Read urhobo Job 17 Bible Online

Job 17 - urhobo bible

Job 17

¹Erhi mẹ guọghọre, ẹdẹ mẹ fueri, ushi choma kẹ vwẹ re.

²Omuẹro ejẹhwẹ yariẹ ovwẹ phihọ ẹro mẹ ra mrẹ obo rẹ ayen kpare ovwẹ ophu te.

³Gba vwẹ oma wẹn vwo vie ewan kẹ vwẹ, ono etiyin rọ re esarobọ mẹ?

⁴Re wo vwo rhurhu udu rayen kẹ ọhọ nure na, eriyin na wo rhe je ayen ghọghọ-ọ.

⁵Ohwo ro guẹn igbeyan rọye rere ọ vwọ mrasan vwo ẹkẹn vwẹ ekuakua rayen, ẹro rẹ emọ rọye che rhu.

⁶Ọ vwẹ ovwẹ ru ohwo re vwo broha, mẹvwẹ kẹ ohwo ra mrẹ e dje enya kufia.

⁷Ukpokpogho dje vwe ẹro, ekuakua rẹ oma mẹ da họhọ uhoho.

⁸Ofu mẹ ko di djẹ ihwo ọsoso, ọvwata de vrẹn vwọ so oruimwemwu.

⁹Yẹ ọvwata ji churu obọ mu idjerhe rọye, ohwo rẹ abọ rọye fonro ra gan phihọ.

¹⁰Ẹkẹvuọvo, ovwan ejobi, ovwan rhoma rhe, me cha sa mrẹ ọvwẹghwanre vwẹ ohri rẹ ovwa-an.

¹¹Ẹdẹ mẹ wanre, iroro mẹ ghwọrọ fia, ẹguọnọ rẹ udu mẹ.

¹²Ayen vwẹ asọn ru uvo, ayen tare nẹ, Urhukpẹ sikẹrẹ ebri.

¹³Ọ da dianẹ mi rhẹro rẹ Erivwi kerẹ uwevwi mẹ, me da hwa ehwa mẹ phihọ ebri,

¹⁴re me da ta kẹ ọgọdọ, wọwẹ hẹ ọsẹ mẹ, kẹ ohori, Oni mẹ, eyẹ Oniọvo rẹ ọmọtẹ mẹ,

¹⁵ki tivọ iphiẹrohọ mẹ epha? Kono sa mrẹ iphiẹrohọ mẹ?

¹⁶Kọ yanran kpo otọ rẹ itehru rẹ Erivwi? kẹ avwanre che kuoma gbe vwo kpo evun rẹ ekpẹn?