Read urhobo Job 16 Bible Online

Job 16 - urhobo bible

Job 16

¹Job da kpahe:

²Mi nyo eghẹre rẹ imu tienana re; ovwan na ejobi erharhe rẹ ibruche ovwan ruẹ.

³Eta ifefe rhe vwo oba? Gbenẹ die mu ovwan ophu rẹ ovwan vwọ kpahe na?

⁴Me je sa ta ota kirobo rẹ ovwan ta na, ovwan da je hẹ asan re me epha na; Me je sa ta eta etiọye vwọ kpahe ovwan, ji kpogho uyovwi kẹ ovwan.

⁵Me sa vwẹ unu mẹ phi udu phihọ ovwan awọ, uchebro rẹ ẹbẹrunu mẹ ko fue emiavwe wẹn.

⁶Ọ da dianẹ me ta ota, emiavwe mẹ na vwiro kpo-o, ọ da dianẹ mi chiro, komavo o vworo uvwe te?

⁷Omuẹro nẹ Ọghẹnẹ ghine mie vwe ẹgba, ọ djẹ otu me ejobi nu vwe oma.

⁸Ọ da nẹrhẹ ẹto mẹ chahe ku vwẹ uyovwi ọyena kẹ oseri kpahe ovwẹ; me da rhe dọn mu grosi, ọna kẹ oseri kpahe ovwẹ.

⁹Ọ chẹghẹ ovwẹ vwẹ ophu rọye, ki mi tuoma, ọ rhọvwọ akọ rọye fia kẹ vwẹ; ọvweghrẹ mẹ bẹrẹ ẹro rọye ku vwe.

¹⁰Ihwo rhiẹ unu rayen phihọ kẹ vwẹ, ayen vwẹ obọ fa vwẹ ọhwa vẹ ehwẹjẹ, ayen bi koko gbidi vwọ kpahe ovwẹ.

¹¹Ọghẹnẹ siobọ nu vwe kẹ ihwumwemwu, o de phi vwe phihọ obọ rẹ ihwumwemwu.

¹²Me hẹ ofuvwegbe jovwo, o de bru vwe ibribro, ọ yọnrọn ovwe ohọre o de mu vwe brotọ chẹchẹghẹ, Ọ da vwẹ ovwẹ suẹro ro che hwe,

¹³esedada rọye yariẹ ovwẹ wan. Ọ sa ibiehu mẹ rhie phihọ, o ju vwe vwo-o, o kuẹ ukpaphrẹ mẹ kuotọ.

¹⁴Ọ da rharhẹ iphrophro phihọ ovwẹ; o de chiyi uvwe wan kerẹ ọgbofovwi.

¹⁵Mi ko esisio vwo rhuo oma mẹ, e bru ogangan mẹ phihọ iwurhie.

¹⁶Opharo mẹ kọ vwara vẹ oviẹ, ebri rode na da vọn iphephẹro mẹ,

¹⁷dede na ya mrẹ ozighi ọvuọvo vwẹ abọ mẹ-ẹ, erhovwo mẹ ọfuanfon.

¹⁸E otọ, wo rhurhu ọbara mẹ-ẹ, wo jẹ oviẹ mẹ mrẹ asan rẹ urovwoma-a.

¹⁹Asakiephana, gbe nighe, oseri mẹ he obo odjuvwu, ohwo rọ chọ vwẹ ọ hẹ obenu.

²⁰Igbeyan mẹ vwẹ ovwẹ jehwẹ; ẹro mẹ ra djẹ ame rẹ oviẹ kẹ Ọghẹnẹ,

²¹manẹ kọ sa yọnre obọ ro te ohwo vwẹ obọ rẹ Ọghẹnẹ vwonẹ, kirobo rẹ ohwo yọnra vwọ kẹ ọrivẹ rọye.

²²Kidie ọke rẹ imikpe tutuno de rhi tere ki mi che kpo idjerhe re te nẹ e gbi rhivwi cha-a.