Read urhobo Job 2 Bible Online

Job 2 - urhobo bible

Job 2

¹O ki ji rhi te ẹdẹ ọfa rẹ emọ rẹ Ọghẹnẹ vwọ rhe rhe vwẹ oma phia vwẹ obaro rẹ Ọrovwohwo, Ẹdjọ da je rhe rhe vwẹ oma rọye phia vwẹ obaro rẹ Ọrovwohwo.

²Ọrovwohwo da ta kẹ Ẹdjọ, Bovọ wo nurhe vwo? Edjọ da kpahe kẹ Ọrovwohwo, Me de yan kpuko kparo kpenu kpotọ vwẹ evun rẹ akpọ na.

³Ọrovwohwo da ta kẹ Ẹdjọ, Wọ karohọ odibo mẹ Job, ọ rọ họherọ vwẹ akpọ na herọ-ọ, ohwo ro vwo eka-an ọ ke je dia ohwo ọsoso oruẹ, ohwo rọ djẹ oshọ rẹ Ọghẹnẹ o de ji sioma nẹ umiovwo? Ọ je yọnre ọvwata rọye, ghwaghwa owenẹ wo ru vwe vwo mukpahọ dede, vwọ ghwọrọ ekueku.

⁴Etiyin Ẹdjọ da kpahe kẹ Ọrovwohwo, Ohọroma a vwọ hwa osa rẹ ohọroma! Obo rẹ ohwo vwori ejobi ọ vwọ hwa osa rẹ urhuarho rọye.

⁵Ẹkẹvuọvo gba riẹn obọ wẹn phia nana nana, vwo te ibeku vẹ uvwo rọye, kọ cha harhẹ owẹ phia.

⁶Ọrovwohwo ke rha ta kẹ Ẹdjọ, Nighe, ọ hẹ obọ wẹn, takpi sivwi arhọ rọye.

⁷Ọtiọye na Ẹdjọ da yanran nẹ obaro rẹ Ọrovwohwo, ra vwẹ era ri gbo ọnrhe bru Job nẹ ẹhẹrhowọ re te ekrekruyovwi rọye.

⁸Ọ reyọ igbephẹnre kọye ọ vwọ kare omobọ rọye, o de broma phihọ iwurhie.

⁹Etiyin aye rọye ke ta kẹ, Wọ je yọnre ọvwata wẹn ghwaghwa vwo? Harhẹ Ọghẹnẹ, re wo ghwu.

¹⁰Ẹkẹvuọvo ọ da ta kẹ, Wọ ta ota kirobo rẹ ọvo vwẹ usun rẹ eya ri djidji na ta. Avwanre da reyọ emu esiri vwẹ obọ rẹ Ọghẹnẹ, a rha reyọ omiomiovwi vwọ? Vwẹ evun rẹ enana ejobi na Job vwẹ ẹbẹrunu rọye ru umwemwu-u.

¹¹Rẹ igbeyan ri Job erha rhi vwo nyo oghẹre rẹ ukpokpogho ro bruro rhe, dohwo dasan rọye de nurhe, Elifaz ri Timan, Bldad ri Shua, vi Zofa rẹ ohwo ri Naama. Ayen de bru ẹdẹ phihọ rere ayen rhe bọrọ kugbe rere ayen rhi bruche.

¹²Ọke rẹ ayen vwọ mrẹ vwẹ ogboko, ayen rhe vughe-e, ayen de she ugoroviẹ, ayen da bẹrẹ iwun rayen, ayen da ghwẹ ekpẹn kpenu ku iyovwi rayen.

¹³Ayen vọye de tidia otọ ẹdẹ ighwrẹ vẹ ason ighwrẹ, o vwo ohwo rọ ta ota ọvo kẹ-ẹ, kidie ayen mrẹrẹ nẹ ojaẹriọ rọye rhoro gangan.