye,

²⁸ọ da ra dia irere re kua fiotọ, vwẹ iwevwi rẹ ohwo ọvuọvo dia-a, re a ta phihọ nẹ e dia erhurhu;

²⁹o se fe-e, eyẹ efe rọye je tọ-ọn, eyẹ ọ sa tọn owọ rọye vi otọ-ọ;

³⁰ọ sa djẹ vabọ nẹ ebri na-a; ẹkuerhanre cha ya eghọn rọye, odju che djuẹ idodo rọye kuẹfia.

³¹E jọ vwẹ ẹro kpahe ofefe, rọ phiẹn omobọ rọye-e; kidie ofefe na re cha dia osa rọye.

³²A cha hwa gba tavwe rẹ oke rọye ki te, oghọn rọye gbe sa dia oboba-a.

³³Ọ cha kpare emamọ rọye re ekanabọ she, kerẹ vain, kọ kpare idodo rọye she, kerẹ urhe re oliv.

³⁴Kidie usun rẹ otu re riẹn Ọghẹnẹ-ẹ kẹ ẹga e dia, erhanre kọ guọghọ itughẹ rẹ eriudi.

³⁵Ayen mrevun rẹ ọkon ayen de vwiẹ umiovwo, udu rayen ra rhuẹrẹ ọphiẹnvwe kpahe.