Read urhobo Job 19 Bible Online

Job 19 - urhobo bible

Job 19

¹Job da kpahe:

²Mavọ ovwan kpokpo uvwe krite, ru wa vwẹ eta ghwọrọ ovwẹ oma te?

³Asihwe soso ovwan bọphiẹ ovwẹ, oma rha vo ovwan re ovwan vwo ru vwe chọ?

⁴Ọ da ghene dianẹ uyota ni mi ruchọ, oruchọ mẹ ọ hẹ oma mẹ.

⁵Ọ da dianẹ ovwan ghine phuoma kpahe ovwẹ, wa da vwẹ oma evwokpoto mẹ nene uvwe phraphro,

⁶Wa riẹn nẹ Ọghẹnẹ ri phi vwe phihọ oruchọ na, ro de phi ariri rọye yariẹ ovwẹ phihọ.

⁷Nighe, mi buru, Oshenyẹ yo! e ji nyo vwe-e, mi de bunu, ye me re ase-e.

⁸Ọ gba ogba yariẹ idjerhe mẹ, rere mi vwo je wan vrẹn, o de phi ebri phihọ idjerhe mẹ.

⁹Ọ ghwiẹ urinrin mẹ nu vwe oma, o de si erhu rẹ uvie nẹ uyovwi mẹ.

¹⁰O mu vwe ghwiotọ vwẹ abọ kabọ, mi de ghwe re, ọ ghwiẹ iphiẹrohọ mẹ kerẹ urhe.

¹¹Ophu rọye tua kpahe ovwẹ, o keru vwe phihọ ọvweghrẹ rọye.

¹²Otuofovwi rọye rhu si koko, ayen gba ohẹrhẹ yariẹ ovwẹ phihọ ayen de muerhọn yariẹ ọvwe wan.

¹³Ọ djẹ imoni mẹ nu vwe oma, eriẹvwẹ mẹ yan ju vwe vwo tototo.

¹⁴Ihwo mẹ vẹ igbeyan mẹ phiẹvwe,

¹⁵erhorha ri wo vwe me chọrọ ayen ẹro mẹvwẹ kẹ ọrhọrha kẹ emetẹ rẹ uwevwi mẹ, mẹvwẹ kẹ osoghoro vwẹ aro rayen.

¹⁶Mi vwo se odibo mẹ, o nyori-i; ke me vwẹ unu mẹ rẹ.

¹⁷Ki mi tuẹ aye mẹ oma, ki mi gbo hwe emọ rẹ oni mẹ.

¹⁸Imitete je sen vwẹ dede; mi de vrẹn ayen ke ta ota kpahe ovwẹ.

¹⁹Emamọ rẹ igbeyan mẹ ejobi sen vwẹ, otu rẹ ivun mẹ vwerha rhoma kurhẹriẹ vwọ so vwẹ.

²⁰Ibeku mẹ yamu ohọroma mẹ vẹ ivwo rẹ oma mẹ, ẹghẹgha me vwọ djẹ vabọ.

²¹Re ehrọre mẹ, re ehrọre mẹ, E ovwan igbeyan mẹ, kidie obọ rẹ Ọghẹnẹ te vwe re!

²²Die jabọ wọ vwọ tua vwẹ, kerẹ Ọghẹnẹ? Die jabọ re uvwo rẹ oma mẹ gbe da wẹ ẹro-o?

²³E mane ke si eta mẹ na! E mane e si ayen phihọ ọbe!

²⁴E mane kẹ umurhe rẹ utehru vẹ ọ rẹ isinika a vwọ tuọn ayen phihọ oragha bẹdẹ!

²⁵Kidie me riẹnre nẹ Ọ rọ tavwẹ hirhe herọ nẹ o che mudia enu rẹ akpọ na vwẹ ukuko rọye,

²⁶nẹ ọke rẹ ohọroma mẹ da ghwọrọ nu, rẹ uvwo rẹ oma mẹ gbe herọ dede-e yẹ me cha mrẹ Ọghẹnẹ,

²⁷ohwo re me cha mrẹ kẹ oma mẹ, ibiẹro mẹ che no, ọ dia ohwo ọfa-a. Vwẹ evun rẹ udu mẹ oma ko ron vwẹ.

²⁸Ọda dianẹ wa tare nẹ, Mavọ ma vwọ tua wẹ te vwo! gbenẹ, amrẹ otọ rẹ ota na vwẹ evun rọye,

²⁹djẹ oshọ rẹ ọlọkọ na kidie ophu re ghwa ehwe rẹ ọlọkọ cha, rere wọ vwọ riẹn nẹ orhiebro herọ.